រាជធានីភ្នំពេញ ៖ កម្ពុជា និងចិន បានរៀបចំកម្មវិធីរាត្រីសមោសរ ដើម្បីអបអរសាទរបុណ្យចូលឆ្នាំប្រពៃណីចិន ឆ្នាំមមី ២០២៦ ដែលបានប្រព្រឹត្តទៅក្នុងបរិយាកាសអធិកអធម និងពោរពេញដោយស្នាមញញឹមនៃមិត្តភាព…
រាជធានីភ្នំពេញ ៖ កម្ពុជា និងចិន បានរៀបចំកម្មវិធីរាត្រីសមោសរ ដើម្បីអបអរសាទរបុណ្យចូលឆ្នាំប្រពៃណីចិន ឆ្នាំមមី ២០២៦ ដែលបានប្រព្រឹត្តទៅក្នុងបរិយាកាសអធិកអធម និងពោរពេញដោយស្នាមញញឹមនៃមិត្តភាព ដោយមានការអញ្ជើញចូលរួមក្រោមអធិបតីភាពរបស់ឯកឧត្តម ឯក សំអុល ឧត្តមប្រឹក្សាព្រះមហាក្សត្រ និងជាប្រធាន សមាគមមិត្តភាពកម្ពុជា-ចិន ព្រមទាំងយុវជនប្រទេសទាំងពីរ និងភ្ញៀវកិត្តិយស ចូលរួមយ៉ាងច្រើនកុះករ នាថ្ងៃទី១៦ កុម្ភៈ ឆ្នាំ២០២៦ នៅសមាគមមិត្តភាពកម្ពុជា-ចិន ក្នុងរាជធានីភ្នំពេញ ។
លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានគូសបញ្ជាក់ថា ក្រោយពេលដែលពិធីបុណ្យចូលឆ្នាំចិន ត្រូវបានចុះបញ្ជីជាបេតិកភណ្ឌវប្បធម៌អរូបីនៃមនុស្សជាតិ ដោយអង្គការUNESCO នាថ្ងៃទី៤ ខែធ្នូ ឆ្នាំ២០២៤ ពិធីបុណ្យដែលមានអាយុកាលជិត៤ពាន់ឆ្នាំនេះ កាន់តែមានវិសាលភាពសកល និងរួមចំណែកបង្កើនកម្លាំងដល់កិច្ចកសាងសហគមន៍ជោគវាសនារួមនៃមនុស្សជាតិ ។
ជាមួយគ្នានេះ កញ្ញា Zhang Yanping តំណាងវិទ្យុមិត្តភាពកម្ពុជា-ចិន បានលើកឡើងថា រាត្រីសមោសរនេះ បានបញ្ជាក់ពីលើសពីបរិយាកាសរីករាយ និងក្តីសង្ឃឹមសម្រាប់ឆ្នាំថ្មី ដោយភ្ញៀវចូលរួមទាំងអស់បានប្តេជ្ញាចិត្តបន្តរួមដៃគ្នា ក្នុងការកសាងសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី ឱ្យកាន់តែរីកចម្រើន និងស្ថិតស្ថេរជាយូរអង្វែង។
ក្នុងឱកាសនោះ ឯកឧត្តម ឯក សំអុល បានមានប្រសាសន៍ចាត់ទុកការជួបជុំគ្នានេះ មិនត្រឹមតែជាការអបអរសាទរពិធីបុណ្យវប្បធម៌ដ៏សំខាន់មួយរបស់ប្រជាជនចិនប៉ុណ្ណោះទេ ថែមទាំងជាសញ្ញានៃមិត្តភាពជ្រាលជ្រៅ និងការតភ្ជាប់បេះដូងរវាងប្រជាជន និងប្រជាជន កម្ពុជា-ចិន ទៀតផង។ ឯកឧត្តមបានលើកឡើងថា ក្រោមការដឹកនាំរបស់ថ្នាក់ដឹកនាំកំពូលនៃប្រទេសទាំងពីរ ទំនាក់ទំនងកម្ពុជា–ចិន ត្រូវបានលើកកម្ពស់ទៅជាសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី ហើយកម្មវិធីនារាត្រីនេះបានរំលេចកាន់តែច្បាស់ពីការតភ្ជាប់បេះដូងរវាងប្រជាជននៃប្រទេសយើងទាំងពីរ។
ឯកឧត្ដមបានបន្ថែមទៀតថា ពិតណាស់ដែលថា កម្មវិធីនារាត្រីនេះ គឺជាវេទិកាដ៏មានតម្លៃសម្រាប់ការផ្លាស់ប្តូរវប្បធម៌ ការស្គាល់គ្នា និងការបង្កើតមិត្តភាពកាន់តែស៊ីជម្រៅរវាងសមាគមមិត្តភាពកម្ពុជា-ចិន និងវិទ្យុមិត្តភាពកម្ពុជា-ចិន។
សូមជម្រាបជូនផងដែរថា ក្នុងអំឡុងពេលកម្មវិធីនាពេលនោះដែរ ក៏មានការចាក់បញ្ចាំងផ្ទាំងទស្សនីយភាព ផ្សាយផ្ទាល់ ព្រឹត្តិការណ៍ដ៏អស្ចារ្យ អំពីការសម្តែងសិល្បៈដោយរួមបញ្ចូលនូវបច្ចេកវិទ្យាក្នុងទម្រង់ 8K + AI ព្រមទាំងបញ្ចញឧត្តមភាពនៃការផ្សព្វផ្សាយជាភាសា៨៥ភាសា ក្រោមកិច្ចខិតខំរបស់អគ្គស្ថានីយវិទ្យុនិងទូរទស្សន៍មជ្ឈិមចិន ដែលចាប់រាប់តាំងពី១៩៨៣មក។ ក្រៅពីនេះ ក៏មានការធ្វើនំគៀវរួមគ្នា និងសកម្មភាពកម្សាន្ត ដើម្បីអបអរសាទរ បុណ្យឆ្នាំថ្មីរបស់ចិន ជាច្រើនទៀត ក្នុងបរិយាកាសយ៉ាងសប្បាយរីករាយ៕
ចែករំលែកព័តមាននេះ