ខេត្តកំពង់ស្ពឺ៖ ក្មេងស្រីអាយុ១៥ឆ្នាំម្នាក់ត្រូវបានម្ចាស់កាបូបលុយធ្វើការឃាត់ខ្លួនបានប្រគល់ជូនសមត្ថកិច្ចនគរបាលក្រុងច្បារមន ដោយសង្ស័យថាជាបក្ខពួកដែលធ្វើសកម្មភាពលួចកាបូបក្រណាត់យួរដៃដាក់លុយនិងគ្រឿងអលង្ការរបស់គាត់ហើយគេចខ្លួនទៅបាត់។
នគរបាលក្រុងច្បារមនបាននិយាយឱ្យដឹងថា នៅមុនពេលឃាត់ខ្លួនក្មេងស្រីសង្ស័យខាងលើ គឺនៅវេលាម៉ោង៦និង៣០នាទីព្រលប់ថ្ងៃទី១៥ ខែកុម្ភៈ ឆ្នាំ២០២៦ នៅចំណុចតូបលក់សាច់ជ្រូក ផ្សារកំពង់ស្ពឺ (ច្រកចេញចូល ជួរមាត់ស្ទឹង) ស្ថិតនៅក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
នគរបាលក្រុងច្បារមនបាននិយាយឱ្យដឹងថា បើយោងតាមពាក្យបណ្ដឹង របស់ឈ្មោះ ជិន ហូវ ភេទស្រី អាយុ៥៨ឆ្នាំ មុខរបរអាជីវករលក់សាច់ជ្រូក រស់នៅក្នុងភូមិចំបក់ ឃុំវល្លិ៍សរ ស្រុកសំរោងទង ខេត្តកំពង់ស្ពឺ បានប្ដឹងចោទប្រកាន់ទៅលើជនសង្ស័យ ភេទស្រី អាយុប្រហែល១៥ឆ្នាំ មានស្នាមជាំក្រោមភ្នែកខាងស្ដាំ មិនស្គាល់អត្តសញ្ញាណ និងបក្ខពួក ដែលបានធ្វើសកម្មភាព មកបន្លំទិញសាច់ជ្រូក និងសុំថង់ច្រកអីវ៉ាន់ នៅតូបរបស់ខ្លួន នៅពេលដែលខ្លួនកំពុងរកថង់ឲ្យ ក៏ស្រាប់តែមានបក្ខពួករបស់គេម្នាក់ទៀត ជាក្មេងប្រុសអាយុប្រហែល១០ឆ្នាំ ចូលមកលួចកាបូបក្រណាត់យួរដៃដាក់លុយ ស្រោបថង់ពណ៌ស ពីខាងក្រៅ ដែលដាក់នៅក្នុងតូប(សម្ភារៈក្នុងកាបូបរួមមាន÷ លុយលក់សាច់ជ្រូកចំនួន៤.០០០.០០០រៀល ,ចិញ្ចៀនមាស១ វង់ ទំងន់២ជី,ក្រវិលផ្លាកទីន ១ចំហៀង ទំងន់៥ ហ៊ុន,បន្តោងផ្លាកទីនស្រោបរូបនាងពួន ទំងន់១ ជី ,ទូរស័ព្ទដៃចំនួន០២ គ្រឿង ម៉ាកអប់បូរ (OPPO)A16 ពណ៌ខ្មៅ ១គ្រឿង និង ម៉ាកណូគា 105 សុីម2ចំនួន ១គ្រឿងទៀត ) ក្រោយបក្ខពួករបស់គេធ្វើសកម្មភាពបានសម្រេច ក្មេងស្រីខាងលើ ក៏ព្យាយាម ជិះម៉ូតូគេចខ្លួនដែរ ប៉ុន្តែត្រូវខ្លួនចាប់ជាប់ និងស្រែកឲ្យគេជួយ ទើបចាប់បានរួចប្រគល់ឲ្យសមត្ថកិច្ចតែម្ដង ។
នគរបាលក្រុងច្បារមនបានបន្តថាក្រោយពីទទួលបានព័ត៌មានពីម្ចាស់កាបូបរួចមក កម្លាំងប៉ុស្ដិ៍នគរបាលរដ្ឋបាលសង្កាត់រការធំ បានចុះទៅដល់កន្លែងកើតហេតុ ឃាត់ខ្លួនជនសង្ស័យឈ្មោះសឿង សុធារ៉ា ភេទស្រី អាយុ១៥ឆ្នាំ រស់នៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ មកសាកសួរ ប៉ុន្តែជនសង្ស័យមិនព្រមឆ្លើយសារភាពនោះទេ។
ទោះបីជាយ៉ាងណា យុវតីជាជនសង្ស័យមិនព្រមឆ្លើយសារភាពក៏ដោយ ប៉ុន្តែនគរបាលបានកសាងសំណុំរឿង បញ្ជូនទៅផែនការងារ នគរបាលព្រហ្មទណ្ឌខេត្តកំពង់ស្ពឺ ដើម្បីចាត់ការបន្តតាមនិតិវិធី៕
ចែករំលែកព័តមាននេះ