ប្រទេសកូរ៉េខាងជើង ៖ ទីភ្នាក់ងារព័ត៌មានកូរ៉េខាងជើងKCNA រាយការណ៍នាថ្ងៃទី២៣ កុម្ភៈ ថា មេដឹកនាំលោកគីម ជុងអ៊ុន ត្រូវបានជ្រើសតាំងជាអគ្គលេខាបក្សពលករកូរ៉េបន្តទៀតក្នុងឱកាសសមាជបក្ស ដែលបែបនេះអាចឲ្យលោកពង្រឹងអំណាចថែមទៀតក្នុងប្រទេស…
ប្រទេសកូរ៉េខាងជើង ៖ ទីភ្នាក់ងារព័ត៌មានកូរ៉េខាងជើងKCNA រាយការណ៍នាថ្ងៃទី២៣ កុម្ភៈ ថា មេដឹកនាំលោកគីម ជុងអ៊ុន ត្រូវបានជ្រើសតាំងជាអគ្គលេខាបក្សពលករកូរ៉េបន្តទៀតក្នុងឱកាសសមាជបក្ស ដែលបែបនេះអាចឲ្យលោកពង្រឹងអំណាចថែមទៀតក្នុងប្រទេស ។
តាម KCNA សេចក្ដីសម្រេចឲ្យលោកគីម ជុងអ៊ុន បន្តកាន់តំណែងអគ្គលេខាបក្ស ត្រូវបានធ្វើកាលពីថ្ងៃទី២២ កុម្ភៈ ស្របតាមឆន្ទៈ និងបំណងប្រាថ្នាជាឯកច្ឆ័ន្ទរបស់ប្រតិភូបក្សទាំងអស់ដែលចូលរួមក្នុងសមាជ ។ មុននេះ លោកគីម ជុងអ៊ុន ធ្លាប់បានលើកឡើងថា សមាជបក្សនឹងលាតត្រដាងដំណាក់កាលខាងមុខនៃកម្មវិធីនុយក្លេអ៊ែររបស់ប្រទេស ។
ក្នុងសារអបអរសាទរជូនមេដឹកនាំកូរ៉េខាងជើង ប្រធានាធិបតីចិន លោកស៊ីជីនពីង លើកឡើង កាលពីថ្ងៃទី២៣ កុម្ភៈ ថា លោកត្រៀមធ្វើការជាមួយលោកគីម ជុងអ៊ុន ។ សមាជបក្សពលករកូរ៉េតែងធ្វើរៀងរាល់៥ឆ្នាំម្ដង ដែលនោះជាការជួបជុំដ៏សំខាន់បំផុតរបស់បក្ស និងជាព្រឹត្តិការណ៍ចម្បងមួយ សំដៅពង្រឹងអំណាច និងអាចប្រើជាវេទិកា សម្រាប់ប្រកាសពីការផ្លាស់ប្ដូរនានាខាងនយោបាយ ឬការរុះរើក្នុងផ្ទៃថ្នាក់ដឹកនាំ ។
ក្នុងសុន្ទរកថាបើកសមាជនោះ កាលពីថ្ងៃទី១៩ កុម្ភៈ លោកគីម ជុងអ៊ុន ក៏សន្យាដែរ ពីការកែលំអកម្រិតជីវភាពរបស់ប្រជាជនលោក ដែលនោះជាការនិយាយសំដៅលើការលំបាកនានានៃសេដ្ឋកិច្ច និងការខ្វះស្បៀង ក្នុងប្រទេសលោកដែលស្ថិតក្រោមការដាក់ទណ្ឌកម្មអន្តរជាតិ ។ ចាប់តាំងពីច្រើនទសវត្សមកហើយ រដ្ឋអំណាចកូរ៉េខាងជើងតែងផ្ដល់អាទិភាពដល់ការអភិវឌ្ឍសមត្ថភាពយោធារបស់ប្រទេស និងអាវុធនុយក្លេអ៊ែរជាជាងគិតដល់ផ្នែកដទៃៗទៀត ។
កាលក្នុងឱកាសសមាជបក្សលើកមុននេះ នាឆ្នាំំ២០២១ លោកគីម ជុងអ៊ុន ធ្លាប់បានទទួលស្គាល់ពីកំហុសឆ្គងមួយ ក្នុងការសារភាពដ៏កម្រមួយថា ការខុសឆ្គងនានាត្រូវបានប្រព្រឹត្តស្ទើរក្នុងគ្រប់វិស័យនៃការអភិវឌ្ឍសេដ្ឋកិច្ច ៕
ចែករំលែកព័តមាននេះ