រាជធានីភ្នំពេញ ៖ ក្មេងទំនើង២នាក់ ត្រូវបានកម្លាំងនគរបាលខណ្ឌដង្កោ និងនគរបាលប៉ុស្តិ៍ដង្កោឃាត់ខ្លួនបានជាបន្តបន្ទាប់រយៈពេល៥ថ្ងៃ ក្រោយពីធ្វើសកម្មភាពដេញតាមកាប់ទៅលើក្មេងប្រុសម្នាក់ ដោយចោទថា ឌឺដងដាក់ពួកខ្លួន ។ ប៉ុន្តែកាប់អត់បាននោះឡើយ…
រាជធានីភ្នំពេញ ៖ ក្មេងទំនើង២នាក់ ត្រូវបានកម្លាំងនគរបាលខណ្ឌដង្កោ និងនគរបាលប៉ុស្តិ៍ដង្កោឃាត់ខ្លួនបានជាបន្តបន្ទាប់រយៈពេល៥ថ្ងៃ ក្រោយពីធ្វើសកម្មភាពដេញតាមកាប់ទៅលើក្មេងប្រុសម្នាក់ ដោយចោទថា ឌឺដងដាក់ពួកខ្លួន ។ ប៉ុន្តែកាប់អត់បាននោះឡើយ ដោយសារក្មេងប្រុសរូបនោះរត់ចោលម៉ូតូឲ្យអ្នកភូមិជួយ ហើយក្មេងស្ទាវទំនើង២នាក់ខាងលើ ក៏កាប់បំផ្លាញម៉ូតូ ដើម្បីបញ្ចេញកំហឹង បណ្ដាលឲ្យរងការខូចខាតតែម្ដង ។
ក្មេងទំនើងទី១-ឈ្មោះសេង ច័ន្ទម៉េងហុង អាយុ១៥ឆ្នាំ ជនជាតិខ្មែរ ជាសិស្ស មានទីលំនៅភូមិ៦ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។ នគរបាលឃាត់ខ្លួនកាលពីវេលាម៉ោង៨យប់ ថ្ងៃទី១៨ ខែកុម្ភៈ ឆ្នាំ២០២៦ នៅតាមផ្លូវបេតុង ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ ។ ទី២-ឈ្មោះ រឹម ដាវីន អាយុ១៦ឆ្នាំ ត្រូវនគរបាលឃាត់ខ្លួនវេលាម៉ោង១១ព្រឹក ថ្ងៃទី១៩ ខែកុម្ភៈ ឆ្នាំ២០២៦ ឃាត់ខ្លួននៅតាមផ្លូវបេតុងក្នុងបុរី ហុក ឆេង ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ ។
ដោយឡែក ក្មេងប្រុសរងគ្រោះឈ្មោះ ញ៉េប ច័ន្ទសុធិវ័ន្ត អាយុ១៦ឆ្នាំ មុខរបរសិស្ស មានទីលំនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។ រីឯម៉ូតូដែលត្រូវកាប់បំផ្លាញនោះ ម៉ាកHONDA SUPER CUB ពណ៌ខ្មៅ ពាក់ស្លាកលេខ កណ្តាល 1AU-7375 រងការខូចខាតកុងទ័រ ។
នគរបាលបានប្រាប់ថា ហេតុការណ៍នោះបានកើតឡើង កាលពីវេលាម៉ោង១២និង០២នាទីរសៀលថ្ងៃទី១៣ ខែកុម្ភៈ ឆ្នាំ២០២៦ នៅតាមផ្លូវបេតុងក្នុងផ្សារសំបួរមាស ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ដោយនៅមុនពេលកើតហេតុ ក្មេងប្រុសរងគ្រោះបានជិះម៉ូតូ១គ្រឿងខាងលើ ចេញពីផ្ទះក្នុងគោលបំណងទៅទិញអាហារហូបនៅផ្សារសំបួរមាស ហើយពេលទៅដល់បានជិះកាត់មុខក្រុមក្មេងស្ទាវ១ក្រុមមាន ដែលមានគ្នាប្រមាណ២០នាក់ និងម៉ូតូប្រមាណ១០គ្រឿង កំពុងអង្គុយនៅក្នុងតូបលក់ចាបហួយមួយកន្លែងនៅផ្សារនោះ ។
នគរបាលបានប្រាប់ឲ្យដឹងបន្តថា ខណៈនោះ ស្រាប់តែក្មេងស្ទាវទំនើង២នាក់ ដែលស្ថិតនៅក្នុងចំណោមក្រុមក្មេងស្ទាវប្រមាណ២០នាក់ខាងលើ ក៏បានជិះម៉ូតូ០១គ្រឿងម៉ាកHONDA SCOOPY ពណ៌ស មិនចាំស្លាកលេខ ប្រដាប់ដោយកាំបិតបុ័ងតា ដេញតាមកាប់ក្មេងប្រុសរងគ្រោះ ។ ពេលនោះ ដោយសារតែភិតភ័យខ្លាចមានគ្រោះថ្នាក់ដល់ជីវិត ក្មេងប្រុសរងគ្រោះ ក៏បានឈប់ម៉ូតូរត់ឲ្យអ្នកភូមិជួយទើបរួចខ្លួន បន្ទាប់មក ក្មេងទំនើងនោះក៏កាប់បំផ្លាញម៉ូតូ ហើយក្មេងប្រុសរងគ្រោះបានទាញដំបងនៅជិតខ្លួនគបសំដៅក្មេងទំនើង ទើបពួកគេឈប់កាប់រួចបានជិះម៉ូតូគេចខ្លួនបាត់តែម្ដង ប៉ុន្តែម៉ូតូជនរងគ្រោះបានខូចខាតកុងទ័រ ។
នគរបាលបានបញ្ជាក់ប្រាប់ថា ក្រោយពេលកើតហេតុ ក្មេងប្រុសរងគ្រោះបានទូរស័ព្ទប្រាប់ពូជីដូនមួយរបស់ខ្លួនឈ្មោះ ជា ស្រេង អាយុ៤៤ឆ្នាំ ឲ្យបានដឹងពីសាច់រឿងខាងលើ ហើយនៅវេលាម៉ោង០៨ព្រឹកថ្ងៃទី១៤ ខែកុម្ភៈ ឆ្នាំ២០២៦ បុរសជាពូក៏បានជូនក្មេងប្រុសរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ ។
បន្ទាប់មក នគរបាលបានធ្វើការស្រាវជ្រាវ រហូតដល់ថ្ងៃទី១៨ ខែកុម្ភៈ ឆ្នាំ២០២៦ វេលាម៉ោង៨យប់ ទើបឈានដល់ការឃាត់ខ្លួនជនសង្ស័យបាន០១នាក់ឈ្មោះ សេង ច័ន្ទម៉េងហុង បន្ទាប់មកទៀតនៅថ្ងៃទី១៩ ខែកុម្ភៈ ឆ្នាំ២០២៦ វេលាម៉ោង១១និង១០នាទី ក៏បានឃាត់ខ្លួនជនសង្ស័យឈ្មោះ រឹម ដាវីន ម្នាក់ទៀត រួចនាំទៅសាកសួរនៅប៉ុស្តិ៍ដង្កោ ដើម្បីចាត់ការតាមច្បាប់។
នគរបាលខាងលើ បានប្រាប់ឲ្យដឹងបន្ថែមទៀតថា ក្រោយពេលឃាត់ខ្លួននាំទៅសាកសួរក្មេងទំនើងខាងលើបានសារភាពថា ពួកខ្លួនពិតជាបានធ្វើសកម្មភាពយកកាំបិតបុ័ងតោកាប់ម៉ូតូរបស់ក្មេងប្រុសរងគ្រោះពិតប្រាកដមែន ។ មូលហេតុដែលឈានដល់ការដេញកាប់នោះ គឺដោយសារតែខឹងជនរងគ្រោះជិះម៉ូតូកាត់តាមកន្លែងដែលពួកខ្លួនអង្គុយលេងហើយ បានថែមទាំងនិយាយឌឺដងចង់បង្ករឿងជាមួយក្រុមរបស់ខ្លួនទៀត ៕
ចែករំលែកព័តមាននេះ