ខេត្តកំពង់ស្ពឺ ៖ មនុស្សចំនួន០២នាក់បានស្លាប់ភ្លាមៗនៅកន្លែងកើតហេតុ និងមនុស្សចំនួន០៣នាក់ផ្សេងទៀតបានរងរបទសធ្ងន់ធ្ងរ ត្រូវបានរថយន្តសាមុយដឹកយកទៅសង្គ្រោះព្យាបាលនៅមន្ទីរពេទ្យ ខណៈដែលម៉ូតូសង់០២គ្រឿងបុកគ្នាពេញទំហឹង ខ្ទាតចូលក្រោមរថយន្តបុកកិនតែម្តង។
ក្រោយកើតហេតុ អ្នកបើកបររថយន្តបានបន្ថែមល្បឿនគេចពីកន្លែងកើតហេតុចតរថយន្តទុកចោលរត់បាត់ស្រមោល។
ហេតុការណ៍ម៉ូតូសង់០២គ្រឿងបុកគ្នាបណ្តាលឱ្យមនុស្ស០២នាក់ស្លាប់ និង០៣នាក់រងរបួសបានកើតឡើងកាលពីវេលាម៉ោង៧យប់ថ្ងៃទី១៤ ខែកុម្ភ: ឆ្នាំ២០២៦ នៅលើផ្លូវក្រាលកៅស៊ូ ត្រង់ចំណុចភូមិទួលវិហារ ឃុំចាន់សែន ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបាននិយាយឱ្យដឹងថា នៅមុនពេលកើតហេតុមានម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០១៣ ពណ៌ខ្មៅ ពាក់ផ្លាកលេខកំពង់ស្ពឺ 1E-4396 បើកបរដោយឈ្មោះ ទូច ឌីណា ភេទប្រុស អាយុ១៦ឆ្នាំ(រងរបួសធ្ងន់ធ្ងរ) មុខរបរកម្មករ រោងចក្រ (មិនមានពាក់មួកសុវត្ថិភាព) រស់នៅក្នុងភូមិកណ្ដាល ឃុំមានជ័យ ស្រុកសាមគ្គីមុនីជ័យ បានបើកបរតាមបណ្តោយផ្លូវក្រាលកៅស៊ូក្នុងទិសដៅពីទិសខាងកើតទៅទិសខាងលិច លុះពេលបើកបរដល់ចំណុចកើតហេតុខាងលើបានបើកទៅបុកជាមួយម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០២១ពណ៌ខ្មៅ ពាក់ផ្លាកលេខ កំពង់ស្ពឺ1R-3887 បើកបរដោយឈ្មោះ ខន មករា ភេទប្រុស អាយុ ២៦ឆ្នាំ(រងរបួសធ្ងន់ធ្ងរ) មុខរបរកម្មករ រោងចក្រ (មិនមានពាក់មួកសុវត្ថិភាពនោះទេ)រស់នៅក្នុងភូមិកណ្ដាល ឃុំមានជ័យ ស្រុកសាមគ្គីមុនីជ័យ និងអ្នករួមដំណើរចំនួន ០៣នាក់ទៀត÷ ទី១/ឈ្មោះ ម៉ៅ លីដា ភេទស្រី អាយុ ៣៤ឆ្នាំ(បានស្លាប់ភ្លាមៗនៅកន្លែងកើតហេតុ) មុខរបរកម្មកររោងចក្រ (មិនមានពាក់មួកសុវត្ថិភាពទេ) ទី២/ឈ្មោះ ហាន រិទ្ធ ភេទស្រី អាយុ ២០ឆ្នាំ (បានស្លាប់ភ្លាមៗនៅកន្លែងកើតហេតុ) មុខរបរកម្មករ រោងចក្រ (មិនមានពាក់មួកសុវត្ថិភាពទេ) និងទី៣/ឈ្មោះ សំអាត ថៃ ភេទប្រុស អាយុ ០៣ឆ្នាំ(រងរបូសធ្ងន់ធ្ងរ)ទាំង០៣នាក់ រស់នៅក្នុងភូមិព្រៃជង្រុក ឃុំមានជ័យ ស្រុកសាមគ្គីមុនីជ័យ ខេត្តកំពង់ស្ពឺ ដែលកំពុងបើកបរក្នុងទិសដៅស្របគ្នា ពេញទំហឹង បណ្តាលឱ្យឈ្មោះ ម៉ៅ លីដា ឈ្មោះ ហាន រិទ្ធ និង ឈ្មោះ សំអាត ថៃ ដួលខ្ទាតចូលក្រោមរថយន្តមួយគ្រឿង ម៉ាកហ៊ីយ៉ាន់ដាយ (HYUNDAI)ពណ៌ ខៀវ ពាក់ផ្លាកលេខ កំពង់ស្ពឺ 3A-6128 អ្នកបើកបរមិនទាន់ស្គាល់អត្តសញ្ញាណ (ក្រោយពេលកើតហេតុបានបើកបរបន្តដំណើរទៅមុខគេចខ្លួនបាត់) ។
នគរបាលស្រុកសាមគ្គីមុនីជ័យបានបន្តឱ្យដឹងថា បន្ទាប់ពីកើតហេតុរួច នគរបាលជំនាញធ្វើការស្រាវជ្រាវ រហូតដល់វេលាម៉ោង១១និង១៥នាទីរំលងអាធ្រាត្រថ្ងៃទី១៤ ខែកុម្ភៈ ឆ្នាំ២០២៦ ទើបកម្លាំងជំនាញបានស្រាវជ្រាវរកឃើញរថយន្តខាងលើដែលអ្នកបើកបរយកមកប្លុងទុកចោលនៅចំណុចដីឡូតិ៍មួយកន្លែងខាងកើតភូមិក្រាំងទំនប់ ឃុំចាន់សែន ស្រុកសាមគ្គីមុនីជ័យ ដែលកំពុងបើកបរក្នុងទិសដៅបញ្ច្រាសគ្នា បណ្តាលឲ្យស្លាប់មនុស្សចំនួន០២នាក់ និងរងរបួសធ្ងន់ធ្ងរចំនួន០៣នាក់។
នគរបាលស្រុកសាមគ្គីមុនីជ័យបានបញ្ជាក់ថា ក្រោយកើតហេតុនគរបាលជំនាញបានធ្វើការវាស់វែង ដឹកជនរងគ្រោះរងរបួសធ្ងន់ធ្ងរយកទៅសង្គ្រោះព្យាបាលនៅមន្ទីរពេទ្យភ្លាមៗ។ និងបានធ្វើកំណត់ហេតុប្រគល់-ទទួលសពរងគ្រោះទាំង០២នាក់ជូនសាច់ញាតិក្រុមគ្រួសារដើម្បីយកទៅធ្វើបុណ្យតាមប្រពៃណី។
ចំពោះវត្ថុតាងរថយន្តនិងម៉ូតូខាងលើនគរបាលស្រុកសាមគ្គីមុនីជ័យបានអូសយកទៅរក្សាទុកនៅអធិការដ្ឋាននគរបាលស្រុកសាមគ្គីមុនីជ័យបណ្តោះអាសន្ន រង់ចាំកសាងសំណុំរឿង ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ