ទីក្រុងវ៉ាស៊ីនតោន៖ លោកត្រាំ និងលោកណឺតាន់យ៉ាហ៊ូបានឯកភាពគ្នាថាអាមេរិកត្រូវតែចាត់ការកាត់បន្ថយបរិមាណប្រេងឆៅរបស់អ៊ីរ៉ង់ដែលនាំចេញទៅប្រទេសចិន។ នេះបើយោងតាមការផ្សាយរបស់គេហទំព័រអាក់សឺស (Axious) ដែលដកស្រង់ប្រភពពីមន្ត្រីរដ្ឋាភិបាលអាមេរិក២នាក់។ មន្ត្រីម្នាក់និយាយថាយើង (អាមេរិក និងអ៊ីស្រាអែល) ឯកភាពគ្នាថានឹងដាក់សម្ពាធជាអតិបរមាទៅលើប្រទេសអ៊ីរ៉ង់។…
ទីក្រុងវ៉ាស៊ីនតោន៖ លោកត្រាំ និងលោកណឺតាន់យ៉ាហ៊ូបានឯកភាពគ្នាថាអាមេរិកត្រូវតែចាត់ការកាត់បន្ថយបរិមាណប្រេងឆៅរបស់អ៊ីរ៉ង់ដែលនាំចេញទៅប្រទេសចិន។ នេះបើយោងតាមការផ្សាយរបស់គេហទំព័រអាក់សឺស (Axious) ដែលដកស្រង់ប្រភពពីមន្ត្រីរដ្ឋាភិបាលអាមេរិក២នាក់។ មន្ត្រីម្នាក់និយាយថាយើង (អាមេរិក និងអ៊ីស្រាអែល) ឯកភាពគ្នាថានឹងដាក់សម្ពាធជាអតិបរមាទៅលើប្រទេសអ៊ីរ៉ង់។ ឧទាហរណ៍ដូចជាការនាំប្រេងឆៅទៅប្រទេសចិនជាដើមត្រូវតែទប់ស្កាត់។
នៅពេលអ្នកសារព័ត៌មានស្នើសុំឱ្យធ្វើអត្ថាធិប្បាយពាក់ព័ន្ធនឹងការចុះផ្សាយនេះ ក្រសួងការបរទេសចិននិយាយនៅក្នុងន័យទូទៅថាកិច្ចសហប្រតិបត្តិការរវាងប្រទេសនិងប្រទេសក្រោមក្របខណ្ឌច្បាប់អន្តរជាតិជារឿងសមហេតុផល និងស្របទៅតាមផ្លូវច្បាប់។ ដូច្នេះ ក្រសួងយល់ថាកិច្ចសហប្រតិបត្តិការបែបនេះគួរណាស់ត្រូវគេគោរព និងការពារ។ សព្វថ្ងៃនេះ ប្រេងឆៅអ៊ីរ៉ង់ជាង៨០%នាំចេញទៅលក់នៅប្រទេសចិន។ បើសិនអត្រានាំចេញនេះត្រូវកាត់បន្ថយមានន័យថាអ៊ីរ៉ង់នឹងបាត់បង់ប្រាក់ចំណូលអស់ជាច្រើន។
មន្ត្រីការទូតអាមេរិក និងអ៊ីរ៉ង់ធ្លាប់បានចរចាគ្នា (ដោយប្រយោលដោយមានប្រទេសអូម៉ង់ធ្វើជាអ្នកសម្របសម្រួល) កាលពីសប្ដាហ៍មុនដើម្បីព្យាយាមដោះស្រាយបញ្ហានុយក្លេអ៊ែរតាមមធ្យោបាយការទូត។ លោកត្រាំទើបតែបញ្ជូននាវាចម្បាំងទៅឈប់សំចតនៅតំបន់មជ្ឈិមបូព៌ាដើម្បីត្រៀមបើកប្រតិបត្តិការសឹកបើសិនការចរចាគ្នាត្រូវបរាជ័យ។ ប្រភពខ្លះថាអាមេរិកកំពុងត្រៀមបើកប្រតិបត្តិការប្រឆាំងនឹងអ៊ីរ៉ង់រយៈពេលជាច្រើនសប្ដាហ៍។
តាមរយៈការដាក់សម្ពាធធ្ងន់ទៅលើអ៊ីរ៉ង់ដល់កម្រិតនេះមានន័យថាអ៊ីរ៉ង់ចង់ងាកទៅតាមផ្លូវណាក៏ពិបាកដែរ។ ម៉្លោះហើយ រដ្ឋាភិបាលទីក្រុងតេអេរ៉ង់ចាំបាច់ត្រូវតែធ្វើសម្បទាននៅក្នុងការចរចានុយក្លេអ៊ែរ។ វិធានការនេះក៏ស្របនឹងការចេញបទបញ្ជានីតិប្រតិបត្តិដែលចុះហត្ថលេខាដោយលោកត្រាំដើម្បីដាក់សម្ពាធសេដ្ឋកិច្ចទៅលើអ៊ីរ៉ង់។ បទបញ្ជានោះចែងថាប្រទេសណាហ៊ានធ្វើពាណិជ្ជកម្មជាមួយអ៊ីរ៉ង់នឹងត្រូវអាមេរិកដំឡើងពន្ធគយ២៥%ទៅលើទំនិញរបស់ប្រទេសនោះ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ