ទីក្រុងកាប៊ុល៖ ប៉ាគីស្ថានថ្លែងថាខ្លួនបានវាយប្រហារតាមអាកាសទៅលើមូលដ្ឋានរបស់ក្រុមយុទ្ធជននៅអាហ្វហ្កានីស្ថានបណ្ដាលឱ្យស្លាប់មនុស្សរាប់សិបនាក់។ ការវាយប្រហារកាលពីយប់មិញនោះមានលក្ខណៈខ្លាំងក្លាបំផុតចាប់តាំងពីមានការប៉ះទង្គិចគ្នាតាមព្រំដែនកាលពីខែតុលា ឆ្នាំ២០២៥។ កាលនោះ ភាគីទាំងសងខាងស្លាប់មនុស្សជាង៧០នាក់ និងរបួសរាប់រយនាក់។
លើកនេះ ប៉ាគីស្ថានអះអាងថាខ្លួនវាយប្រហារទីតាំង៧កន្លែងនៅតាមបណ្ដោយព្រំដែនប្រទេសទាំង២។ គោលដៅនៃការវាយប្រហារនោះគឺក្រុមយុទ្ធជនដែលសម្ងំលាក់ខ្លួនដើម្បីចាំធ្វើសកម្មភាពដាក់គ្រាប់បែកអត្តឃាតនៅប៉ាគីស្ថាន។ ក្រសួងព័ត៌មានប៉ាគីស្ថានចេញសេចក្ដីប្រកាសថាយោធារបស់ខ្លួនវាយប្រហារពួកយុទ្ធជនតាលីបង់ដែលមានដើមកំណើតប៉ាគីស្ថាន និងបក្សពួករបស់ពួកគេ រួមទាំងបក្សពួករបស់ក្រុមអាយស៊ីស។
ក្រសួងការពារជាតិអាហ្វហ្កានីស្ថានថ្លែងថាមនុស្សរាប់សិបនាក់ជាជនស៊ីវិលដែលគ្មានកំហុសត្រូវពលីជីវិត និងរបួសដោយសារការវាយប្រហារនោះ។ ជនជាតិអាហ្វហ្កានីស្ថានម្នាក់និយាយថាអ្នករស់នៅទីនេះសុទ្ធតែជាមនុស្សធម្មតា។ ពួកគេជាសាច់ញាតិរបស់យើង។ នៅពេលការទម្លាក់គ្រាប់បែកកំពុងកើតឡើង មនុស្សម្នាក់ដែលអាចគេចផុតពីសេចក្ដីស្លាប់បានស្រែកឱ្យគេជួយ។
ប្រតិកម្មចំពោះការវាយប្រហារនេះ ក្រសួងការពារជាតិអាហ្វហ្កានីស្ថានប្រកាសថាខ្លួននឹងឆ្លើយតបដោយសមាមាត្រ។ ចាប់តាំងពីក្រុមតាលីបង់ឡើងកាន់អំណាចកាលពីឆ្នាំ២០២១ ប៉ាគីស្ថាន និងអាហ្វហ្កានីស្ថានកាន់តែមានទំនាក់ទំនងល្វីងជូរចត់នឹងគ្នាកាន់តែខ្លាំងឡើងៗ។ អង្គការសហប្រជាជាតិអះអាងថាយុទ្ធនាការវាយប្រហាររបស់យោធាប៉ាគីស្ថានទៅលើអាហ្វាហ្កានីស្ថានចាប់ពីខែតុលាដល់ខែធ្នូ ឆ្នាំ២០២៥ បានសម្លាប់ជនស៊ីវិល៧០នាក់៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ