ទីក្រុងបាងកក៖ មានករណីជនជាតិបរទេសធ្លាក់ពីលើអគារកម្ពស់១៨ជាន់នៅទីក្រុងប៉ាតាយ៉ា ប្រទេសថៃ។ សមត្ថកិច្ចផ្នែកកោសល្យវិច័យអះអាងថាមិនទាន់រកឃើញសញ្ញាថាសំណុំរឿងនេះពាក់ព័ន្ធនឹងអំពើឃាតកម្មទេ។ ជនរងគ្រោះឈ្មោះក្វេនធីន គ្រីហ្វហ្វីស (Quentin Griffiths) ជាសហស្ថាបនិកក្រុមហ៊ុនលក់សំលៀកបំពាក់របស់អង់គ្លេសមួយឈ្មោះអេសុះ (Asos)។…
ទីក្រុងបាងកក៖ មានករណីជនជាតិបរទេសធ្លាក់ពីលើអគារកម្ពស់១៨ជាន់នៅទីក្រុងប៉ាតាយ៉ា ប្រទេសថៃ។ សមត្ថកិច្ចផ្នែកកោសល្យវិច័យអះអាងថាមិនទាន់រកឃើញសញ្ញាថាសំណុំរឿងនេះពាក់ព័ន្ធនឹងអំពើឃាតកម្មទេ។ ជនរងគ្រោះឈ្មោះក្វេនធីន គ្រីហ្វហ្វីស (Quentin Griffiths) ជាសហស្ថាបនិកក្រុមហ៊ុនលក់សំលៀកបំពាក់របស់អង់គ្លេសមួយឈ្មោះអេសុះ (Asos)។
នគរបាលផ្នែកស៊ើបអង្កេតប្រាប់ទូរទស្សន៍ប៊ីប៊ីស៊ីថាសមត្ថកិច្ចបានទទួលការហៅទូរស័ព្ទថាមានបុរសម្នាក់ត្រូវគេប្រទះឃើញស្លាប់។ គាត់ធ្លាក់ពីលើអគារខុនដូកម្ពស់១៨ជាន់នៅទីក្រុងប៉ាតាយ៉ា។ ជនរងគ្រោះឈ្មោះគ្រីហ្វហ្វីសមានវ័យ៥៨ឆ្នាំកាន់លិខិតឆ្លងដែនអង់គ្លេស។ នៅពេលធ្លាក់ពីលើអគារនោះ គាត់រស់នៅតែម្នាក់ឯង។ លទ្ធផលកោសល្យវិច័យបង្ហាញថាគ្មានអំពើឃាតកម្មកើតឡើងទៅលើរូបគាត់ទេ។ ចំណែកបន្ទប់ស្នាក់នៅរបស់គាត់ក៏គ្មានសញ្ញាថាមានអ្នកដទៃចូលដែរ។
សហគ្រិនផ្នែកលក់ទំនិញម្នាក់នេះជាសហស្ថាបនិកក្រុមហ៊ុនអេសុះដែលមានទីស្នាក់ការនៅទីក្រុងឡុង ចក្រភពអង់គ្លេស កាលពីអំឡុងឆ្នាំ២០០០ជាមួយនីក រ៉ូបឺតសុន (Nick Robertson)។ ក្រុមហ៊ុននេះមុនដំបូងឈ្មោះ As Seen On Screen ក្រោយមកបង្រួមទៅជា Asos វិញ។ វាក្លាយជាក្រុមហ៊ុនលក់សំលៀកបំពាក់អនឡាញដ៏ធំបំផុតមួយនៅលើសាកលលោក។ ផលិតផលរបស់ក្រុមហ៊ុនសុទ្ធតែប្រើប្រាស់ដោយបុគ្គលល្បីៗដូចជារីហាណា (Rihanna) និងអតីតជំទាវទី១អាមេរិក លោកស្រីមីឆែល អូបាម៉ាជាដើម។
លោកគ្រីហ្វហ្វ៊ីសចាកចេញពីក្រុមហ៊ុននេះនៅឆ្នាំ២០០៥។ លោកក៏សាកល្បងបើកក្រុមហ៊ុនរកស៊ីហ៊ុនគ្នា និងជាសហស្ថាបនិកក្រុមហ៊ុនគ្រឿងសង្ហារិមឈ្មោះអាឈីកា (Achica), ក្រុមហ៊ុន EBTM និងអាឌីលី (Adili)។ ក្រោយមក EBTM ប្រកាសក្ស័យទុន ចំណែកអាឌីលីលក់ទៅឱ្យអ្នកដែលចង់សេងបន្តនៅក្នុងតម្លៃនិមិត្តរូបមួយផោន។ ពាក់ព័ន្ធនឹងការស្លាប់របស់គាត់ នគរបាលថៃប្រាប់ប៊ីប៊ីស៊ីថាលោកគ្រីហ្វហ្វ៊ីសកំពុងជាប់បណ្ដឹងនៅតុលារចំនួន២សំណុំរឿង។ ប្រហែលជាដោយសារបញ្ហានេះ ធ្វើឱ្យគាត់ស្ត្រែសខ្លាំង ដូច្នេះ ក៏លោតពីលើខុនដូដើម្បីបញ្ចប់ជីវិត៕ ប្រភព៖ ដឹហ្កាឌាន (The Guardian)
ចែករំលែកព័តមាននេះ