ទីក្រុងម៉ូស្គូ៖ ថ្ងៃនេះ វិមានក្រឹមឡាំងច្រានចោលលទ្ធផលស្រាវជ្រាវដែលថាអតីតប្រធានគណបក្សប្រឆាំងនៅរុស្ស៊ី លោកណាវ៉ាល់នី ដែលបានស្លាប់កាលពីឆ្នាំ២០២៤នោះគឺស្លាប់ដោយសារការដាក់ថ្នាំបំពុល។ លទ្ធផលនេះត្រូវប្រទេសចំនួនប្រាំនៅអឺរ៉ុបគឺអង់គ្លេស បារាំង អាល្លឺម៉ង់ ស៊ុយអែត និងហូឡង់ប្រកាសគាំទ្រយ៉ាងពេញទំហឹង។…
ទីក្រុងម៉ូស្គូ៖ ថ្ងៃនេះ វិមានក្រឹមឡាំងច្រានចោលលទ្ធផលស្រាវជ្រាវដែលថាអតីតប្រធានគណបក្សប្រឆាំងនៅរុស្ស៊ី លោកណាវ៉ាល់នី ដែលបានស្លាប់កាលពីឆ្នាំ២០២៤នោះគឺស្លាប់ដោយសារការដាក់ថ្នាំបំពុល។ លទ្ធផលនេះត្រូវប្រទេសចំនួនប្រាំនៅអឺរ៉ុបគឺអង់គ្លេស បារាំង អាល្លឺម៉ង់ ស៊ុយអែត និងហូឡង់ប្រកាសគាំទ្រយ៉ាងពេញទំហឹង។ លោកណាវ៉ាល់នីជាអ្នករិះគន់នយោបាយរបស់លោកពូទីនយ៉ាងឥតសំចៃមាត់។ លោកស្លាប់នៅពេលអនុវត្តទោសនៅក្នុងពន្ធនាគារនៅតំបន់អាកទិច។
ការស្រាវជ្រាវរបស់មន្ទីរពិសោធផ្សេងគ្នា និងធ្វើការដោយឯករាជ្យពីគ្នា បានបង្ហាញលទ្ធផលដូចគ្នាថាលោកណាវ៉ាល់នីស្លាប់ដោយសារសារធាតុពុលដ៏កម្រឈ្មោះអេពីបាទីឌីន (epibatidine) ដែលមាននៅក្នុងស្បែករបស់សត្វកង្កែបពិស (dart frog) នៅតំបន់អាមេរិកខាងត្បូង (ដូចជានៅព្រៃអាម៉ាហ្សូនជាដើម)។ ប្រទេសទាំង៥សំអាងទៅលើហេតុផលបីយ៉ាងគឺ៖ មានតែរុស្ស៊ីទេដែលមានធម្យោបាយចម្រាញ់សារធាតុនេះយកទៅបំពុលលោកណាវ៉ាល់នី, មានតែរុស្ស៊ីទេដែលមានកត្តាជំរុញចិត្តចង់សម្លាប់លោកណាវ៉ាល់នី និងមានតែរុស្ស៊ីទេដែលមានឱកាសសម្លាប់ណាវ៉ាល់នី។
ជាការឆ្លើយតបចំពោះការចោទប្រកាន់នេះ អ្នកនាំពាក្យវិមានក្រឹមឡាំង លោកប៉េស្កូស (Peskov) ថ្លែងថាការចោទប្រកាន់នេះគ្រាន់តែចេញក្រឡាមកយើងច្រានចោលទាំងស្រុងដោយមិនចាំបាច់គិតច្រើន។ យើងមិនឯកភាពនឹងការសន្និដ្ឋានទាំងនេះទេ។ យើងយល់ថានោះជាការសន្និដ្ឋានដែលលំអៀង និងគ្មានមូលដ្ឋានច្បាស់លាស់ទេ។ ជាការពិត យើងសូមប្រឆាំងជំទាស់នឹងការចោទប្រកាន់នេះ។ សារធាតុពុលឈ្មោះអេពីបាទីឌីនកកើតឡើងដោយធម្មជាតិនៅក្នុងស្បែករបស់សត្វកង្កែបពិសដែលរស់នៅក្នុងព្រៃស្រោងនៃតំបន់អាមេរិកខាងត្បូង។ ប៉ុន្តែសារធាតុនេះក៏អាចផលិតនៅក្នុងពិសោធបានដែរ។ ត្រង់ចំណុចនេះហើយដែលក្រុមអ្នកវិទ្យាសាស្ត្របស្ចិមប្រទេសសង្ស័យថារុស្ស៊ីប្រហែលជាបានប្រើស្នៀតនេះដើម្បីបំពុលសម្លាប់លោកណាវ៉ាល់នី។
នៅពេលឆ្លងចូលទៅក្នុងខ្លួន សារធាតុនេះចាប់ផ្ដើមបញ្ចេញប្រតិកម្មដូចសារធាតុពុលដែលបំផ្លាញប្រព័ន្ធប្រសាតដទៃទៀតដែរ។ ពោលគឺវាធ្វើឱ្យជនរងគ្រោះដកដង្ហើមផុតៗស្ទើរដាច់ខ្យល់ស្លាប់, ប្រកាច់, ប្រទាញដៃជើង និងសង្វាក់បេះដូងថយចុះបន្តិចម្ដងៗរហូតដល់ស្លាប់តែម្ដង។ លោកណាវ៉ាល់នីធ្លាប់ត្រូវថ្នាំពុលកាលពីឆ្នាំ២០២០។ ប៉ុន្តែគាត់អាចរួចផុតពីការស្លាប់ដោយសារគេបានបញ្ជូនគាត់ចេញពីប្រទេសរុស្ស៊ីដើម្បីព្យាបាលទាន់ពេលវេលា៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ