រាជធានីភ្នំពេញ៖ រថយន្តកុងតឺន័រ១គ្រឿងបានបើកបុកនិស្សិតស្រីម្នាក់ដែលកំពុងជិះម៉ូតូ១គ្រឿងពីក្រោយបណ្ដាលឲ្យរួចកិន ពាក់កណ្ដាលខ្លួន បណ្ដាលឲ្យនាងស្លាប់បាត់បង់ជីវិតភ្លាមៗនៅនឹងន្លែង ហើយរថយន្តនោះបើកហួសទៅមុខបានចម្ងាយប្រមាណ៥០០ម៉ែត្រទើបឈប់ស្ងៀម ។ បន្ទាប់មកបុរសអ្នកបើកបររថយន្តនេះបានចុះមើលនិស្សិតស្រីរងគ្រោះពីចម្ងាយ ហើយបន្តិចក្រោយមកដោយអត់មានអ្នកឃាត់ បុរសនោះក៏បានឡើងបើករថយន្តបន្តដំណើរទៅបាត់ស្រមោល នេះបើតាមការប្រាប់ឲ្យដឹងពីប្រជាពលរដ្ឋដែលឃើញហេតុការណ៍នោះ ។
ឧប្បត្តិហេតុនោះបានកើតឡើងកាលពីវេលាម៉ោង១១និង៥០នាទីថ្ងៃត្រង់ថ្ងៃទី២៤ ខែកុម្ភៈ ឆ្នាំ២០២៦ នៅតាមផ្លូវព្រៃស ស្ថិតនៅក្នុងភូមិព្រៃសខាងកេីត សង្កាត់ព្រៃស ខណ្ឌដង្កោ រាជធានីភ្នំពេញ ។
ប្រជាពលរដ្ឋបាននិយាយបន្តទៀតថាយុវនារីរងគ្រោះខាងលើឈ្មោះ សុខ ណា អាយុ១៨ឆ្នាំ ជានិស្សិត ឆ្នាំទី១ មានស្រុកកំណើតនៅឯខេត្តប៉ៃលិនហើយនៅមុនពេលកើតហេតុ ពួកគាត់បានឃើញយុវតីរងគ្រោះជិះម៉ូតូ១គ្រឿងម៉ាកហុងដាស្កូបពី ពណ៍ស ពាក់ស្លាកលេខប៉ៃលិន1B-2408 ធ្វើដំណើរតាមផ្លូវព្រៃស ក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុ ស្រាប់តែមានរថយន្តកុងតឺន័រ១គ្រឿងបើកបរលឿនក្នុងទិសដៅស្របគ្នាទៅដល់បុកពីក្រោយបណ្ដាឲ្យដួលម៉ូតូខ្ទាតយុវនារីរងគ្រោះចូលក្រោមកង់រថយន្តបង្កខាងលើកិនចំពាក់កណ្ដាលខ្លួនស្លាប់ភ្លាមៗនៅនឹងកន្លែងតែម្ដង ។
ប្រភពដដែលបានប្រាប់ឲ្យដឹងបន្តថា ក្រោយពីបុកនិងកិនជនរងគ្រោះស្លាប់ហើយ រថយន្តបង្កខាងលើបានបើកហួសទៅមុខចម្ងាយប្រមាណ៥០០ម៉ែត្រទើបឈប់ បន្ទាប់មកបុរសដែលជាអ្នកបើកបរបានចុះមើលជនរងគ្រោះដែលស្លាប់ពីចម្ងាយ ។ អ្នកនៅកន្លែងកើតហេតុរវល់តែស្រឡាំងកាំង ទើបមិនបានឃាត់ទាំងរថយន្តនិងអ្នកបើកបរនោះទុកដើម្បីដោះស្រាយគ្នា ទើបបន្តិចក្រោយមកបុរសនោះ ក៏បានឡើងបើករថយន្តគេចខ្លួនទៅបាត់ស្រមោល ហើយពេលរថយន្តបើកចេញទៅ ក៏គ្មាននរណាជួយដេញតាមឃាត់ដែរ ។
ក្រោយពេលកេីតហេតុនគរបាលប៉ុស្តិ៍ព្រៃស និងនគរបាលខណ្ឌដង្កោបានសហការគ្នាចុះធ្វើការវាស់វែងរួចនាំយកម៉ូតូទៅរក្សាទុកបណ្ដោះអាសន្នព្រមទាំងប្រគល់សពជូនក្រុមគ្រួសារសាច់ញាតិនាំយកទៅធ្វេីបុណ្យតាមប្រពៃណី ។ បន្ទាប់មកនគរបាលខាងលើក៏បានធ្វើការឆែកកាមេរ៉ាសុវត្ថិភាពតាមដងផ្លូវ ដេីម្បីស្រាវជ្រាវរករថយន្តបង្ក ឃាត់នាំយកមកដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ