ចំណេះដឹង៖ យោងតាមការផ្សាយពីប្រភពបរទេស ភាពវៃឆ្លាតផ្នែកអារម្មណ៍ ឬ EQ មិនមែនសំដៅលើមនុស្សដែលមិនចេះខឹង ឬសើចសប្បាយគ្រប់ពេលនោះទេ ប៉ុន្តែវាគឺជាសិល្បៈនៃការស្គាល់ និងគ្រប់គ្រងអារម្មណ៍ខ្លួនឯងឱ្យស្ថិតក្នុងតុល្យភាពបំផុត។

បុគ្គលដែលមាន EQ ខ្ពស់ តែងមានរបៀបរស់នៅប្រកបដោយភាពស្ងប់ស្ងាត់ និងមានទំនាក់ទំនងល្អជាមួយអ្នកជុំវិញខ្លួន តាមរយៈទម្លាប់ប្រចាំថ្ងៃដែលមើលទៅសាមញ្ញ តែមានអានុភាពខ្លាំងក្លា។

ជាដំបូង បុគ្គលទាំងនេះដឹងច្បាស់ពីចំណុចឈប់សម្រាករបស់ខ្លួនឯង ដោយពួកគេនឹងមិនបង្ខំចិត្តឱ្យធ្វើការងារទាំងអារម្មណ៍មិនល្អឡើយ តែជ្រើសរើសការដកខ្លួនចេញមួយឡែកដើម្បីកំណត់ថាមពលចិត្តឡើងវិញ។ ពួកគេមានវិន័យខ្ពស់ក្នុងការមិនតបតសារក្នុងពេលខឹង និងចៀសវាងការប្រើទូរស័ព្ទក្នុងពេលស្ត្រេស ព្រោះយល់ថាអារម្មណ៍អវិជ្ជមានអាចធ្វើឱ្យការសម្រេចចិត្តមានកំហុស។ នៅក្នុងការសន្ទនា ពួកគេផ្ដល់តម្លៃលើការស្ដាប់ច្រើនជាងការនិយាយ ដោយមិនរារាំងពាក្យសម្តីអ្នកដទៃ ព្រោះការយល់ចិត្តគ្នាមានតម្លៃខ្ពស់ជាងការចង់ឈ្នះចាញ់។

អ្វីដែលគួរឱ្យគោរពបំផុតនោះគឺ ពួកគេហ៊ានបន្ទាបខ្លួនសុំទោសជាមុនដើម្បីរក្សាចំណងមិត្តភាព ទោះបីជាពួកគេមិនមែនជាអ្នកខុសទាំងស្រុងក៏ដោយ។ ពួកគេមានខែលការពារចិត្តយ៉ាងរឹងមាំ ដោយមិនរើសយកសម្ដីអវិជ្ជមានរបស់អ្នកដទៃមកដាក់ក្នុងខ្លួន ហើយប្តូរពីការប្រៀបធៀបខ្លួនឯងជាមួយអ្នកដទៃ មកជាការប្រកួតប្រជែងជាមួយខ្លួនឯងកាលពីម្សិលមិញវិញ។ ទម្លាប់ដ៏អស្ចារ្យចុងក្រោយ គឺសមត្ថភាពក្នុងការរក្សាស្នាមញញឹមសូម្បីតែក្នុងថ្ងៃដ៏អាក្រក់បំផុត ព្រោះពួកគេជឿជាក់លើការដោះស្រាយបញ្ហាដោយក្ដីសង្ឃឹម និងភាពវិជ្ជមាន។

ជាការពិតណាស់ EQ មិនមែនជាអំណោយពីកំណើតដែលមិនអាចកែប្រែបានឡើយ ប៉ុន្តែវាជាជំនាញដែលយើងគ្រប់គ្នាអាចហ្វឹកហាត់បាន។ ការចាប់ផ្តើមពីការដកដង្ហើមវែងៗមុនពេលមានប្រតិកម្ម ឬរៀននិយាយដោយសប្បុរសជាមួយខ្លួនឯង នឹងជួយឱ្យអ្នកមានសុភមង្គលក្នុងទំនាក់ទំនង និងអាចឆ្លងកាត់រាល់ឧបសគ្គក្នុងជីវិតដោយភាពជឿជាក់ និងស្ងប់ស្ងាត់បំផុត​៕