ខេត្តសៀមរាប ៖ តាមប្រភពពីប្រជាពលរដ្ឋ បានឱ្យដឹងថា មានករណីភ្ញាក់ផ្អើលមួយ មិនធ្លាប់កើតមានត្រង់ចំណុចកណ្តាលផ្សារលើធំថ្មី ទាំងថ្ងៃ យ៉ាងសាហាវ និងព្រហើន ដោយមានចោរចិត្តសឿងម្នាក់ហ៊ានចូលវាយទូរកញ្ចក់លក់មាសមួយកន្លែង…
ខេត្តសៀមរាប ៖ តាមប្រភពពីប្រជាពលរដ្ឋ បានឱ្យដឹងថា មានករណីភ្ញាក់ផ្អើលមួយ មិនធ្លាប់កើតមានត្រង់ចំណុចកណ្តាលផ្សារលើធំថ្មី ទាំងថ្ងៃ យ៉ាងសាហាវ និងព្រហើន ដោយមានចោរចិត្តសឿងម្នាក់ហ៊ានចូលវាយទូរកញ្ចក់លក់មាសមួយកន្លែង យីហោ វេត ចាន់តាក់ តូបលេខ ៥៩ ត្រូវបានកម្លាំងកងរាជអាវុធហត្ថខេត្តសៀមរាប ឃាត់ខ្លួនជនសង្ស័យម្នាក់ភ្លាមៗ យកទៅសួរនាំ នៅទីបញ្ជាការកងរាជអាវុធហត្ថខេត្ត ។
តាមប្រភពពីកម្លាំងកងរាជអាវុធហត្ថខេត្តបានប្រាប់ឱ្យដឹង នៅព្រឹកថ្ងៃទី១៦ ខែកុម្ភៈ ឆ្នាំ ២០២៦នេះថា មានប្រជាពលរដ្ឋដែលឃើញហេតុការណ៍ បានរាយការណ៍ទៅលេខទូរស័ព្ទ បន្ទាន់ (Hotline) 1296 របស់កងរាជអាវុធ ហត្ថខេត្តសៀមរាប ដើម្បីសុំកិច្ចអន្តរាគមន៍។
បន្ទាប់ពីទទួលបានព័ត៌មាន កម្លាំងអាវុធហត្ថក្រុងសៀមរាប និងកម្លាំងការិយាល័យជំនាញ បានចេញអន្តរាគមន៍ រហូតឈានដល់ឃាត់ ខ្លួនជនសង្ស័យ០១នាក់ រឿង ចោរថ្លើមធំហ៊ានចូលយកញញួរមកវាយទូរលក់មាស យីហោ វេត ចាន់តាក់ តូបលេខ ៥៩ទាំងកណ្ដាលថ្ងៃ នៅចំកណ្តាលផ្សារលើធំថ្មី ក្នុងក្រុងសៀមរាប យកមកសួរនាំ.នៅទីបញ្ជាការកងរាជអាវុធ ហត្ថខេត្ត រួចរៀបចំកសាងសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធីច្បាប់ ។
ជនសង្ស័យឈ្មោះ ឡេ សុភ័ក្រ ភេទប្រុស អាយុ ៤០ឆ្នាំ រស់នៅបច្ចុប្បន្នក្នុងភូមិទ្រាក សង្កាត់សៀមរាប ក្រុងសៀមរាប ខេត្តសៀមរាប ។ ជនសង្ស័យត្រូវបានធ្វើតេស្តទឹកនោម រកឃើញសារធាតុញៀនផងដែរ ។
ករណីចោរថ្លើមធំម្នាក់ចូល វាយទូរកញ្ចក់លក់មាសមួយកន្លែងត្រង់ចំណុចកណ្តាលក្នុងផ្សារលើធំថ្មី បង្កការភ្ញាក់ផ្អើលនេះ បានកើត ឡើងនៅវេលាម៉ោង២និង៥២នាទីរសៀល ថ្ងៃទី១៥ ខែកុម្ភៈ ឆ្នាំ២០២៦ ស្ថិតក្នុងភូមិដកពោធ៍ សង្កាត់ស្លក្រាម ក្រុងសៀមរាប ខេត្តសៀមរាប។
តាមប្រភពពីកងរាជអាវុធហត្ថខេត្តបានបញ្ជាក់ថា ករណីចោរលួចវាយទូមាស នេះមានស្ថានទម្ងន់ទោស(វាយទូមាស) ខណៈពេលនេះ កម្លាំងជំនាញកំពុងស្រាវជ្រាវស្វែងរកបក្សពួក បន្ថែមទៀត ។
សូមបញ្ជាក់ថា វត្ថុតាង ដែលត្រូវដកហូតរួមមាន ម៉ូតូ០១គ្រឿង ទូរស័ព្ទដៃ ០១គ្រឿង ញញួរ០១ដើម កាំបិតតាំងតោ០១ដើម លោហ ធាតុពណ៌លឿងចំនួន៣ខ្សែ បញ្ជូនទៅទីបញ្ជាការកងរាជអាវុធហត្ថខេត្ដសៀមរាប ដើម្បីអនុវត្ដនតាមនីតិវិធី ព្រមទាំងបានប្រគល់ ខ្សែដៃផ្លាកទីន ជូនជនរងគ្រោះវិញផងដែរ ។
បច្ចុប្បន្ន ជនសង្ស័យ ត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនទៅកាន់តុលាការ នៅរសៀលថ្ងៃទី១៦ ខែកុម្ភៈ ឆ្នាំ ២០២៦ ដើម្បីចាត់ការបន្តទៅតាមផ្លូវច្បាប់ ៕
ចែករំលែកព័តមាននេះ