ទីក្រុងហ្សឺណែវ៖ ការជួបគ្នាត្រីភាគីអាមេរិក រុស្ស៊ី និងអ៊ុយក្រែននៅប្រទេសស្វីសបានបិទបញ្ចប់កាលពីមុននេះបន្តិច។ លទ្ធផលគឺសូន្យ, ភាគីទាំង២ជួបគ្នាបានត្រឹមជួបគ្នាតែប៉ុណ្ណោះ។ បញ្ហាសំខាន់ៗជាអាយុជីវិតដូចជាបញ្ហាបូរណភាពទឹកដីជាដើមនៅតែដោះស្រាយមិនចេញដដែលព្រោះភាគីម្ខាងទាមទារឱ្យគេកាត់ទឹកដីមកឱ្យខ្លួនដើម្បីជាថ្នូរនឹងសន្តិភាព ខណៈដែលភាគីម្ខាងទៀតប្រកែកដាច់ខាតមិនព្រមធ្វើតាមការទាមទារនេះទេ។
ទីប្រឹក្សារបស់លោកពូទីនដែលបានដឹកនាំគណៈប្រតិភូខាងភាគីរុស្ស៊ី លោកវ៉្លាឌីមៀ មេឌីនស្គី (Vladimir Medinsky) ថ្លែងប្រាប់អ្នកសារព័ត៌មានថាការជួបគ្នារយៈពេល២ថ្ងៃនៅហ្សឺណែវជាការចរចាយ៉ាងពិបាក ប៉ុន្តែដូចជាការពិភាក្សាអំពីជំនួញ។ លោកអះអាងថាការជួបគ្នានៅវគ្គក្រោយនឹងរៀបចំនៅពេលអនាគតដ៏ខ្លីខាងមុខនេះ។ ប្រធានាធិបតីអ៊ុយក្រែន លោកហ្សេឡិនស្គី ក៏ទទួលស្គាល់ផងដែរថាការចរចាគ្នាទាំងប៉ុន្មានដងកន្លងមកនេះពិតជាពិបាក។
លោកចោទប្រកាន់ថារុស្ស៊ីជាអ្នកអូសបន្លាយការចរចាឱ្យកាន់តែយូរ។ ការចរចាគ្នាគួរណាស់ឈានដល់ដំណាក់កាលចុងក្រោយតាំងពីយូរយារណាស់មកហើយ។ បេសកជនពិសេសរបស់លោកត្រាំគឺលោកស្ទីវវីតខូស (Steve Witkoff) បង្ហោះសារនៅលើបណ្ដាញសង្គមថាកិច្ចខិតខំប្រឹងប្រែងរបស់ទីក្រុងវ៉ាស៊ីនតោនរយៈពេលមួយឆ្នាំកន្លងទៅនេះបានទទួលផ្លែផ្កាគួរឱ្យកត់សម្គាល់។ លោកថ្លែងតែត្រឹមនេះដោយមិនបញ្ជាក់ឱ្យបានលម្អិតទេ។
ទន្ទឹមនឹងការចរចាគ្នា ភាគីទាំង២បន្តយុទ្ធនាការយោធាយ៉ាងក្ដៅគគុកដដែល។ ជាពិសេស រុស្ស៊ីសម្រុកវាយប្រហារទីតាំងផលិតថាមពលរបស់អ៊ុយក្រែននៅរដូវរងា។ ត្រឹមតែប៉ុន្មានម៉ោងក្រោយពេលបិទបញ្ចប់ការជួបគ្នាថ្ងៃទីមួយ យោធារុស្ស៊ីបញ្ជូនដ្រូនទៅវាយប្រហារអ៊ុយក្រែន បណ្ដាលឱ្យស្លាប់ស្ត្រីម្នាក់, របួសកុមារីអាយុ៦ឆ្នាំ និងក្មេងទើបតែចេះដើរតេសតាសអាយុ១ខួបកន្លះ។ ហេតុការណ៍នេះកើតឡើងនៅទីក្រុងហ្សាប៉ូរីហ្សៀ (Zaporizhzhia)។
កាលពីយប់មិញ រុស្ស៊ីបាញ់មីស៊ីលផ្លោងមួយគ្រាប់ និងបញ្ជូនដ្រូន១២៦គ្រឿងទៅវាយប្រហារទីក្រុងតូច-ធំរបស់អ៊ុយក្រែន។ ពាក់ព័ន្ធនឹងការចរចាលើកនេះ អ្នកនាំពាក្យវិមានក្រឹមឡាំងថ្លែងថាបើនិយាយពេលនេះហាក់ដូចជាឆាប់រហ័សពេកក្នុងការសន្និដ្ឋានថាការចរចាលើកនេះទទួលបានលទ្ធផលបែបណា។ លោកពូទីនបានទទួលរបាយការណ៍ស្ដីពីការជួបគ្នាលើកនេះរួចហើយ៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ