ទីក្រុងណាយរ៉ូប៊ី៖ របាយការណ៍សម្ងាត់កាលពីពេលថ្មីៗនេះបង្ហាញថាប្រទេសរុស្ស៊ីបានដឹកជញ្ជូនជនជាតិកេនញ៉ាជាងមួយពាន់នាក់ចេញពីមាតុភូមិរបស់ពួកគេដើម្បីជួយកងទ័ពរុស្ស៊ីច្បាំងទល់នឹងអ៊ុយក្រែន។ ជនជាតិកេនញ៉ាទាំងនោះភាគច្រើនចាញ់ល្បិចកលរបស់គេ ហើយត្រូវគេល្បួងឱ្យចុះហត្ថលេខាលើកិច្ចសន្យាចូលបម្រើនៅក្នុងជួរកងទ័ព។ របាយការណ៍សម្ងាត់នេះត្រូវបានដាក់ជូនរដ្ឋសភាកេនញ៉ាដើម្បីពិនិត្យ។
ការស៊ើបអង្កេតរបស់សារព័ត៌មានមួយចំនួនរួមទាំងអត្ថបទស៊ើបអង្កេតដែលចុះផ្សាយដោយទីភ្នាក់ងារព័ត៌មានអាអែហ្វប៉េសុទ្ធតែបានអះអាងដូចៗគ្នាថារុស្ស៊ីព្យាយាមអូសទាញបុរសៗនៅអាហ្វ្រិកដោយសន្យាផ្ដល់ការងារល្អឱ្យពួកគេធ្វើ។ ប៉ុន្តែតាមពិត ពួកគេត្រូវបានបង្ខំឱ្យចូលសមរភូមិក្ដៅដែលត្រូវច្បាំងទល់នឹងអ៊ុយក្រែនទៅវិញ។ លទ្ធផលស៊ើបអង្កេតរួមគ្នារវាងទីភ្នាក់ងារចារកម្មជាតិកេនញ៉ា សហការជាមួយអគ្គនាយកដ្ឋានស៊ើបអង្កេតបទល្មើសបានសរសេរនៅក្នុងរបាយការណ៍ថាជនជាតិកេនញ៉ាលើសពីមួយពាន់នាក់ដែលត្រូវរុស្ស៊ីល្បួងទៅធ្វើសង្គ្រាមនៅអ៊ុយក្រែន។ ពោលគឺចំនួននេះច្រើនលើសពីចំនួន២០០នាក់ដែលអាជ្ញាធរឡើងរាយការណ៍កាលពីខែធ្នូ ឆ្នាំ២០២៥។
លោកគីម៉ានី អ៊ូឈុងវ៉ា (Kimani Ichung’wah) ជាប្រធានក្រុមភាគច្រើននៃរដ្ឋសភាថ្លែងថាជនជាតិកេនញ៉ាចាកចេញពីប្រទេសរបស់ខ្លួនដោយប្រើប្រាស់ទិដ្ឋាការជាអ្នកទេសចរ។ ប៉ុន្តែធាតុពិត ពួកគេទៅចូលរួមជាមួយកងទ័ពរុស្ស៊ីដោយធ្វើដំណើរកាត់តាមទីក្រុងអ៊ីស្តាន់ប៊ូល (Istanbul) ប្រទេសតួកគី និងកាត់ទីក្រុងអាប៊ូដាប៊ី ប្រទេសអារ៉ាប់រួម។ ដោយសារអាជ្ញាធរកេនញ៉ាចាប់ផ្ដើមរឹតបន្តឹងនៅតាមព្រលានយន្តហោះ ការជ្រើសរើសទាហានត្រូវរាលដាលទៅប្រទេសដទៃទៀតនៅទ្វីបអាហ្វ្រិកដើម្បីកុំឱ្យគេចាប់ថ្នាក់បាន។
លោកអ៊ីឈុងវ៉ាថ្លែងបន្តទៀតថាទីភ្នាក់ងារជ្រើសរើសបុគ្គលិកខុសច្បាប់នៅកេនញ៉ាឃុបឃិតគ្នាជាមួយបុគ្គលិកនៅព្រលានយន្តហោះ។ ថ្មីៗនេះ ជនជាតិកេនញ៉ាយ៉ាងតិច៣៩នាក់ត្រូវចូលដេកពេទ្យ, ២៨នាក់បាត់ខ្លួន និង៨៩នាក់បញ្ជូនទៅសមរភូមិក្ដៅនៅអ៊ុយក្រែន។ រដ្ឋមន្ត្រីការបរទេសកេនញ៉ា លោកមូសាលីយ៉ា មូដាវ៉ាឌី (Musalia Mudavadi) ត្រៀមធ្វើដំណើរទៅទីក្រុងម៉ូស្គូនៅខែមីនាដើម្បីពិភាក្សាអំពីបញ្ហានេះ។
រដ្ឋាភិបាលកេនញ៉ាប្រកាសថ្កោលទោសទង្វើនេះ និងចាត់ទុកថានេះជាការបញ្ជូនជនជាតិរបស់ខ្លួនទៅពាំងគ្រាប់កាំភ្លើងជំនួសគេ។ ឥឡូវនេះ មិនត្រឹមតែប្រទេសកេនញ៉ាមួយប៉ុណ្ណោះទេដែលប្រឈមនឹងបញ្ហានេះ សូម្បីតែប្រទេសដទៃទៀតដូចជាអ៊ូហ្កង់ដា (Uganda) និងអាហ្វ្រិកខាងត្បូង។ល។ ក៏ក្លាយជាគោលដៅដែលរុស្ស៊ីត្រូវការល្បួងទៅធ្វើសង្គ្រាមផងដែរបន្ទាប់ពីរុស្ស៊ីបានពលីជីវិតយុទ្ធជនអស់ច្រើនពេកនៅអ៊ុយក្រែន៕ ប្រភព៖ អារ៉ាប់ញូស៍ (Arab News) និងប្រភពដទៃទៀត
ចែករំលែកព័តមាននេះ