ខេត្តស្ទឹងត្រែង៖នាព្រឹកថ្ងៃទី១៥ ខែកុម្ភៈ ឆ្នាំ២០២៦លោក សរ សុពុត្រា អភិបាលនៃគណៈអភិបាលខេត្តស្ទឹងត្រែង បានដឹកនាំក្រុមការងារជំនាញ ចុះពិនិត្យស្ថានភាពជាក់ស្តែងនៅកំពង់ចម្លងសាឡាង ចំណុចកន្ទុយគោ ស្ថិតក្នុងភូមិហាងខូសួន…
ខេត្តស្ទឹងត្រែង៖នាព្រឹកថ្ងៃទី១៥ ខែកុម្ភៈ ឆ្នាំ២០២៦លោក សរ សុពុត្រា អភិបាលនៃគណៈអភិ
បាលខេត្តស្ទឹងត្រែង បានដឹកនាំក្រុមការងារជំនាញ ចុះពិនិត្យស្ថានភាពជាក់ស្តែងនៅកំពង់ចម្លងសាឡាង ចំណុចកន្ទុយគោ ស្ថិតក្នុងភូមិហាងខូសួន សង្កាត់សាមគ្គី ក្រុងស្ទឹងត្រែង ដើម្បីត្រៀមរៀបចំផែនការស្តារ និងជួសជុលឡើងវិញនាពេលខាងមុខ។
លោកអភិបាលខេត្ត បានចង្អុលបង្ហាញដល់មន្ទីរសាធារណការ និងដឹកជញ្ជូនខេត្ត សហការជាមួយរដ្ឋបាលក្រុងស្ទឹងត្រែង ចុះសិក្សាវាយតម្លៃទំហំការខូចខាត និងគ្រោងកញ្ចប់ថវិកាឱ្យបានច្បាស់លាស់។ លោកបានបញ្ជាក់ថា ការសម្រេចចិត្តកែលម្អកំពង់ចម្លងនេះ ធ្វើឡើងក្នុងគោលបំណងធំៗចំនួន ៣ រួមមាន៖ ការអភិរក្ស និងអភិវឌ្ឍ រក្សាសមិទ្ធផលចាស់ដែលមានស្រាប់ រួមជាមួយការកែលម្អសោភ័ណភាពស្របតាមទស្សនទាន «រក្សាចាស់ អភិវឌ្ឍថ្មី»។ ដើម្បីប្រែក្លាយទីតាំងប្រវត្តិសាស្ត្រមួយនេះ ឱ្យទៅជាកន្លែងកម្សាន្តដ៏ទាក់ទាញ សម្រាប់ភ្ញៀវទេសចរជាតិ និងអន្តរជាតិមកទស្សនាទិដ្ឋភាពទន្លេ។ការបង្កលក្ខណៈងាយស្រួលដល់ប្រជាពលរដ្ឋដែលធ្វើដំណើរតាមផ្លូវទឹក ក្នុងការចូលចតដើម្បីដោះដូរទំនិញ និងកសិផលផ្សេងៗ។
តាមការបញ្ជាក់ពីលោក សរ សុពុត្រា គម្រោងការដ្ឋានជួសជុលរូបវន្តនឹងត្រូវចាប់ផ្តើមនៅ ឆ្នាំ
២០២៧ ខាងមុខ ខណៈបច្ចុប្បន្នជាដំណាក់កាលសិក្សាបច្ចេកទេស។ កំពង់ចម្លងកន្ទុយគោនេះ មានសភាពចាស់ទ្រុឌទ្រោម និងសឹករេចរិលខ្លាំង ដែលតម្រូវឱ្យមានការជួសជុលជាបន្ទាន់ដើម្បីធានាសុវត្ថិភាព។
គួររំលឹកផងដែរថា កំពង់ចម្លងសាឡាងចំណុចកន្ទុយគោនេះ ធ្លាប់ជាសរសៃឈាមសេដ្ឋកិច្ចយ៉ាងសំខាន់ក្នុងការឆ្លងកាត់ទន្លេសេកុង និងតភ្ជាប់ជាមួយផ្លូវជាតិលេខ៧ (ចាស់) ឆ្ពោះទៅកាន់ព្រំដែនឡាវ មុនពេលដែលស្ពានសេកុង និងស្ពានមេគង្ត្រូវបានសាងសង់រួច។
សូមបញ្ជាក់ថា ក្រោមការដឹកនាំរបស់លោកអភិបាលខេត្ត កាលពីដើមឆ្នាំ២០២៥ កន្លងទៅ រដ្ឋបាលខេត្តក៏បានសម្រេចជោគជ័យក្នុងការជួសជុលកំពង់ចម្លងសាឡាងក្នុងសង្កាត់ស្ទឹងត្រែងរួចរាល់មួយកន្លែងផងដែរ ដែលបច្ចុប្បន្នកំពុងបម្រើផលប្រយោជន៍យ៉ាងសកម្មជូនដល់បងប្អូនប្រជាពលរដ្ឋក្នុងមូលដ្ឋាន៕
ចែករំលែកព័តមាននេះ