ទីក្រុងកៀវ៖ មន្ត្រីរដ្ឋាភិបាលអ៊ុយក្រែនបានចាកចេញដំណើរពីមាតុប្រទេសសំដៅទៅទីក្រុងហ្សឺណែវ ប្រទេសស្វីស ដើម្បីចូលរួមការចរចាត្រីភាគីជាមួយអាមេរិក និងរុស្ស៊ី។ ប្រធានកិច្ចការទូទៅរបស់អ៊ុយក្រែនបង្ហោះសារនៅលើតេឡេក្រាមថាលោកកំពុងធ្វើដំណើរទៅទីក្រុងហ្សឺណែវ។ នៅចំពោះមុខនេះគឺការត្រៀមចរចាគ្នាវគ្គបន្ទាប់។ នៅតាមផ្លូវធ្វើដំណើរ យើងនឹងពិភាក្សាគ្នាពីមេរៀនដែលយើងបានដកពិសោធជាមួយសហការីរបស់យើង ហើយយើងនឹងស្វែងរកសេចក្ដីសន្និដ្ឋានដ៏ត្រឹមត្រូវ។
គម្រោងជួបគ្នានៅហ្សឺណែវនោះកើតឡើងបន្ទាប់ពីមានការជួបគ្នាត្រីភាគីចំនួន២ដងនៅទីក្រុងអាប៊ូដាប៊ី ប្រទេសអារ៉ាប់រួមកាលពីខែមករា និងដើមខែកុម្ភៈ។ ទាំងអ៊ុយក្រែន និងរុស្ស៊ីសុទ្ធតែបានអះអាងដូចៗគ្នាថាការជួបគ្នា២ដងកន្លងទៅនេះពោរពេញដោយការស្ថាបនា។ ប៉ុន្តែសម្រេចសម្រួចនៅទីបញ្ចប់ ជួបគ្នា២ដងគ្មានបានលទ្ធផលអ្វីទាំងអស់។ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងកាលពីថ្ងៃអាទិត្យដោយបង្ហាញសេចក្ដីសង្ឃឹមថាការជួបគ្នានៅហ្សឺណែវធ្វើឡើងដោយភាពហ្មត់ចត់, សាច់ការ និងមានប្រយោជន៍សម្រាប់ទាំងអស់គ្នា។ ប៉ុន្តែលោកសូមនិយាយតាមត្រង់ទៅចុះថាពេលខ្លះភាគីម្ខាងៗនិយាយប្រធានបទផ្សេងគ្នាស្រឡះ។ លោកថាខាងភាគីអាមេរិកនិយាយគ្នាសុខៗងាកទៅនិយាយពីការធ្វើសម្បទាន។
នៅក្នុងការទាមទារឱ្យគូជម្លោះធ្វើសម្បទាននេះ លោកហ្សេឡិនស្គីអះអាងថាអាមេរិកបង្ខំឱ្យតែខាងអ៊ុយក្រែនធ្វើសម្បទាន។ ចំណែកខាងរុស្ស៊ីវិញអាមេរិកគ្មានមាត់កអ្វីទាំងអស់។ នៅក្នុងចំណោមបញ្ហាដែលជំពាក់មុខខ្លាំងមិនងាយនឹងដោះស្រាយចេញនោះគឺអនាគតនៃទឹកដីអ៊ុយក្រែននៅភាគខាងកើតដែលកងទ័ពរុស្ស៊ីកំពុងកាន់កាប់មួយផ្នែកធំ។ ប៉ុន្តែអ៊ុយក្រែននៅកាន់កាប់មួយចំណែកដែរ។ អាមេរិកទាមទារឱ្យអ៊ុយក្រែនដកកងទ័ពចេញពីទីនោះ ហើយប្រគល់ទៅឱ្យរុស្ស៊ីទាំងអស់តែម្ដងដើម្បីចរចាឆាប់ត្រូវរ៉ូវគ្នា។ រុស្ស៊ីចង់ឱ្យសហគមន៍អន្តរជាតិទទួលស្គាល់ពេញសិទ្ធិនូវការកាន់កាប់របស់ខ្លួនទៅលើតំបន់ភាគខាងកើត រួមទាំងតំបន់គ្រីម៉េដែលរុស្ស៊ីកាត់ខ្វៀលយកតាំងពីឆ្នាំ២០១៤ផងដែរ។
ចំពោះការទាមទារឱ្យដកកងទ័ពនោះ អ៊ុយក្រែនចង់ឱ្យអនុវត្តទាំងសងខាង។ មានន័យថារុស្ស៊ីក៏ត្រូវតែដកទ័ពចេញពីតំបន់ដុនបាស់ដែរដើម្បីក្លាយជាតំបន់គ្មានកងទ័ព។ ចំណុចមួយទៀត មន្ត្រីរដ្ឋាភិបាលអ៊ុយក្រែនទាមទារឱ្យមានការធានាសន្តិសុខសម្រាប់អ៊ុយក្រែនដើម្បីទប់ស្កាត់ការវាយប្រហារនាពេលអនាគត។ ហ្សេឡិនស្គីថាអ៊ុយក្រែនត្រូវការការធានារយៈពេលម្ភៃឆ្នាំយ៉ាងតិចមុននឹងលោកសម្រេចចុះហត្ថលេខាលើកិច្ចព្រមព្រៀងសន្តិភាព។ ប្រភពខ្លះថាអាមេរិកផ្ដល់ការធានាសន្តិសុខរយៈពេល១៥ឆ្នាំ ប៉ុន្តែហ្សេឡិនស្គីមិនព្រម៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ