រដ្ឋបាលក្រុងស្ទឹងត្រែង ចុះអប់រំណែនាំសិស្ស ១៦នាក់ ដែលគេចសាលាទៅប្រមូលផ្តុំគ្នានៅខ្យូសស្បូវ
ខេត្តស្ទឹងត្រែង ៖ នាថ្ងៃត្រង់ ថ្ងៃទី១៨ ខែកុម្ភៈ ឆ្នាំ២០២៦ គណៈបញ្ជាការឯកភាពរដ្ឋបាលក្រុងស្ទឹងត្រែង ដឹកនាំដោយលោក ថាវ ប៊ុនថេន…
ខេត្តស្ទឹងត្រែង ៖ នាថ្ងៃត្រង់ ថ្ងៃទី១៨ ខែកុម្ភៈ ឆ្នាំ២០២៦ គណៈបញ្ជាការឯកភាពរដ្ឋបាលក្រុងស្ទឹងត្រែង ដឹកនាំដោយលោក ថាវ ប៊ុនថេន អភិបាលរងក្រុង និងជាអនុប្រធានគណៈបញ្ជាការឯកភាព បានចុះអនុវត្តវិធានការរដ្ឋបាលដោយផ្ទាល់ ដើម្បីត្រួតពិនិត្យ និងឃាត់ខ្លួនសិស្សានុសិស្សចំនួន ១៦នាក់ ដែលបានគេចសាលាមកប្រមូលផ្តុំគ្នានៅចំណុចខ្យូសស្បូវ តាមបណ្តោយផ្លូវចូលភូមិហាងខូបាន សង្កាត់សាមគ្គី ។
យោងតាមការសង្កេត និងសេចក្តីរាយការណ៍ ក្រុមក្មេងៗទាំងនេះមិនត្រឹមតែបោះបង់ការសិក្សានៅក្នុងម៉ោងរៀនប៉ុណ្ណោះទេ ប៉ុន្តែថែមទាំងបានប្រព្រឹត្តសកម្មភាពអវិជ្ជមានមួយចំនួន រួមមានការបើកបរម៉ូតូល្បឿនលឿន និងបង្ហោះម៉ូតូ ដែលអាចបង្កគ្រោះថ្នាក់ដល់ខ្លួនឯង និងអ្នកធ្វើដំណើរដទៃ។ ការជក់បារី និងការជួបជុំគ្នាមិនត្រឹមត្រូវ ដែលអាចឈានទៅរកការប្រើប្រាស់គ្រឿងញៀន ឬអំពើអបាយមុខផ្សេងៗទៀត ។
ចំពោះការសេពគប់មិត្តភក្តិមិនល្អ នាំឱ្យបោះបង់ចោលចំណេះដឹង ដែលជាស្ពានចម្លងទៅកាន់អនាគត។ បន្ទាប់ពីការឃាត់ខ្លួន អាជ្ញាធរក្រុងបានចាត់វិធានការណ៍ក្តៅ រួមមានការធ្វើកិច្ចសន្យាបញ្ឈប់សកម្មភាព និងការហៅមាតាបិតា ឬអាណាព្យាបាលមកទទួលស្គាល់កំហុស និងធានាដឹងឮ ដើម្បីនាំកូនចៅត្រឡប់ទៅលំនៅឋានវិញ ។
អាជ្ញាធរបានសង្កត់ធ្ងន់ថា ការអប់រំមិនមែនជាភារកិច្ចរបស់សាលារៀន ឬអាជ្ញាធរតែម្នាក់ឯងនោះទេ វាទាមទារឱ្យមានការចូលរួមយ៉ាងសកម្មពីសំណាក់មាតាបិតា ក្នុងការតាមដានសកម្មភាពកូនចៅឱ្យបានដិតដល់ ដើម្បីបង្ការពួកគេពីការធ្លាក់ចូលក្នុងអំពើអបាយមុខ ដែលបំផ្លាញទាំងសុខភាព អនាគត និងកិត្តិយសគ្រួសារ ។
ដូច្នេះសូមក្មួយៗសិស្សានុសិស្សទាំងអស់ ចងចាំថា “ចំណេះវិជ្ជាគឺជាទ្រព្យជាប់ខ្លួនដែលគ្មាននរណាលួចបាន”។ ការសប្បាយក្នុងវ័យសិក្សាដោយការបំពានច្បាប់ និងគេចសាលា គឺជាការបំផ្លាញខ្លួនឯង។ សូមងាកមកខិតខំរៀនសូត្រ ធ្វើជាកូនល្អ សិស្សល្អ និងពលរដ្ឋល្អ ដើម្បីក្លាយជាសសរទ្រូងដ៏រឹងមាំសម្រាប់ប្រទេសជាតិ ៕
ចែករំលែកព័តមាននេះ