ទីក្រុងវ៉ាស៊ីនតោន៖ សង្គ្រាមវោហារសាស្ត្ររវាងអ៊ីរ៉ង់ និងអាមេរិកចាប់ផ្ដើមកើតឡើងយ៉ាងផុសផុល។ បន្ទាប់ពីលោកដូណាល់ត្រាំព្រមានថាត្រៀមវាយប្រហារអ៊ីរ៉ង់បើមិនព្រមចរចាឱ្យចេញជាកិច្ចព្រមព្រៀងនុយក្លេអ៊ែរទេ អ៊ីរ៉ង់ព្រមានបកទៅវិញថាឱ្យតែហ៊ានវាយខ្លួន ខ្លួននឹងវាយមូលដ្ឋានយោធារបស់អាមេរិកនៅទូទាំងតំបន់មជ្ឈិមបូព៌ា។ តើសង្គ្រាមវោហារសាស្ត្រអាចក្លាយជាសង្គ្រាមប្រដាប់អាវុធដែរឬទេ? យើងនឹងរង់ចាំអ៊ុតស្ថានការណ៍ទាំងអស់គ្នា។
នៅក្នុងលិខិតផ្ញើជូនអគ្គលេខាធិការអង្គការសហប្រជាជាតិ អ៊ីរ៉ង់អះអាងថាជំហររបស់ខ្លួនគឺមិនចង់មានភាពតានតឹង ឬមានសង្គ្រាមជាមួយនឹងប្រទេសណាទេ។ អ៊ីរ៉ង់នឹងមិនចាប់ផ្ដើមផ្ទុះអាវុធមុនជាដាច់ខាត។ ប៉ុន្តែអ៊ីរ៉ង់ចង់បង្ហាញថាខ្លួនមិនចុះញ៉មប្រទេសដទៃទេបើសិនគេហ៊ានប្រព្រឹត្តអំពើឈ្លានពានមកលើខ្លួន។ អ៊ីរ៉ង់បញ្ជាក់ថាខ្លួននឹងវាយបកវិញឱ្យស្មើកម្លាំងគ្នានឹងអ្វីដែលគេបានវាយមកលើខ្លួន។ អ៊ីរ៉ង់អះអាងខ្លួនមានសិទ្ធិការពារខ្លួនស្របតាមមាត្រា៥១នៃធម្មនុញ្ញអង្គការសហប្រជាជាតិ។
អ៊ីរ៉ង់ចាត់ទុកការប្រើភាសាគំរាមកំហែងពីសំណាក់ប្រទេសអាមេរិកនោះជាការត្រៀមប្រើប្រាស់អំពើឈ្លានពានផ្នែកយោធា។ អ៊ីរ៉ង់ប្រមើលឃើញថាផលវិបាកនៃចំណាត់ការយោធារបស់អាមេរិកនេះនឹងបង្កមហន្តរាយយ៉ាងធំធេងសម្រាប់តំបន់មជ្ឈិមបូព៌ា ហើយអាចជាការគំរាមកំហែងយ៉ាងធ្ងន់ធ្ងរទៅលើសន្តិភាព និងសន្តិសុខសាកលលោក។ លិខិតរបស់អ៊ីរ៉ង់សូមអំពាវនាវឱ្យមានការធ្វើអន្តរាគមន៍នៅក្នុងរឿងនេះ។
អ៊ីរ៉ង់ស្នើឱ្យក្រុមប្រឹក្សាសន្តិសុខអង្គការសហប្រជាជាតិ និងអគ្គលេខាធិការអង្គការនេះចាត់វិធានការដោយឥតបង្អែបង្អង់ដើម្បីទប់ស្កាត់រឿងនេះនៅពេលដែលមិនទាន់ហួសពេល។ ទោះបីចេញសេចក្ដីព្រមានយ៉ាងនេះក្ដី អ៊ីរ៉ង់ថ្លែងថាខ្លួននៅតែមិនទាន់បោះបង់ចោលការប្រើប្រាស់នយោបាយការទូតនោះទេ។ អ៊ីរ៉ង់ថាខ្លួនចូលរួមចរចានុយក្លេអ៊ែរជាមួយអាមេរិកប្រកបដោយការស្ថាបនា និងទឹកចិត្តស្មោះស៕ ប្រភព៖ ហ្វ្រង់២៤ (France 24 និងប្រភពដទៃទៀត
ចែករំលែកព័តមាននេះ