ទីក្រុងម៉ូស្គូ៖ នៅទីបំផុត អាថ៌កំបាំងជុំវិញការស្លាប់របស់ប្រធានគណបក្សប្រឆាំងនៅរុស្ស៊ីត្រូវបានលាតត្រដាងជាបណ្ដើរៗហើយក្រោយការធ្វើវិភាគទៅលើសំណាករបស់សាកសពជនរងគ្រោះដែលធ្វើឡើងដោយក្រុមបស្ចិមប្រទេស។ ប្រទេសចំនួន៥គឺបារាំង អង់គ្លេស អាល្លឺម៉ង់ ហូឡង់ និងស៊ុយអែតអះអាងថាមានតែរដ្ឋអំណាចនៅរុស្ស៊ីប៉ុណ្ណោះដែលមានមធ្យោបាយ, មានកត្តាជំរុញ និងមានចរិតប្រឆាំងនឹងច្បាប់អន្តរជាតិដើម្បីធ្វើរឿងនេះ (ធ្វើឃាត)។ ប្រទេសទាំងនេះចោទប្រកាន់ថារដ្ឋាភិបាលរុស្ស៊ីជាអ្នកបំពុលសម្លាប់លោកអាឡិចស៊ី ណាវ៉ាល់នី (Alexei Navalny) កាលពីឆ្នាំ២០២៤ដោយប្រើប្រាស់សារធាតុពុលដ៏កម្រមួយប្រភេទ។
ការិយាល័យកិច្ចការបរទេសអង់គ្លេសសរសេររៀបរាប់នៅក្នុងសេចក្ដីថ្លែងការណ៍រួមគ្នាជាមួយប្រទេសបួនទៀតថាយើងដឹងថារដ្ឋអំណាចរុស្ស៊ីប្រើប្រាស់សារធាតុពុលនេះដើម្បីធ្វើឃាតលោកណាវ៉ាល់នី ព្រោះពួកគេបារម្ភអំពីការប្រឆាំងរបស់លោក (ចំពោះរដ្ឋអំណាចនៅម៉ូស្គូ)។ លទ្ធផលធ្វើវិភាគសំណាកដែលយកចេញពីសពលោកណាវ៉ាល់នីបញ្ជាក់ដោយគ្មានអ្វីសង្ស័យទេថាគេបានប្រើប្រាស់សារធាតុឈ្មោះអេពីបាទីឌីន (epibatidine)។ វាជាសារធាតុពុលដែលមាននៅក្នុងសត្វកង្កែបពិសនៃតំបន់អាមេរិកខាងត្បូង។
ប្រទេសទាំង៥យល់ថាមានតែប្រទេសរុស្ស៊ីប៉ុណ្ណោះដែលមានមធ្យោបាយ, មានកត្តាជំរុញចិត្ត និងមានចរិតប្រឆាំងនឹងច្បាប់អន្តរជាតិដើម្បីធ្វើរឿងនេះ។ លោកណាវ៉ាល់នីត្រូវគេប្រទះឃើញដេកស្លាប់នៅក្នុងពន្ធនាគារនៃតំបន់អាកទិច (Arctic) កាលពីខែកុម្ភៈ ឆ្នាំ២០២៤ នៅពេលលោកកំពុងអនុវត្តទោសរយៈពេល១៩ឆ្នាំ។ ភរិយាមេម៉ាយរបស់លោក គឺលោកស្រីយូលីយ៉ា (Yulia) ថ្លែងកាលពីឆ្នាំមុនថាលទ្ធផលពិសោធដែលឯករាជ្យពីគ្នាបង្ហាញលទ្ធផលដូចគ្នាថាស្វាមីរបស់លោកស្រីត្រូវថ្នាំពុលមិនយូរប៉ុន្មានមុនពេលគាត់ស្លាប់។
លោកស្រីចោទប្រកាន់ម្ដងហើយម្ដងទៀតថាលោកពូទីនជាអ្នកនៅពីក្រោយការស្លាប់នេះ។ ប៉ុន្តែអាជ្ញាធររុស្ស៊ីច្រានចោលការចោទប្រកាន់។ លោកស្រីយូលីយ៉ាថ្លែងថាករណីដាក់ថ្នាំពុលសម្លាប់ស្វាមីរបស់លោកស្រីឥឡូវនេះត្រូវបានលាតត្រដាងការពិតហើយតាមរយៈការពិសោធតាមលក្ខណៈវិទ្យាសាស្ត្រ។ លោកស្រីរំលឹកថាកាលពី២ឆ្នាំមុន លោកស្រីបាននិយាយចំឈ្មោះលោកពូទីនជាអ្នកបញ្ជាឱ្យគេសម្លាប់ស្វាមីរបស់លោកស្រី។
ជាការពិត លោកស្រីច្បាស់ក្នុងចិត្តថានោះជាអំពើមនុស្សឃាត។ កាលនោះ លោកស្រីនិយាយតែមាត់ទទេប៉ុណ្ណោះ។ ប៉ុន្តែថ្ងៃនេះ ពាក្យសម្ដីរបស់លោកស្រីត្រូវបានបញ្ជាក់ថាជាការពិតដោយផ្អែកលើការស្រាវជ្រាវបែបវិទ្យាសាស្ត្រ។ របកគំហើញដែលថាលោកណាវ៉ាល់នីត្រូវគេដាក់ថ្នាំបំពុលសម្លាប់នោះគឺផ្អែកទៅលើលទ្ធផលវិភាគរបស់មន្ទីរពិសោធដែលធ្វើការឯករាជ្យពីគ្នាទៅលើសំណាកនៅលើសពលោកណាវ៉ាល់នី។ សំណាកនេះត្រូវគេដឹកជញ្ជូនដោយស្ងាត់ៗចេញពីប្រទេសរុស្ស៊ី៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ