ទីក្រុងហ្សឺណែវ៖ រដ្ឋមន្ត្រីការបរទេសអ៊ីរ៉ង់ លោកអារ៉ាកឈី (Araghchi) បានធ្វើដំណើរទៅដល់ទីក្រុងហ្សឺណែវ ប្រទេសស្វីស ហើយកាលពីពេលថ្មីៗនេះដើម្បីចូលរួមការចរចាលើកទី២ដោះស្រាយបញ្ហានុយក្លេអ៊ែរជាមួយអាមេរិក។ នេះបើតាមការផ្សាយរបស់ទូរទស្សន៍រដ្ឋអ៊ីរ៉ង់។ ទីក្រុងវ៉ាស៊ីនតោនក៏កំពុងដាក់សម្ពាធទៅលើអ៊ីរ៉ង់ផងដែរទាំងសេដ្ឋកិច្ច នយោបាយ…
ទីក្រុងហ្សឺណែវ៖ រដ្ឋមន្ត្រីការបរទេសអ៊ីរ៉ង់ លោកអារ៉ាកឈី (Araghchi) បានធ្វើដំណើរទៅដល់ទីក្រុងហ្សឺណែវ ប្រទេសស្វីស ហើយកាលពីពេលថ្មីៗនេះដើម្បីចូលរួមការចរចាលើកទី២ដោះស្រាយបញ្ហានុយក្លេអ៊ែរជាមួយអាមេរិក។ នេះបើតាមការផ្សាយរបស់ទូរទស្សន៍រដ្ឋអ៊ីរ៉ង់។ ទីក្រុងវ៉ាស៊ីនតោនក៏កំពុងដាក់សម្ពាធទៅលើអ៊ីរ៉ង់ផងដែរទាំងសេដ្ឋកិច្ច នយោបាយ ការទូត និងយោធា។ យោងតាមរដ្ឋាភិបាលអ៊ីរ៉ង់ ការចរចាគ្នាដោយប្រយោលដោយមានប្រទេសអូម៉ង់ធ្វើជាអ្នកសម្របសម្រួលនោះនឹងចាប់ផ្ដើមនៅថ្ងៃអង្គារ។
របៀបវារៈនៃការចរចាអាចនឹងល្អៀងគ្នា។ ខាងអ៊ីរ៉ង់ចង់និយាយអំពីការចម្រាញ់វិទ្យុសកម្ម និងការលុបចោលទណ្ឌកម្មសេដ្ឋកិច្ច។ ចំណែកអាមេរិកមិនត្រឹមតែនិយាយអំពីវិទ្យុសកម្មទេ។ អាមេរិកទាមទារឱ្យអ៊ីរ៉ង់ធ្វើរឿងជាច្រើនទៀតដូចជាឈប់អភិវឌ្ឍកម្មវិធីមីស៊ីលផ្លោង និងឈប់ផ្ដល់ហិរញ្ញប្បទានសម្រាប់ចលនាប្រដាប់អាវុធដែលប្រឆាំងនឹងអ៊ីស្រាអែលដូចជាក្រុមហ៊ូទីនៅយេម៉ែន, ក្រុមហេសបូឡានៅលីបង់ និងក្រុមហាម៉ាស់នៅហ្កាហ្សាជាដើម។
នៅពេលនេះនៅមានភាពស្រពេចស្រពិលនៅឡើយទេព្រោះគេមិនដឹងថាតើជោគវាសនានៃឃ្លាំងស្តុកទុកសារធាតុអ៊ុយរ៉ាញ៉ូមទម្ងន់៤០០គីឡូក្រាមដែលមានជាតិវិទ្យុសកម្ម៦០%នោះនឹងទៅជាយ៉ាងណា។ សារធាតុទាំងនោះធ្លាប់ត្រូវក្រុមអ្នកអធិការកិច្ចអន្តរជាតិចុះត្រួតពិនិត្យកាលពីខែមិថុនា ឆ្នាំ២០២៥។ នៅប្រទេសស្វីស លោករដ្ឋមន្ត្រីអ៊ីរ៉ង់ អារ៉ាកឈី (Araghchi) នឹងជួបសម្ដែងការគួរសមជាមួយសមភាគីស្វីស, អូម៉ង់ និងជួបជាមួយប្រធានទីភ្នាក់ងារអាតូមិចអន្តរជាតិ អាយអេអ៊ីអេ (IAEA)។
អាមេរិកបានចាត់បេសកជនពិសេសទទួលបន្ទុកខាងកិច្ចការមជ្ឈិមបូព៌ា លោកស្ទីវវីតខូស (Steve Witkoff) និងកូនប្រសារបស់លោកត្រាំទៅចូលរួមការចរចា។ នេះបើតាមការបញ្ជាក់របស់សេតវិមានកាលពីម្សិលមិញ។ ការចរចាគ្នាលើកនេះកើតឡើងបន្ទាប់ពីលោកត្រាំចេញសារគំរាមម្ដងហើយម្ដងទៀតថាអ៊ីរ៉ង់ត្រូវប្រយ័ត្នខ្លួនឱ្យមែនទែន។ បើការចរចាគ្នាមិនជោគជ័យទេគឺមានតែផ្ទុះសង្គ្រាមជាមួយគ្នាតែប៉ុណ្ណោះ។ ឥឡូវនេះ នាវាដឹកយន្តហោះទី២កំពុងបើកឆ្ពោះទៅតំបន់មជ្ឈិមបូព៌ាហើយ។
លោកត្រាំអះអាងថាអ៊ីរ៉ង់ពិបាកនិយាយគ្នាបំផុត។ ការផ្លាស់ប្ដូររបបដឹកនាំនៅប្រទេសនេះត្រូវលោកអះអាងថាអាចក្លាយជាជម្រើសដ៏ល្អប្រសើរបំផុត។ នៅក្នុងស្ថានភាពនេះ អនុរដ្ឋមន្ត្រីការបរទេសអ៊ីរ៉ង់បង្ហើបឱ្យដឹងថារដ្ឋាភិបាលរបស់លោកនឹងពិចារណាធ្វើតាមការទាមទាររបស់ក្រុមបស្ចិមប្រទេសនៅក្នុងបញ្ហាស្តុកទុកសារធាតុអ៊ុយរ៉ាញ៉ូមប្រសិនបើអាមេរិកយល់ព្រមលុបចោលទណ្ឌកម្មសេដ្ឋកិច្ចទាំងអស់ដែលកំពុងដាក់ទៅលើអ៊ីរ៉ង់៕ ប្រភព៖ ហ្វ្រង់២៤ (France 24) និងប្រភពដទៃទៀត
ចែករំលែកព័តមាននេះ