ទីក្រុងតេអេរ៉ង់៖ ប្រទេសអ៊ីរ៉ង់ថ្ងៃនេះនិយាយត្បកដាក់អាមេរិកមួយទំហឹងពាក់ព័ន្ធនឹងការចរចាគ្នាដើម្បីដោះស្រាយបញ្ហានុយក្លេអ៊េរខណៈដែលលោកត្រាំទុកពេលឱ្យ១០ទៅ១៥ថ្ងៃត្រូវតែមានកិច្ចព្រមព្រៀង។ បើមិនដូច្នេះទេ ហេតុការណ៍អាក្រក់អាចនឹងកើតឡើងជាមិនខាន។ ដូច្នេះ អ្នកនាំពាក្យក្រសួងការបរទេសអ៊ីរ៉ង់ពន្លះទៅវិញថាការចរចាគ្នាប៉ុន្មានដងក៏ដោយក៏នៅតែគ្មានលទ្ធផលដដែលបើសិនអាមេរិកនៅតែប្រើវិធីបង្ខិតបង្ខំ និងដាក់លក្ខខណ្ឌជាឯកតោភាគីឱ្យអ៊ីរ៉ង់ធ្វើតាមការចង់បានរបស់ខ្លួន។
ការថ្លែងដូច្នេះធ្វើឡើងមុនពេលអ៊ីរ៉ង់ និងអាមេរិកត្រៀមចូលតុចរចាគ្នាដោយប្រយោល (មានភាគីទីបីជាអ្នកសម្របសម្រួល) ជាលើកទីបីនៅទីក្រុងហ្សឺណែវ ប្រទេសស្វីស។ នេះបើយោងតាមការបង្ហើបឱ្យដឹងពីរដ្ឋមន្ត្រីការបរទេសអូម៉ង់ លោកបាដឺ អាល់ប៊ូសៃឌី (Badr Albusaidi)។ មជ្ឈដ្ឋានទូទៅកំពុងរង់ចាំអ៊ុតស្ថានការណ៍នេះទាំងភ័យអរៗព្រោះស្រួលមិនស្រួលសង្គ្រាមអាចនឹងផ្ទុះឡើងមែន។
អ៊ីរ៉ង់យល់ព្រមធ្វើសម្បទានខ្លះៗនៅក្នុងកម្មវិធីនុយក្លេអ៊ែររបស់ខ្លួនដើម្បីចរចាឆាប់ត្រូវរ៉ូវគ្នា។ ប៉ុន្តែអ៊ីរ៉ង់យល់ព្រមធ្វើដូច្នេះដោយភ្ជាប់លក្ខខណ្ឌរបស់ខ្លួន។ ក្នុងនោះ អ៊ីរ៉ង់ទាមទារឱ្យអាមេរិកលុបចោលទណ្ឌកម្មសេដ្ឋកិច្ច និងទទួលស្គាល់ថាអ៊ីរ៉ង់មានសិទ្ធិចម្រាញ់សារធាតុវិទ្យុសកម្មសម្រាប់បម្រើឱ្យវិស័យស៊ីវិល (ឧទាហរណ៍ បង្កើតរោងចក្រផលិតអគ្គិសនីពីថាមពលនុយក្លេអ៊ែរ)។
ឥឡូវនេះ បញ្ហាចម្រូងចម្រាសមួយចំនួនក៏អាចជាឧបសគ្គរារាំងមិនឱ្យប្រទេសទាំង២សម្រេចបានកិច្ចព្រមព្រៀងជាមួយគ្នានោះទេ។ ឧទាហរណ៍ ក្រៅពីទាមទារឱ្យអ៊ីរ៉ង់បោះបង់ចោលកម្មវិធីនុយក្លេអ៊ែររបស់ខ្លួន អាមេរិកបានភ្ជាប់បញ្ហាដទៃទៀតដូចជាការទាមទារឱ្យអ៊ីរ៉ង់បោះបង់ចោលកម្មវិធីមីស៊ីលផ្លោង និងឈប់ផ្ដល់ហិរញ្ញប្បទានសម្រាប់ចលនាប្រដាប់អាវុធមួយចំនួននៅមជ្ឈិមបូព៌ា (ដូចជាក្រុមហ៊ូទីនៅយេម៉ែន, ក្រុមហេសបូឡានៅលីបង់ និងក្រុមហាម៉ាស់នៅហ្កាហ្សា)៕ ប្រភព៖ រ៉យទ័រ
ចែករំលែកព័តមាននេះ