ទីក្រុងឥស្លាមម៉ាបាត៖ មានហេតុការណ៍វាយប្រហារពីសំណាក់ជនប្រដាប់អាវុធ១ក្រុមទៅលើបុគ្គលិកយោធានៅប៉ាគីស្ថានបណ្ដាលឱ្យស្លាប់ទាហាន១១នាក់ និងកុមារម្នាក់។ សាក្សីនិយាយថាហេតុការណ៍នេះកើតឡើងនៅប៉ុស្តិ៍ឆែកឆេរមួយកន្លែង។ ជនប្រដាប់អាវុធខាងលើបានដាក់គ្រាប់បែកពេញក្នុងឡាន រួចបើកសំដៅទៅប៉ុស្តិ៍ឆែកឆេរដើម្បីចុចបំផ្ទុះ។ គេកត់សម្គាល់ថាប្រទេសប៉ាគីស្ថានកើតមានអំពើហិង្សាបែបភេរវកម្មកាន់តែញឹកញាប់ជាងមុន។
ក្រៅពីអ្នកស្លាប់ខាងលើ មនុស្ស៧នាក់នាក់បានរងរបួសដោយសារការវាយប្រហារដែលកើតឡើងនៅស្រុកបាជូ (Bajur)ស្ថិតនៅជាប់នឹងព្រំដែនអាហ្វហ្កានីស្ថាន។ ជនប្រដាប់អាវុធទាំងនោះបានបើកឡានបុកទម្លុះរនាំងប៉ុស្តិ៍ឆែកឆេរបន្ទាប់ពីកងសន្តិសុខប៉ាគីស្ថានបិទខ្ទប់ពួកគេមិនឱ្យបើកចូលទៅក្នុងទីតាំងស្នាក់អាស្រ័យរបស់កងទ័ព។ យោធាប៉ាគីស្ថានអះអាងថាក្រុមប្រដាប់អាវុធទាំងនោះត្រូវបានបាញ់សម្លាប់១២នាក់នៅពេលពួកគេព្យាយាមរត់គេចខ្លួន។
ក្រោយហេតុការណ៍នេះ ក្រុមភេរវកម្មដែលមានឈ្មោះថាក្រុមឥស្លាមប៉ាគីស្ថាន-តាលីបង់ ប្រកាសថានេះជាស្នាដៃរបស់ពួកគេ។ ក្រុមនេះបានធ្វើសង្គ្រាមប្រឆាំងនឹងប៉ាគីស្ថានចាប់តាំងពីឆ្នាំ២០០៧ដើម្បីទាមទារចំណែកនៅក្នុងការគ្រប់គ្រងទឹកដីមួយផ្នែកណាមួយរបស់ប៉ាគីស្ថាន។ ពួកគេបង្កើនការវាយប្រហារកាន់តែខ្លាំងចាប់តាំងពីឆ្នាំ២០២២នៅពេលក្រុមនេះឈប់អនុវត្តតាមបទឈប់បាញ់ជាមួយរដ្ឋាភិបាលប៉ាគីស្ថាន។
រដ្ឋាភិបាលប៉ាគីស្ថានបានដាក់ការស្ដីបន្ទោសទៅលើប្រទេសអាហ្វហ្កានីស្ថាន។ ប៉ាគីស្ថានថាអាហ្វហ្កានីស្ថានជាទីជម្រកដ៏សុខសាន្តរបស់ក្រុមនេះ។ ប៉ុន្តែអាហ្វហ្កានីស្ថានបដិសេធជានិច្ច។ កាលពីមុននេះមិនយូរប៉ុន្មាន ប្រទេសប៉ាគីស្ថានក៏កើតមានអំពើវាយប្រហារបែបភេរវកម្មនៅវិហាឥស្លាមបណ្ដាលឱ្យស្លាប់មនុស្សជាង៣០នាក់។ ការវាយប្រហារនេះត្រូវក្រុមរដ្ឋឥស្លាម (អាយស៊ីស) ប្រកាសថាជាទង្វើរបស់ខ្លួន។ ដូច្នេះ មានន័យថាប៉ាគីស្ថានកំពុងប្រឈមនឹងការវាយប្រហារបែបភេរវកម្មពីក្រុមប្រឆាំងជាច្រើននៅក្នុងពេលតែមួយ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ