ការសិក្សាស្រាវជ្រាវជីវ:ចម្រុះដោយម៉ាស៊ីនថតស្វ័យប្រវត្តិដែលធ្វើឡើងនៅចន្លោះខែមករា ដល់ខែសីហា ឆ្នាំ២០២៥ បានបង្ហាញពីប្រភេទសត្វខ្លាបីប្រភេទ នៅក្នុងចំណោមខ្លា៨ ប្រភេទដែលបន្តមានវត្តមាននៅក្នុងប្រទេសកម្ពុជា ជាពិសេស គឺនៅក្នុងឧទ្យានជាតិវីរជ័យ ។ អង្គការសត្វព្រៃ…
ការសិក្សាស្រាវជ្រាវជីវ:ចម្រុះដោយម៉ាស៊ីនថតស្វ័យប្រវត្តិដែលធ្វើឡើងនៅចន្លោះខែមករា ដល់ខែសីហា ឆ្នាំ២០២៥ បានបង្ហាញពីប្រភេទសត្វខ្លាបីប្រភេទ នៅក្នុងចំណោមខ្លា៨ ប្រភេទដែលបន្តមានវត្តមាននៅក្នុងប្រទេសកម្ពុជា ជាពិសេស គឺនៅក្នុងឧទ្យានជាតិវីរជ័យ ។
អង្គការសត្វព្រៃ និងរុក្ខជាតិ ជាមួយក្រសួងបរិស្ថាន បានអះអាងថា សត្វខ្លាទាំងបីប្រភេទ នោះរួមមានខ្លាពពក ខ្លាលឿងមាស និងខ្លាភ្ញីថ្មកែវ ។
ខ្លាពពក គឺជាប្រភេទខ្លាម្យ៉ាង ដែលស្ថិតនៅក្នុងអម្បូរសត្វឆ្មាព្រៃដូចជាខ្លាធំដែរ ដោយវាមានទម្ងន់ពី១១ទៅ២៣គីឡូក្រាម និងមានប្រវែងប្រមាណជាពី៦៨ ទៅ១០៨សង់ទីម៉ែត្រ ។
បច្ចុប្បន្ននេះ ខ្លាពពក ដែលត្រូវបានគេស្គាល់ ត្រូវបានចុះជាប្រភេទសត្វដែល «កំពុងទទួលរងការគំរាមកំហែង» នៅក្នុងបញ្ជីក្រហមរបស់អង្គការសហភាពអន្តរជាតិដើម្បីការអភិរក្សធម្មជាតិ (IUCN)។
ខ្លាលឿងមាស អាចមានទម្ងន់ប្រមាណជា ពី៩ទៅ ១៦គីឡូក្រាម និងមានប្រវែវពី ៦៦ ទៅ ១០៥ សង់ទីម៉ែត្រ ។
ខ្លាភ្ញីថ្មកែវ ជាសត្វច្រើន ចេញរកស៊ី នៅពេលយប់ និងនៅលើដើមឈើ ចំណីអាហាររបស់វាមានដូចជា ត្រកួត, អន្សង, កំប្រុក, រញី, ស្វា, កណ្ដុរ, និងទន្សាយជាដើម ។ សត្វខ្លាអំបូរនេះ មានមាឌតូច ដងខ្លួនវែង ត្រចៀកមូល និងកន្ទុយវែងសំពោងសម្បុរដី ។ វាមានទម្ងន់ត្រឹម ២ទៅ៥គីឡូក្រាមប៉ុណ្ណោះ ហើយប្រវែងខ្លួនគឺពី ៤៥ ទៅ ៦០ សង់ទីម៉ែត្រ ។
នៅកម្ពុជាមានសត្វខ្លា៨ប្រភេទ ដូចជា ខ្លាធំ ឬខ្លាដំបង និងខ្លារខិន ដែលគេសង្ស័យថា បានផុតពូជទៅហើយ ។ ក្រៅពីនោះ គឺខ្លាពពក ខ្លាត្រី ខ្លាលឿងមាស ខ្លាភ្ញីថ្មកែវ ឆ្មាព្រៃ និងឆ្មាដាវ ។
ចែករំលែកព័តមាននេះ