ខេត្តកំពង់ស្ពឺ៖ ក្មេងប្រុសអាយុ២ឆ្នាំបានស្លាប់ភ្លាមៗនៅកន្លែងកើតហេតុ ខណៈដែលក្មេងតូចរូបនោះបានដើរឆ្លងផ្លូវជាតិលេខ៤ ហើយរថយន្តធុនធំដឹកអីវ៉ាន់បុកកិនពេញទំហឹង ក្រោយកើតហេតុរួចតៃកុងរថយន្តបានចតរថយន្តចោលរត់គេចខ្លួនបាត់។
ហេតុការណ៍រថយន្តធុនធំបុកកិនក្មេងតូចស្លាប់បានកើតឡើងកាលពីវេលាម៉ោង១០និង១៥នាទីព្រឹកថ្ងៃទី១៩ ខែកុម្ភៈ ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៩៣ ទៅលេខ៩៤ ស្ថិតនៅក្នុងភូមិចំការចេក ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា រថយន្ត១គ្រឿងខាងលើ ម៉ាកហ៊ីយ៉ាន់ដាយ ពណ៌ស លាយផ្ទៃមេឃ ពាក់ផ្លាកលេខ ភ្នំពេញ3D-7632 សណ្តោងរ៉ឺម៉កលេខភ្នំពេញ4A-1634 អ្នកបើកបរមិនទាន់ស្គាល់អត្តសញ្ញាណនៅឡើយទេ (បានចុះរត់គេចខ្លួនក្រោយកើតហេតុរួច) ។ ចំណែកក្មេងរងគ្រោះឈ្មោះ ជាម ថារ៉ូ ភេទប្រុស អាយុ២ឆ្នាំ (ស្លាប់ភ្លាមៗនៅកន្លែងកើតហេតុ) រស់នៅជាមួយម្តាយក្នុងភូមិទឹកចេញ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបាននិយាយឱ្យដឹងថា នៅមុនពេលកើតហេតុមានរថយន្ត០១គ្រឿង ម៉ាកហ៊ីយ៉ាន់ដាយ ពណ៌ស លាយផ្ទៃមេឃ ខាងលើបានបើកបរតាមបណ្តោយផ្លូវជាតិលេខ៤ពីទិសខាងកើតទៅទិសខាងលិច លុះពេលធ្វើដំណើរមកដល់ចំណុចកើតហេតុខាងលើបានបុកនិងកិនក្មេងម្នាក់ស្លាប់ភ្លាមៗនៅកន្លែងកើតហេតុ ខណៈក្មេងរងគ្រោះកំពុងដើរឆ្លងផ្លូវពីទិសខាងត្បូងទៅទិសខាងជើង ។ បន្ទាប់ពីកើតហេតុ អ្នកបើកបររថយន្តបានរត់គេចខ្លួនបាត់ស្រមោល។
ប្រជាពលរដ្ឋរស់នៅក្បែកកន្លែងកើតហេតុ និងសមត្ថកិច្ចលើកឡើងថា តើជាកំហុសរបស់អ្នកណា តៃកុងរថយន្ត ឬក្មេងតូចអាយុ២ឆ្នាំ ព្រោះតែក្មេងប្រុសតូចក្រោមការគ្រប់គ្រងរបស់ឪពុកម្តាយ ហេតុអ្វីបានជាបណ្តែតបណ្តោយឱ្យកូនតូចដើរឆ្លងផ្លូវម្នាក់ឯងបែបនេះ?
នគរបាលស្រុកភ្នំស្រួចបានបន្តថា ក្រោយកើតហេតុនគរបាលជំនាញបានចុះធ្វើការវាស់វែងនៅកន្លែងកើតហេតុ សពក្មេងប្រុសតូចអាយុ២ឆ្នាំ ប្រគល់ជូនឪពុកម្តាយយកទៅធ្វើបុណ្យតាមប្រពៃណី។
ចំពោះវត្ថុតាងរថយន្តធុនធំ នគរបាលជំនាញបានអូសយកមករក្សាទុកនៅអធិការដ្ឋាននគរបាលស្រុកភ្នំស្រួច បណ្តោះអាសន្នរង់ចាំធ្វើការដោះស្រាយ និងកសាងសំណុំរឿងចាត់ការបន្តតាមផ្លូវច្បាប់៕
ចែករំលែកព័តមាននេះ