សុខភាព៖ យោងតាមការផ្សាយពីប្រភពបរទេស កាហ្វេខ្មៅដែលឆុងរួចថ្មីៗមានក្លិនក្រអូប និងរសជាតិឈ្ងុយឆ្ងាញ់ ប៉ុន្តែគុណភាពរបស់វានឹងចាប់ផ្តើមប្រែប្រួលភ្លាមៗបន្ទាប់ពីប៉ះជាមួយខ្យល់ និងសីតុណ្ហភាពខាងក្រៅ។

ជាទូទៅ កាហ្វេខ្មៅអាចរក្សាទុកនៅសីតុណ្ហភាពបន្ទប់បានប្រហែល ១២ ម៉ោង និងអាចទុកក្នុងទូទឹកកកបានពី ៣ ទៅ ៤ ថ្ងៃ ប្រសិនបើដាក់ក្នុងធុងបិទជិត។ ទោះជាយ៉ាងណាក៏ដោយ អ្វីដែលប្រែប្រួលលឿនបំផុតគឺរសជាតិ ព្រោះជាតិប្រេងនៅក្នុងកាហ្វេនឹងចាប់ផ្តើមអុកស៊ីតកម្ម ដែលធ្វើឱ្យកាហ្វេមានរសជាតិកាន់តែល្វីងខ្លាំង ឬមានជាតិជូរដែលមិនគួរឱ្យចង់ញ៉ាំ។

ការផឹកកាហ្វេដែលទុកចោលយូរបន្តិចបន្តួច ជាទូទៅមិនបង្កគ្រោះថ្នាក់ធ្ងន់ធ្ងរដល់សុខភាពឡើយ ប៉ុន្តែវាអាចផ្តល់នូវផលរំខាន ប្រសិនបើកាហ្វេនោះចាប់ផ្តើមដុះផ្សិត ឬមានបាក់តេរីលូតលាស់ ដែលច្រើនតែកើតឡើងចំពោះកាហ្វេដែលទុកចោលលើសពី ២៤ ម៉ោងនៅខាងក្រៅ។ សញ្ញាដែលបញ្ជាក់ថាអ្នកគួរតែបោះវាចោលភ្លាមនោះគឺ នៅពេលកាហ្វេចាប់ផ្តើមមានក្លិនជូរខុសប្រក្រតី មានស្រទាប់សៗអណ្តែតពីលើ ឬមានរសជាតិផ្អូម ដែលអាចបណ្តាលឱ្យមានបញ្ហាប្រព័ន្ធរំលាយអាហារ ឈឺពោះ ឬរាករូស។

ដើម្បីរក្សាគុណភាពកាហ្វេឱ្យបានល្អបំផុត លោកអ្នកគួរតែឆុងក្នុងបរិមាណល្មមសម្រាប់ញ៉ាំភ្លាមៗ ប៉ុន្តែប្រសិនបើចង់រក្សាទុកកាហ្វេដែលនៅសល់ វិធីដែលល្អបំផុតគឺត្រូវចាក់វាចូលក្នុងដបកែវដែលមានគម្របបិទជិតរួចដាក់ក្នុងទូទឹកកក។ ការធ្វើបែបនេះមិនត្រឹមតែជួយការពារកុំឱ្យខ្យល់ និងក្លិនអាហារផ្សេងៗចូលទៅរំខានប៉ុណ្ណោះទេ ប៉ុន្តែថែមទាំងជួយរក្សារសជាតិឱ្យនៅល្អប្រសើរសម្រាប់ការទទួលទាននៅពេលក្រោយផងដែរ​៕