ប្រទេសម៉ិកស៊ិក ៖ ការប៉ះទង្គិចគ្នាដោយហិង្សាបានផ្ទុះឡើងនៅតំបន់ខ្លះនៃភាគខាងលិចប្រទេសម៉ិកស៊ិក កាលពីថ្ងៃអាទិត្យ (ម៉ោងនៅប្រទេសម៉ិកស៊ិក) អំឡុងពេលប្រតិបត្តិការយោធាមួយ ដែលនាំឱ្យមានការស្លាប់មេដឹកនាំក្រុមជួញដូរគ្រឿងញៀន Jalisco New Generation…
ប្រទេសម៉ិកស៊ិក ៖ ការប៉ះទង្គិចគ្នាដោយហិង្សាបានផ្ទុះឡើងនៅតំបន់ខ្លះនៃភាគខាងលិចប្រទេសម៉ិកស៊ិក កាលពីថ្ងៃអាទិត្យ (ម៉ោងនៅប្រទេសម៉ិកស៊ិក) អំឡុងពេលប្រតិបត្តិការយោធាមួយ ដែលនាំឱ្យមានការស្លាប់មេដឹកនាំក្រុមជួញដូរគ្រឿងញៀន Jalisco New Generation Cartel ឬ CJNG ដែលបង្កឱ្យមានការព្រួយបារម្ភអំពីសន្តិសុខយ៉ាងខ្លាំងនៅទូទាំងតំបន់។ នេះបើតាមប្រភពពីសារព័ត៌មាន CBS News, CNN និង Reuters បានចេញផ្សាយ។
ក្រសួងការពារជាតិម៉ិកស៊ិកបានអះអាងនៅក្នុងសេចក្តីថ្លែងការណ៍មួយនៅលើបណ្តាញទំនាក់ទំនងសង្គម X ថា កងកម្លាំងសន្តិសុខរបស់ម៉ិកស៊ិកបានសម្លាប់ លោក Nemesio Rubén Oseguera Cervantes ដែលត្រូវបានគេស្គាល់យ៉ាងច្បាស់ថា «El Mencho» អំឡុងពេលប្រតិបត្តិការមួយនៅរដ្ឋហាលីស្គោ (Jalisco) ភាគខាងលិចប្រទេស។ ក្រសួង បញ្ជាក់ថា Oseguera បានរងរបួសធ្ងន់ធ្ងរ អំឡុងការវាយឆ្មក់មួយក្នុងទីក្រុងតាប៉ាល់ប៉ា (Tapalpa) ហើយបានស្លាប់ខណៈពេលកំពុងតែបញ្ជូនខ្លួនតាមយន្តហោះទៅកាន់ទីក្រុងម៉ិកស៊ិក (Mexico City)។
អំពើហិង្សាបានផ្ទុះឡើងក្នុងរដ្ឋជាច្រើននៅក្នុងប្រទេសម៉ិកស៊ិក បន្ទាប់ពីកម្លាំងសន្តិសុខមកពីសាខាសហព័ន្ធជាច្រើននៃយោធាម៉ិកស៊ិកបានធ្វើប្រតិបត្តិការក្នុងទីក្រុងតាប៉ាល់ប៉ា នៃរដ្ឋហាលីស្គោភាគខាងលិច។ មន្ត្រីអះអាងថា បណ្តាសមាជិកដែលសង្ស័យថាជាពួកឧក្រិដ្ឋជនបានចេញសកម្មភាពដោយហិង្សាបន្ទាប់ពីប្រតិបត្តិការនោះ ដោយបានដុតឡាន ឡានក្រុង និងទីតាំងលក់ដូរជាច្រើនកន្លែង ខណៈពេលប៉ះទង្គិចជាមួយកងកម្លាំងសន្តិសុខ។
ក្រសួងការបរទេសអាមេរិកបានជំរុញឱ្យជនជាតិអាមេរិកក្នុងតំបន់ខ្លះនៃប្រទេសម៉ិកស៊ិកស្វែងរកជម្រកសុវត្ថិភាព និងស្នាក់នៅក្នុងលំនៅដ្ឋាន ឬសណ្ឋាគាររហូតដល់មានការជូនដំណឹងបន្ថែម។
ជាមួយគ្នានោះដែរ លេខាធិការដ្ឋានការពារជាតិរបស់ម៉ិកស៊ិកអះអាងថា អាជ្ញាធរអាមេរិកបានផ្តល់ព័ត៌មានបន្ថែមអំពីការគាំទ្រក្នុងប្រតិបត្តិការនេះ។ ស្របពេលមន្ត្រីការពារជាតិអាមេរិកម្នាក់បានប្រាប់ CBS News ថា យោធាអាមេរិកបានដើរតួនាទីក្នុងប្រតិបត្តិការតាមរយៈក្រុមការងារអន្តរភ្នាក់ងារចម្រុះ-ប្រឆាំងនឹងក្រុមជួញដូរគ្រឿងញៀន ដែលធ្វើការជាប្រចាំជាមួយយោធាម៉ិកស៊ិកតាមរយៈបញ្ជាការភាគខាងជើងអាមេរិក។ មន្ត្រីមិនបញ្ចេញឈ្មោះរូបនោះបានសង្កត់ធ្ងន់ថា នេះជាប្រតិបត្តិការយោធាម៉ិកស៊ិក ដូច្នេះភាពជោគជ័យគឺជារបស់ពួកគេ។
ក្រសួងការពារជាតិម៉ិកស៊ិកបានរាយការណ៍ថា អំឡុងពេលការវាយឆ្មក់នោះ សមាជិក CJNG បានបាញ់តដៃជាមួយកងកម្លាំងរដ្ឋាភិបាល ដែលបណ្តាលឱ្យសមាជិកក្រុមឧក្រិដ្ឋជន ៤ នាក់ត្រូវបានសម្លាប់នៅកន្លែងកើតហេតុ។ យោងតាមក្រសួង Osegeura និងបក្ខពួក ២ នាក់ផ្សេងទៀតបានរងរបួសធ្ងន់ធ្ងរ ហើយបានស្លាប់ពេលកំពុងបញ្ជូនតាមយន្តហោះទៅកាន់ទីក្រុងម៉ិកស៊ិក។ បុគ្គលិកយោធាម៉ិកស៊ិក ៣ នាក់ក៏រងរបួសក្នុងប្រតិបត្តិការនេះដែរ ហើយត្រូវបានបញ្ជូនទៅមន្ទីរពេទ្យមួយនៅក្នុងទីក្រុងម៉ិកស៊ិកដើម្បីព្យាបាល។
រដ្ឋហាលីស្គោគឺជាមូលដ្ឋានរបស់ក្រុម CJNG ដែលត្រូវបានគេស្គាល់យ៉ាងច្បាស់សម្រាប់ការជួញដូរថ្នាំញៀន Fentanyl និងគ្រឿងញៀនដទៃទៀតនៅក្នុងបរិមាណច្រើនទៅកាន់សហរដ្ឋអាមេរិក។ ដ្បិតអនុរដ្ឋមន្ត្រីការបរទេសអាមេរិក លោក Christopher Landau បានបញ្ជាក់ពីការស្លាប់មេដឹកនាំក្រុមមួយនេះ ដោយបានសរសេរលើបណ្តញសង្គម X ថា Osegeura គឺជាមេក្លោងគ្រឿងញៀនបង្ហូរឈាម និងឃោរឃៅបំផុតម្នាក់។ នេះគឺជាការវិវឌ្ឍដ៏អស្ចារ្យមួយសម្រាប់ម៉ិកស៊ិក សហរដ្ឋអាមេរិក អាមេរិកឡាទីន ក៏ដូចជាពិភពលោក។ ចំណែកប្រធានាធិបតីម៉ិកស៊ិក លោកស្រី Claudia Sheinbaum បានសរសើរការងាររបស់ភ្នាក់ងារពាក់ព័ន្ធនឹងបេសកកម្មនេះផងដែរ៕
ចែករំលែកព័តមាននេះ