ទីក្រុងប៉េកាំង៖ ថ្ងៃនេះ ប្រទេសចិនកោះហៅឯកអគ្គរដ្ឋទូតប្រទេស១ចំនួនទៅឆ្លើយបំភ្លឺ និងបង្ហាញការមិនពេញចិត្តករណីដែលពួកគេធ្វើអត្ថាធិប្បាយពាក់ព័ន្ធនឹងការកាត់ទោសលោកជីមីឡៃ (Jimmy Lai) ជាអតីតចាងហ្វាងសារព័ត៌មានអេផល ដេលី (Apple Daily)…
ទីក្រុងប៉េកាំង៖ ថ្ងៃនេះ ប្រទេសចិនកោះហៅឯកអគ្គរដ្ឋទូតប្រទេស១ចំនួនទៅឆ្លើយបំភ្លឺ និងបង្ហាញការមិនពេញចិត្តករណីដែលពួកគេធ្វើអត្ថាធិប្បាយពាក់ព័ន្ធនឹងការកាត់ទោសលោកជីមីឡៃ (Jimmy Lai) ជាអតីតចាងហ្វាងសារព័ត៌មានអេផល ដេលី (Apple Daily) ដែលគាំទ្រលទ្ធិប្រជាធិបតេយ្យ និងតែងតែរិះគន់រដ្ឋាភិបាលចិន។ គាត់ត្រូវតុលាការទីក្រុងហុងកុងផ្ដន្ទាទោសឱ្យជាប់ពន្ធនាគារម្ភៃឆ្នាំពីបទឃុបឃិតជាមួយបរទេស និងពីបទផ្សព្វផ្សាយអត្ថបទញុះញង់ឱ្យមានអំពើបះបោរ។
ការិយាល័យទំនាក់ទំនងការបរទេសចិនប្រចាំទីក្រុងហុងកុងថ្លែងថាខ្លួនបានកោះហៅអ្នកគ្រប់គ្រងស្ថានបេសកកម្មរបស់អង់គ្លេស អាមេរិក អូស្ត្រាលី និងសហភាពអឺរ៉ុបដែលបានបញ្ចេញមតិបែបអវិជ្ជមានចំពោះដំណើរការកាត់ក្ដីលោកជីមីឡៃ។ ការិយាល័យដដែលនេះថ្លែងថាខ្លួនមិនពេញចិត្តទាល់តែសោះ និងសូមប្រឆាំងជាដាច់ខាតចំពោះការបញ្ចេញមតិនោះ។
ការិយាល័យសូមឱ្យរដ្ឋាភិបាលប្រទេសទាំងនោះគោរពអធិបតេយ្យភាពរបស់ប្រទេសចិន និងគោរពប្រព័ន្ធនីតិរដ្ឋនៅទីក្រុងហុងកុង ព្រមទាំងឈប់ធ្វើអត្ថាធិប្បាយដែលគ្មានការទទួលខុសត្រូវពាក់ព័ន្ធនឹងបញ្ហាសន្តិសុខជាតិ និងឈប់ជ្រៀតជ្រែកកិច្ចការផ្ទៃក្នុងរបស់ទីក្រុងហុងកុង និងប្រទេសចិន។ ក្រោយការកាត់ទោសលោកជីមីឡៃ ក្រុមបស្ចិមប្រទេសចោទជាសំណួរអំពីឯករាជ្យភាពរបស់ប្រព័ន្ធតុលាការនៅទីក្រុងហុងកុង និងសម្ដែងការព្រួយបារម្ភយ៉ាងខ្លាំងចំពោះការដាក់ទោសធ្ងន់ពេករហូតដល់ម្ភៃឆ្នាំប្រៀបបាននឹងឱ្យលោកជីមីឡៃស្លាប់នៅក្នុងគុកតែម្ដងព្រោះគាត់អាយុ៧៨ឆ្នាំ និងមានជំងឺធ្ងន់ៗប្រចាំកាយដូចជាលើសសម្ពាធឈាម និងជំងឺបេះដូងជាដើម។
នៅអំឡុងពេលជួបគ្នារវាងអ្នកតំណាងប្រទេសចិនជាមួយអ្នកតំណាងស្ថានបេសកកម្មប្រទេសទាំងប៉ុន្មានខាងលើនេះ មន្ត្រីរដ្ឋាភិបាលចិនសម្ដែងការខកចិត្តយ៉ាងខ្លាំង ហើយក៏ប្រឆាំងជំទាស់យ៉ាងខ្លាំងផងដែរទៅនឹងការធ្វើអត្ថាធិប្បាយរបស់ពួកគេ។ មន្ត្រីរដ្ឋាភិបាលចិនចាត់ទុកថាការបញ្ចេញមតិទាំងនោះប្រៀបបាននឹងការធ្វើផ្គើនដាក់ប្រព័ន្ធយុត្តិធិការរបស់ទីក្រុងហុងកុងដូច្នោះដែរ។ តាមរយៈការកោះហៅមន្ត្រីការទូតជាន់ខ្ពស់ទៅឆ្លើយបំភ្លឺ និងសម្ដែងការកើតទុក្ខមិនសុខចិត្តដូចខាងលើនេះ ប្រទេសចិនចង់ផ្ញើសារនយោបាយឱ្យបានច្បាស់ៗប្រាប់ទៅពួកគេថារាល់ការដាក់សម្ពាធពីខាងក្រៅទៅលើកិច្ចការច្បាប់នៅក្នុងដែនសមត្ថកិច្ចរបស់ចិននឹងមិនត្រូវបានអត់ឱនជាដាច់ខាត៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ