ទីក្រុងសេអ៊ូល៖ អតីតប្រធានាធិបតីកូរ៉េខាងត្បូង លោកយូនស៊ុកយូល ត្រូវតុលាការផ្ដន្ទាទោសឲ្យជាប់ពន្ធនាគារមួយជីវិតពីបទបះបោរប្រឆាំងនឹងរដ្ឋអំណាច។ ការកាត់ទោសនេះពាក់ព័ន្ធនឹងការដែលលោកប្រកាសច្បាប់អាជ្ញាសឹកកាលពីដើមខែធ្នូ ឆ្នាំ២០២៤រយៈពេល៦ម៉ោង។ កាលនោះ កងទ័ពបានដាក់កម្លាំងហ៊ុមព័ទ្ធវិមានរដ្ឋសភាជាច្រើនម៉ោង។ ប៉ុន្តែអ្នកតំណាងរាស្ត្រខ្លះនៅតែជម្នះចិត្តចូលទៅខាងក្នុងរដ្ឋសភាឲ្យបានដើម្បីកោះប្រជុំបន្ទាន់ប្រឆាំងនឹងច្បាប់អាជ្ញាសឹក។
តុលាការសាលាដំបូងទីក្រុងសេអ៊ូលសម្រេចផ្ដន្ទាទោសដូចខាងលើនេះបន្ទាប់ពីរដ្ឋអាជ្ញាបានដាក់ពាក្យប្ដឹង និងស្នើសុំឱ្យតុលាការកាត់ទោសប្រហារជីវិត។ រដ្ឋអាជ្ញាអះអាងថាលោកយូនស៊ុកយូលបានរំលោភធ្ងន់ធ្ងរបំផុតទៅលើសណ្ដាប់ធ្នាប់របស់ប្រទេសជាតិដូចដែលមានចែងនៅក្នុងរដ្ឋធម្មនុញ្ញ។ រដ្ឋអាជ្ញាថាលោកយូនបានចល័តកងទ័ពយ៉ាងច្រើនសន្ធឹកសន្ធាប់ដើម្បីដាក់បារ៉ាស់នៅតាមផ្លូវ និងហ៊ុមព័ទ្ធបរិវេណរដ្ឋសភា។ ទង្វើទាំងនេះត្រូវចាត់ទុកជាអំពើបះបោរប្រឆាំងនឹងសណ្ដាប់ធ្នាប់របស់ប្រទេសជាតិ។
ថ្ងៃនេះ គេឃើញលោកយូនស៊ុកយូលធ្វើដំណើរទៅដល់បន្ទប់សវនាការនៅក្នុងសំលៀកបំពាក់អាវខៀវក្រមៅ។ មួយម៉ោងក្រោយមក តុលាការក៏ប្រកាសសេចក្ដីសម្រេច។ អ្នកដែលជាប់ពាក់ព័ន្ធនឹងអំពើបះបោរ និងដែលបានចូលដៃជាមួយលោកយូនស៊ុកយូលនៅពេលនោះត្រូវតុលាការកាត់ទោស និងត្រៀមកាត់ទោសជាបន្តបន្ទាប់។ លោកហានដុកស៊ូ (Han Duck-soo) ដែលជាអតីតនាយករដ្ឋមន្ត្រីកូរ៉េខាងត្បូងកាលនោះត្រូវតុលាការកាត់ទោសឱ្យជាប់ពន្ធនាគារ២៣ឆ្នាំ។ អតីតរដ្ឋមន្ត្រីមហាផ្ទៃត្រូវជាប់ពន្ធនាគារ៧ឆ្នាំ។
ក្រោយការកាត់ទោសនេះ លោកយូនស៊ុកយូលមានសិទ្ធិប្ដឹងទាស់ទៅសាលាឧទ្ធរណ៍ទៀត។ លោកយូនអះអាងថាលោកមិនបានប្រព្រឹត្តខុសដូចការចោទប្រកាន់ទេ។ លោកថាមូលហេតុដែលលោកប្រកាសច្បាប់អាជ្ញាសឹកព្រោះចង់ទប់ទល់នឹងក្រុមដែលមានសមានចិត្តចំពោះកូរ៉េខាងជើង និងដែលព្យាយាមធ្វើឱ្យរបបដឹកនាំរបស់លោកជាប់គាំង។ ក្នុងនាមជាអតីតរដ្ឋអាជ្ញាកូរ៉េខាងត្បូង លោកយូនស៊ុកយូលធ្លាប់ហែលឆ្លងស្ថានភាពពិបាកៗជាច្រើន។
លោកធ្លាប់សន្យាអភិវឌ្ឍសេដ្ឋកិច្ចជាតិឱ្យរីកចម្រើនក្រោយការចាកផុតពីជំងឺកូវីដ១៩ ហើយលោកក៏ប្រកាន់ជំហរម៉ឺងម៉ាត់នៅចំពោះមុខនៃការគំរាមកំហែងផ្នែកអាវុធនុយក្លេអ៊ែរពីសំណាក់កូរ៉េខាងជើងផងដែរ។ ប៉ុន្តែនយោបាយរបស់លោកដើរខុសតែ១ជំហាន (ប្រកាសច្បាប់អាជ្ញាសឹក) ធ្វើឱ្យលោកធ្លាក់ទឹកងើបមុខលែងរួច៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ