យោងតាមការផ្សាយរបស់សារព័ត៌មានបរទេស សណ្ដែកដីគឺជាប្រភពនៃប្រូតេអ៊ីនរុក្ខជាតិ និងខ្លាញ់ល្អ ដែលផ្ដល់អត្ថប្រយោជន៍យ៉ាងច្រើនដល់រាងកាយ ប្រសិនបើអ្នកចេះរបៀបទទួលទានវាឱ្យបានត្រឹមត្រូវ។

ការញ៉ាំសណ្ដែកដីជួយឱ្យអ្នកមានអារម្មណ៍ឆ្អែតបានយូរ កាត់បន្ថយការឃ្លានអាហារសម្រន់ ដែលជាជំនួយការដ៏ល្អសម្រាប់អ្នកចង់គ្រប់គ្រងទម្ងន់។ លើសពីនេះ ជាតិសរសៃនៅក្នុងសណ្ដែកដីជួយសម្រួលដល់ប្រព័ន្ធរំលាយអាហារ ការពារការទល់លាមក និងជួយរក្សាតុល្យភាពជាតិស្ករក្នុងឈាមឱ្យមានស្ថិរភាព។ វាក៏សម្បូរទៅដោយសារធាតុចិញ្ចឹមសំខាន់ៗដូចជា ហ្វូឡាត ជាតិដែក និងម៉ាញ៉េស្យូម ដែលជួយទ្រទ្រង់មុខងាររាងកាយទាំងមូលឱ្យដំណើរការបានល្អ។

ទោះជាយ៉ាងណា ការញ៉ាំសណ្ដែកដីច្រើនហួសកម្រិត ឬញ៉ាំមិនចំរបៀប ក៏អាចបង្កជាផលរំខានមួយចំនួនដែរ។ មនុស្សមួយចំនួនអាចជួបបញ្ហាហើមពោះ ឆ្អល់ពោះ ឬមានហ្គាសក្នុងក្រពះច្រើន ដោយសាររាងកាយពិបាករំលាយកាបូអ៊ីដ្រាតប្រភេទម្យ៉ាងដែលមានក្នុងសណ្ដែក។ ចំពោះអ្នកដែលមានជំងឺហឺត ឬជំងឺសន្លាក់ ​គួរប្រុងប្រយ័ត្នព្រោះសណ្ដែកដីមានជាតិពុយរីន ​កម្រិតមធ្យមដែលអាចជំរុញការផលិតអាស៊ីតអ៊ុយរិក។ លើសពីនេះ សារធាតុភីតាត​ក្នុងសណ្ដែកអាចរារាំងការស្រូបយកជាតិដែក និងស័ង្កសី ប្រសិនបើអ្នកញ៉ាំវាតែមួយមុខដោយមិនមានរបបអាហារចម្រុះ។

ដើម្បីទទួលបានអត្ថប្រយោជន៍ជាអតិបរមា និងកាត់បន្ថយផលប៉ះពាល់ លោកអ្នកគួរទទួលទានក្នុងបរិមាណសមល្មមគឺប្រហែល កន្លះកែវ ទៅ ១ កែវក្នុងមួយថ្ងៃ។ តិកនិកដ៏សំខាន់គឺគួរត្រាំសណ្ដែកដីស្ងួតក្នុងទឹកពី ៨ ទៅ ១២ ម៉ោងមុនពេលយកទៅចម្អិន ដើម្បីកាត់បន្ថយសារធាតុដែលបណ្ដាលឱ្យហើមពោះ និងជួយឱ្យរាងកាយស្រូបយកជីវជាតិបានកាន់តែប្រសើរ។ ការចាប់ផ្ដើមញ៉ាំក្នុងបរិមាណតិចតួចសិន រួចសឹមបង្កើនបន្តិចម្ដងៗ នឹងជួយឱ្យប្រព័ន្ធរំលាយអាហាររបស់អ្នកសម្របខ្លួនបានល្អ និងរក្សាសុខភាពឱ្យមាំមួនបានយូរអង្វែង​៕