ទីក្រុងហ្សឺណែវ៖ គណៈប្រតិភូអ៊ុយក្រែន និងរុស្ស៊ីបានធ្វើដំណើរទៅដល់ប្រទេសស្វីសហើយដើម្បីត្រៀមចរចាគ្នានាពេលបន្តិចទៀតនេះ។ គេគិតថាបញ្ហាបូរណភាពទឹកដីនៅតែជាប្រធានបទក្ដៅ និងសំខាន់ជាងគេនៅក្នុងការចរចាលើកនេះ។ លោកដូណាល់ត្រាំកំពុងដាក់សម្ពាធទៅលើអ៊ុយក្រែន។ ដូចអ្វីដែលលោកហ្សេឡិនស្គីនៅអាលឺ្លម៉ង់បាននិយាយអីចឹងគឺថាលោកត្រាំជំរុញឱ្យតែខាងអ៊ុយក្រែនធ្វើសម្បទាន ចំណែករុស្ស៊ីលោកមិននិយាយអ្វីទាំងអស់។ ថ្មីៗនេះ លោកត្រាំថ្លែងថាអ៊ុយក្រែនត្រូវតែទទួលយកកិច្ចព្រមព្រៀងជាប្រញាប់។ លោកយល់ថាដំណើរការចរចាគ្នានេះងាយស្រួលបំផុត។
មុនការចរចាលើកទីបីនេះ រុស្ស៊ីវាយប្រហារយ៉ាងសន្ធាប់ទៅលើអ៊ុយក្រែន និងបណ្ដាលឱ្យខូចខាតប្រព័ន្ធចែកចាយថាមពលនៅទីក្រុងកំពង់ផែអូដេសា (Odesa)។ អាជ្ញាធរអ៊ុយក្រែនប្រកាសថាមនុស្សរាប់ម៉ឺននាក់គ្មានអ្វីសម្រាប់កម្ដៅខ្លួន និងគ្មានទឹកស្អាតសម្រាប់ប្រើប្រាស់នោះទេ។ ឆ្លៀតឱកាសនេះ លោកហ្សេឡិនស្គីអំពាវនាវឱ្យក្រុមសម្ព័ន្ធមិត្តដាក់សម្ពាធកាន់តែខ្លាំងទៅលើរុស្ស៊ីដើម្បីបង្ខំឱ្យរុស្ស៊ីទទួលយកកិច្ចព្រមព្រៀងសន្តិភាពដ៏ពិតប្រាកដ និងប្រកបដោយយុត្តិធម៌។ ការដាក់សម្ពាធនោះគឺតាមរយៈការគាបសង្កត់ផ្នែកសេដ្ឋកិច្ច និងការបញ្ជូនអាវុធទៅឱ្យអ៊ុយក្រែន។
សព្វថ្ងៃនេះ តំបន់ដូញែត (Donetsk) នៅសល់ទឹកដី២០%ទៀតដែលរុស្ស៊ីមិនទាន់វាយយកបាន។ រុស្ស៊ីទាមទារឱ្យអ៊ុយក្រែនប្រគល់ដីដែលនៅសេសសេលនោះមកឱ្យខ្លួន។ អ្នកនាំពាក្យវិមានក្រឹមឡាំងថ្លែងថាការចរចាលើកនេះត្រូវនិយាយអំពីបញ្ហាជាច្រើនរួមទាំងបញ្ហាធំៗផងដែរដូចជាបូរណភាពទឹកដី និងអ្វីគ្រប់យ៉ាងដែលជាការទាមទាររបស់រុស្ស៊ី។ ទីកន្លែងចរចាគ្នាបានដូរទៅទីក្រុងហ្សឺណែវវិញបន្ទាប់ពីភាគីទាំងបីអាមេរិក រុស្ស៊ី និងអ៊ុយក្រែនជួបគ្នា២ដងនៅអាប៊ូដាប៊ី ប្រទេសអារ៉ាប់រួម ប៉ុន្តែគ្មានលទ្ធផល។
ក្រឡេកទៅមើលសមរភូមិយោធាវិញម្ដង កាលពីយប់មិញ និងព្រឹកមិញ រុស្ស៊ីបញ្ជូនដ្រូនជិត៤រយគ្រឿង និងមីស៊ីល២៩គ្រាប់វាយប្រហារទៅលើទីក្រុងតូចធំរបស់អ៊ុយក្រែន។ លោកហ្សេឡិនស្គីថ្លែងថានេះជាការវាយប្រហារផ្គួបគ្នា និងមានចេតនាបង្កការខូចខាតជាអតិបរមាទៅលើវិស័យថាមពល។ លោកអំពាវនាវឱ្យក្រុមប្រទេសជាដៃគូចាត់វិធានការឆ្លើយតបចំពោះការវាយប្រហារនេះ និងចាប់បង្ខំឱ្យរុស្ស៊ីទទួលខុសត្រូវចំពោះទង្វើរបស់ខ្លួន៕ ប្រភព៖ អឹនប៊ីស៊ី (NBC) និងប្រភពដទៃទៀត
ចែករំលែកព័តមាននេះ