រាជធានីភ្នំពេញ ៖ ព័ត៌មានបន្ថែមជុំវិញករណីអគ្គិភ័យនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញនោះ បានបំផ្លាញផ្ទះអស់ចំនួន៣ល្វែង ដែលមានម្ចាស់តែមួយ ។ ក្នុងនោះមានផ្ទះលក់សំបកកង់រថយន្ត១ល្វែង…
រាជធានីភ្នំពេញ ៖ ព័ត៌មានបន្ថែមជុំវិញករណីអគ្គិភ័យនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញនោះ បានបំផ្លាញផ្ទះអស់ចំនួន៣ល្វែង ដែលមានម្ចាស់តែមួយ ។ ក្នុងនោះមានផ្ទះលក់សំបកកង់រថយន្ត១ល្វែង ផ្ទះលក់កង់អាគុយ ,ម៉ាសុីនត្រជាក់១ល្វែង និងផ្ទះលក់ភេសជ្ជៈ១ល្វែង ដោយខាតបង់ប្រាក់រាប់ម៉ឺនដុល្លារ ។ មិនតែប៉ុណ្ណោះក៏បានបណ្ដាលឲ្យមន្ត្រីពន្លត់អគ្គិភ័យរងរបួសទៀតផង និងត្រូវក្រុមរុករកនិងសង្គ្រោះអង្គភាព៧១១ ដឹកទៅសង្គ្រោះនៅមន្ទីរពេទ្យ ហើយក៏មានរថយន្តពេទ្យចំនួន៣គ្រឿងប្រចាំការរង់ចាំសង្គ្រោះអ្នករងបួសនៅទីតាំងកើតហេតុនោះផងដែរ នេះបើតាមការឲ្យដឹងបឋមពីសមត្ថកិច្ច ។
សមត្ថកិច្ចបានដាក់សង្ស័យជំហានដំបូងថា គ្រោះអគ្គិភ័យនេះអាចបណ្ដាលមកពីឆ្លងចរន្តអគ្គិសនី ហើយនៅពេលនោះមានរថយន្តពន្លត់អគ្គិភ័យជាច្រើនគ្រឿងចេញទៅបាញ់ពន្លត់ភ្លើង ។ ប៉ុន្តែគិតត្រឹមវេលាម៉ោង១១និង៣០នាទីយប់ថ្ងៃកើតហេតុដដែលនោះ ភ្លើងនៅពុំទាន់រលត់ទាំងស្រុងនៅឡើយ ហើយក្រុមអ្នកពន្លត់អគ្គិភ័យនៅតែបន្តការងាររបស់ខ្លួនមិនដកថយឡើយ ។
សូមបញ្ជាក់ថា បើយោងតាមប្រភពព័ត៌មានបឋមពីសមត្ថកិច្ច ហេតុការណ៍ខាងលើនោះបានកើតឡើង កាលពីវេលាម៉ោងប្រមាណ៩យប់ ថ្ងៃទី១៤ ខែកុម្ភៈ ឆ្នាំ២០២៦ ស្ថិតនៅតាមបណ្ដោយមហាវិថីចោមចៅ (ផ្លូវវ៉េងស្រេង) ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ប្រភពដដែលបានឲ្យដឹងទៀតថា មុនដំបូងភ្លើងបានឆាបឆេះផ្ទះលក់សំបកកង់រថយន្ត បន្ទាប់មកក៏ឆេះរាលដាលយ៉ាងលឿនដល់ផ្ទះដែលស្ថិតនៅជាប់គ្នានោះច្រើនខ្នងទៀត ហើយក៏ឆេះរាលដល់រថយន្តព្រមទាំងទ្រព្យសម្បត្តិនិងសម្ភារៈផ្សេងទៀតផងដែរ ។ នៅពេលមានហេតុការណ៍អាក្រក់បែបនេះកើតឡើង កម្លាំងអាជ្ញាធរនិងសមត្ថកិច្ចបានចេញអន្ដរាគមន៍ ចំណែករថយន្តពន្លត់អគ្គិភ័យ និងកម្លាំងសមត្ថកិច្ចពន្លត់អគ្គិភ័យ ក៏បានទៅដល់ទីនោះជាបន្តបន្ទាប់ ធ្វើការពន្លត់ភ្លើងយ៉ាងស្វិតស្វាញ ៕
ចែករំលែកព័តមាននេះ