ខេត្តមណ្ឌលគិរី ៖ មន្ទីរធនធានទឹក និងឧតុនិយមខេត្តមណ្ឌលគិរី កាលពីឆ្នាំ២០២៥កន្លងទៅ បានអភិវឌ្ឍហេដ្ឋារចនាសម្ព័ន្ធធារាសាស្ត្រ និងការគ្រប់គ្រងធនធានទឹក ដើម្បីបម្រើឱ្យវិស័យកសិកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋក្នុងខេត្តភាគឦសានមួយនេះ។ យោងតាមរបាយការណ៍ដែលកោះសន្តិភាពទទួលបានថ្មីៗនេះ…
ខេត្តមណ្ឌលគិរី ៖ មន្ទីរធនធានទឹក និងឧតុនិយមខេត្តមណ្ឌលគិរី កាលពីឆ្នាំ២០២៥កន្លងទៅ បានអភិវឌ្ឍហេដ្ឋារចនាសម្ព័ន្ធធារាសាស្ត្រ និងការគ្រប់គ្រងធនធានទឹក ដើម្បីបម្រើឱ្យវិស័យកសិកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋក្នុងខេត្តភាគឦសានមួយនេះ។
យោងតាមរបាយការណ៍ដែលកោះសន្តិភាពទទួលបានថ្មីៗនេះ ក្នុងរយៈពេលពេញមួយឆ្នាំ២០២៥ មន្ទីរធនធានទឹក បានសម្រេចនូវគម្រោងសំខាន់ៗជាច្រើន រួមមាន៖
-បានជួសជុល និងថែទាំទំនប់ដីចំនួន ៥ខ្សែ ប្រវែង ៨.៧៨០ ម៉ែត្រ នៅឃុំស្រែហ៊ុយ ឃុំអបួនលើ ឃុំរយ៉ និងឃុំស្រែសង្គម ស្រុកកោះញែក។
-បានជួសជុល និងស្តារប្រឡាយមេចំនួន ៦ខ្សែ ប្រវែង ១៣.៧៤៥ ម៉ែត្រ នៅឃុំស្រែហ៊ុយ ឃុំអបួនលើ ឃុំរយ៉ និងឃុំស្រែសង្គម ស្រុកកោះញែក។
-បានជួសជុល និងស្តារប្រឡាយរងចំនួន ៤ខ្សែ ប្រវែង ៣.៧៥០ ម៉ែត្រ នៅឃុំស្រែហ៊ុយ ស្រុកកោះញែក។
-បានជួសជុលទ្វារទឹកចំនួន ៣កន្លែង ទំនប់អូរយ៉េះ ឃុំស្រែសង្គម ស្រុកកោះញែក។
របាយការណ៍ដដែលបញ្ជាក់ថា បច្ចុប្បន្នទូទាំងខេត្តមានប្រព័ន្ធធារាសាស្ត្រសរុបចំនួន ១៦ កន្លែង ដែលកំពុងផ្តល់លទ្ធភាពស្រោចស្រពលើផ្ទៃដីកសិកម្មបានរាប់ពាន់ហិកតា។
ក្រៅពីការសាងសង់ មន្ទីរក៏បានយកចិត្តទុកដាក់លើការងារបច្ចេកទេស និងសហគមន៍ ដោយបានបន្តពង្រឹង និងគ្រប់គ្រងសហគមន៍ចំនួន ០២ កន្លែង ដើម្បីធានាការបែងចែកទឹកឱ្យមានតម្លាភាព និងប្រសិទ្ធភាព។បានតាមដាន និងផ្សព្វផ្សាយព្រឹត្តិបត្រព័ត៌មានស្ថានភាពអាកាសធាតុបានចំនួន ៣៦៥ លើក (ជារៀងរាល់ថ្ងៃ) ដល់អាជ្ញាធរ និងពលរដ្ឋ ដើម្បីបង្ការគ្រោះធម្មជាតិ។
ទោះបីជាទទួលបានជោគជ័យ ប៉ុន្តែមន្ទីរក៏បានកត់សម្គាល់នូវបញ្ហាប្រឈមមួយចំនួន ដូចជាការខ្វះខាតមធ្យោបាយធ្វើដំណើរសម្រាប់ចុះមូលដ្ឋានដាច់ស្រយាល និងកញ្ចប់ថវិកាសម្រាប់ការងារជួសជុលបន្ទាន់នៅមានកម្រិត។សម្រាប់ទិសដៅឆ្នាំ២០២៦ មន្ទីរបានដាក់ចេញនូវផែនការយុទ្ធសាស្ត្រ រួមមាន បន្តតាមដាន និងព្យាករណ៍ស្ថានភាពទឹកជំនន់ និងរាំងស្ងួតឱ្យបានហ្មត់ចត់។ជំរុញការងារចុះបញ្ជីដីធ្លីអាងទឹក និងសំណង់ធារាសាស្ត្រ ដើម្បីការពារការរំលោភបំពាន។បន្តស្វែងរកកិច្ចសហការជាមួយដៃគូអភិវឌ្ឍន៍ ដើម្បីពង្រីកប្រព័ន្ធស្រោចស្រពឱ្យកាន់តែទូលំទូលាយ។
សកម្មភាពទាំងអស់នេះ សបញ្ជាក់ឱ្យឃើញពីការប្តេជ្ញាចិត្តរបស់មន្ទីរធនធានទឹក និងឧតុនិយមខេត្តមណ្ឌលគិរី ក្នុងនាមជាសេនាធិការរបស់រាជរដ្ឋាភិបាល ក្នុងការធានាឱ្យបាននូវ «ទឹក» សម្រាប់បម្រើដល់ការអភិវឌ្ឍសេដ្ឋកិច្ច និងជីវភាពរស់នៅរបស់ប្រជាពលរដ្ឋប្រកបដោយចីរភាព៕
ចែករំលែកព័តមាននេះ