ទីក្រុងវ៉ាស៊ីនតោន៖ លោកត្រាំព្រមានថាអាមេរិកអាចនឹងចាប់ផ្ដើមវាយប្រហារអ៊ីរ៉ង់មានកម្រិតកំណត់នាពេលឆាប់ៗនេះទោះបីប្រមុខការទូតអ៊ីរ៉ង់អះអាងថាខ្លួនកំពុងរៀបចំសេចក្ដីព្រាងនៃកិច្ចព្រមព្រៀងនុយក្លេអ៊ែរដែលនឹងរួចរាល់នៅក្នុងរយៈពេលពីរបីថ្ងៃខាងមុខនេះក៏ដោយ។ នៅពេលអ្នកសារព័ត៌មានសួរថាតើអាមេរិកអាចនឹងប្រើចំណាត់ការយោធាមានកម្រិតកំណត់ទៅលើអ៊ីរ៉ង់ដែរឬទេនៅពេលកំពុងចរចាគ្នា? លោកត្រាំឆ្លើយតបថាលោកកំពុងពិចារណាទៅលើបញ្ហានេះ។ ប៉ុន្មានម៉ោងក្រោយមក លោកថាអ៊ីរ៉ង់គួរណាស់ប្រញាប់ចរចាឱ្យចេញជាកិច្ចព្រមព្រៀង។
រដ្ឋមន្ត្រីការបរទេសអ៊ីរ៉ង់ថ្លែងនៅក្នុងបទសម្ភាសថ្មីៗនេះថាប្រទេសរបស់លោកកំពុងរៀបចំសេចក្ដីព្រាងនៃកិច្ចព្រមព្រៀងនុយក្លេអ៊ែរ អាចនឹងរួចនរាល់ត្រឹមរយៈពេលពីរ ឬបីថ្ងៃខាងមុខ។ បន្ទាប់មកនឹងបញ្ជូនសំណើនេះទៅទីក្រុងវ៉ាស៊ីនតោនដើម្បីពិនិត្យមើល។ លោកអារ៉ាក់ឈីគិតថាមិនយូរទេ យ៉ាងខ្លាំងត្រឹមមួយសប្ដាហ៍ ឬយូរជាងនេះបន្តិចបន្តួច យើងអាចចាប់ផ្ដើមចរចាគ្នាជាថ្មី លើកនេះត្រូវមានភាពហ្មត់ចត់ និងប្រាកដនិយម។
ភាពតានតឹងរវាងប្រទេសគូសត្រូវដ៏យូរអង្វែងទាំង២ចាប់ផ្ដើមឡើងកម្ដៅកាន់តែខ្លាំងឡើងៗនៅពេលរដ្ឋបាលរបស់លោកដូណាល់ត្រាំទាមទារឱ្យអ៊ីរ៉ង់ធ្វើសម្បទាននៅក្នុងការចរចាគ្នា និងនៅពេលយោធាអាមេរិកបន្តបញ្ជូនកងទ័ព និងគ្រឿងសព្វាវុធទៅតំបន់មជ្ឈិមបូព៌ាកាន់តែច្រើនឡើងៗដើម្បីត្រៀម។ បើការចរចាបរាជ័យ សង្គ្រាមអាចនឹងផ្ទុះឡើងដោយជៀសមិនរួច។ គេឃើញថាអាមេរិកបញ្ជូននាវាចម្បាំង និងយន្តហោះទៅទីនោះជាបន្តបន្ទាប់។
កាលពីថ្ងៃសុក្រ នាវាដឹកយន្តហោះយូអែសអែស ជើរ៉លហ្វត (USS Gerald Ford) បានបើកឆ្លងកាត់ច្រកសមុទ្រជីប្រាល់តា (Gibraltar) និងបើកចូលសមុទ្រមេឌីទែរ៉ាណេ។ អ៊ីរ៉ង់ និងអាមេរិកបានឱ្យសញ្ញាថាពួកគេត្រៀមខ្លួនដើម្បីធ្វើសង្គ្រាមបើសិនការចរចានុយក្លេអ៊ែរបរាជ័យ។ ប្រមុខការទូតអ៊ីរ៉ង់អះអាងថារដ្ឋាភិបាលរបស់លោកចង់ដោះស្រាយបញ្ហាតាមមធ្យោបាយការទូត។ ប៉ុន្តែលោកក៏សូមព្រមានផងដែរថាត្រៀមខ្លួនរួចហើយដើម្បីធ្វើសង្គ្រាម។
អ្នកវិភាគអំពីបញ្ហាអ៊ីរ៉ង់ លោកអាលី វេស (Ali Vaez) ថ្លែងថាបើសិនគេប្រើប្រាស់កម្លាំងយោធាមកលើខ្លួន អ៊ីរ៉ង់មិននៅស្ងៀមទេព្រោះបញ្ហានេះពាក់ព័ន្ធនឹងជោគវាសនាស្លាប់-រស់របស់ខ្លួន។ លោកយល់ថាថ្នាក់ដឹកនាំអ៊ីរ៉ង់មិនមែននិយាយលេងសើចទេនៅពេលពួកគេប្រកាសឆ្លើយតបវិញបើអាមេរិកប្រើកម្លាំងយោធា។ ពួកគេនៅតែមានជំនឿថាទោះបីអាមេរិកប្រើវិធានការយោធាក៏ពួកគេនៅតែបន្តកាន់អំណាចនៅអ៊ីរ៉ង់ដដែល៕ ប្រភព៖ អេភី និងប្រភពដទៃទៀត
ចែករំលែកព័តមាននេះ