ខេត្តស្ទឹងត្រែង ៖ គ្រោះអគ្គិភ័យ ដែលបង្កឡើងដោយការផ្ទុះធុងបញ្ចូលហ្គាស បានកើតឡើងយ៉ាងរន្ធត់នៅយប់ថ្ងៃទី១៧ ខែកុម្ភៈ ឆ្នាំ២០២៦ ស្ថិតក្នុងភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង…
ខេត្តស្ទឹងត្រែង ៖ គ្រោះអគ្គិភ័យ ដែលបង្កឡើងដោយការផ្ទុះធុងបញ្ចូលហ្គាស បានកើតឡើងយ៉ាងរន្ធត់នៅយប់ថ្ងៃទី១៧ ខែកុម្ភៈ ឆ្នាំ២០២៦ ស្ថិតក្នុងភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង (ក្បែរមន្ទីរពេទ្យភូមិភាគ ២១) ។
ហេតុការណ៍នេះបានកើតឡើងនៅវេលាម៉ោងប្រមាណ ៦:៥០ នាទីយប់ ដោយផ្ដើមចេញពីការផ្ទុះធុងហ្គាស ខណៈពេលកំពុងបញ្ចូល។ ក្នុងគ្រោះថ្នាក់នេះ បានបណ្តាលឱ្យកូនប្រុសម្ចាស់ផ្ទះរងរបួសស្រាល។ ចំណែកស្ត្រីជាម្តាយ បានដួលសន្លប់នៅនឹងកន្លែង ដោយសារការភ័យរន្ធត់ខ្លាំងពេក។ភ្លាមៗនោះ រថយន្តសង្គ្រោះបន្ទាន់នៃមន្ទីរពេទ្យបង្អែកខេត្ត បានចុះទៅដល់ទីតាំងដើម្បីដឹកបញ្ជូនជនរងគ្រោះទៅសង្គ្រោះនៅមន្ទីរពេទ្យបានទាន់ពេលវេលា ។
នៅក្នុងប្រតិបត្តិការសង្គ្រោះនេះ គេឃើញវត្តមាន លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង បានចុះបញ្ជាផ្ទាល់ដល់កម្លាំងចម្រុះ រួមមានកម្លាំងស្នងការដ្ឋាននគរបាលខេត្ត (រថយន្តពន្លត់អគ្គិភ័យ) កម្លាំងកងរាជអាវុធហត្ថខេត្ត និងអាជ្ញាធរក្រុងស្ទឹងត្រែង ។
ជាលទ្ធផល កម្លាំងសមត្ថកិច្ចបានប្រើប្រាស់រថយន្តទឹកបាញ់ពន្លត់ និងទប់ស្កាត់ការរីករាលដាលបានទាំងស្រុង នៅយប់ថ្ងៃដដែល។
ចំពោះទំហំ នៃការខូចខាតទ្រព្យសម្បត្តិ និងមូលហេតុលម្អិតដែលនាំឱ្យផ្ទុះធុងហ្គាសនោះ សមត្ថកិច្ចជំនាញកំពុងធ្វើការត្រួតពិនិត្យ និងវាយតម្លៃបន្ថែម មុននឹងចេញរបាយការណ៍ផ្លូវការ ៕
ចែករំលែកព័តមាននេះ