រាជធានីភ្នំពេញ ៖ ពិតជាចំណេះជិះកឯងមែន បុរសម្នាក់បានខ្ចីម៉ូតូអ្នកស្គាល់គ្នា ជិះដោយកុហកថា ទៅមើលបងប្អូនគ្រោះថ្នាក់ចរាចរណ៍ បន្ទាប់មក ក៏ជិះយកទៅដាក់បញ្ចាំ អស់២គ្រឿង យកលុយលេងល្បែងជល់មាន់អនឡាញតាមទូរសព្ទដៃចាញ់អស់…
រាជធានីភ្នំពេញ ៖ ពិតជាចំណេះជិះកឯងមែន បុរសម្នាក់បានខ្ចីម៉ូតូអ្នកស្គាល់គ្នា ជិះដោយកុហកថា ទៅមើលបងប្អូនគ្រោះថ្នាក់ចរាចរណ៍ បន្ទាប់មក ក៏ជិះយកទៅដាក់បញ្ចាំ អស់២គ្រឿង យកលុយលេងល្បែងជល់មាន់អនឡាញតាមទូរសព្ទដៃចាញ់អស់ រួចប្រឌិតរឿងថា ត្រូវចោរប្លន់។ ពេលនោះ បង្កឲ្យមានការភ្ញាក់ផ្អើលដល់នគរបាលខណ្ឌពោធិ៍សែនជ័យ ចុះទៅធ្វើការស្រាវជ្រាវ ព្រមទាំងហៅទៅសួរនាំដេញដោលតាមជំនាញ រហូតបុរសនេះលាក់បាំងលែងជិត ក៏ប្រាប់ការពិតដល់នគរបាល និងត្រូវនគរបាលឃាត់ខ្លួនចាត់ការតាមច្បាប់តែម្ដង ។
ហេតុការណ៍នោះ បានកើតឡើងកាលពីវេលាម៉ោង១០យប់ថ្ងៃទី១២ ខែកុម្ភៈ ឆ្នាំ២០២៦ នៅតាមផ្លូវខ្នងប្រឡាយទួលពង្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
បុរសនោះឈ្មោះ ហឿន ម៉ាន អាយុ២៦ឆ្នាំ មុខរបរកម្មករសំណង់ មានស្រុកកំណើតនៅភូមិបឹងដោ ស្រុកព្រះស្ដេច ខេត្តព្រៃវែង និងស្នាក់នៅក្នុងការដ្ឋានសំណង់ភូមិក្រាំងធ្នង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
នគរបានបានប្រាប់ថា កាលពីវេលាម៉ោង១១ព្រឹកថ្ងៃទី១០ ខែកុម្ភៈ ឆ្នាំ២០២៦ ជនសង្ស័យរូបនេះ បានខ្ចីម៉ូតូ ១គ្រឿងម៉ាកហុងដាសេ១២៥ ស៊េរីឆ្នាំ២០២១ ពណ៍ខ្មៅ ពាក់ស្លាកលេខ បាត់ដំបង1A-7527 ។ ពីបុរសម្នាក់ឈ្មោះ មាស មូល អាយុ៤៦ឆ្នាំ មុខរបរជាងសំណង់ មានទីលំនៅភូមិអូរជ្រៃ ស្រុកភ្នំព្រឹក ខេត្តបាត់ដំបង បច្ចុប្បន្ន ស្នាក់នៅក្នុងការដ្ឋានសំណង់ក្នុងភូមិចំការព្រីង សង្កាត់គោកឃ្លាង ខណ្ឌសែនសុខ រាជធានីភ្នំពេញ ។ ដោយកុហកថា ខ្ចីជិះទៅមើលបងប្អូនគ្រោះថ្នាក់ចរាចរណ៍ បន្ទាប់មក ក៏ជិះយកទៅដាក់បញ្ចាំ បានប្រាក់ចំនួន៤៥០ដុល្លារ រួចយកទៅលេងល្បែងមាន់អនឡាញតាមទូរសព្ទ ចាញ់អស់គ្មានសល់ ។
នគរបាល បានប្រាប់បន្តថា ក្រោយមកម្ចាស់ម៉ូតូ បានខលរកឲ្យយកម៉ូតូឲ្យវិញ ហើយជនសង្ស័យឈ្មោះ ហឿន ម៉ាន បានរកលេសកុហករហូត ព្រោះតែខ្លួនបានយកម៉ូតូនោះទៅបញ្ចាំបាត់ហើយ បន្ទាប់មកគ្មានពាក្យដោះសារជាមួយម្ចាស់ម៉ូតូតទៅទៀត ជននោះក៏បានបិទទូរសព្ទចោលលែងឲ្យម្ចាស់ម៉ូតូខលចូលបានឡើយ។ រហូតដល់វេលាម៉ោង១០យប់ថ្ងៃទី១២ ខែកុម្ភៈ ឆ្នាំ២០២៦ ជនសង្ស័យខាងលើ ក៏ប្រឌិតរឿងថា ខណៈខ្លួនជិះម៉ូតូហុងដាឌ្រីមសេ១២៥ ដែលខ្ចីពីជនរងគ្រោះឈ្មោះមាស មូល នៅតាមផ្លូវខ្នងប្រឡាយទួលពង្រ ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក៏ត្រូវចោរប្លន់យកម៉ូតូនោះទៅបាត់ហើយ ។
នគរបាលខាងលើបានប្រាប់បន្ថែមទៀតថា ខណៈនោះជនសង្ស័យ បានហៅអ្នកសារព័ត៌មាន ទៅថតឡាយនៅកន្លែង ដែលរូបគេអះអាងថា ត្រូវចោរប្លន់នោះទៀតផង បង្កឲ្យមានការភ្ញាក់ផ្អើលទាំងយប់។ ពេលនោះ លោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ ចុះទៅធ្វើការស្រាវជ្រាវទាំងយប់ និងបានហៅជននោះ ទៅសួរនាំដេញដោលតាមជំនាញ រហូតជនសង្ស័យរូបនេះ លាក់បាំងរឿងប្រឌិតលែងជិត ក៏ប្រាប់ការពិតទាំងអស់ ដល់នគរបាល ។
នគរបាលដដែល បានបញ្ជាក់ប្រាប់ផងដែរថា មិនតែប៉ុណ្ណោះ ក្រោយពេលសួរនាំចុះឡើងៗ ក៏ធ្លាយរឿង ១ករណីទៀត គឺនៅថ្ងៃទី១២ ខែកុម្ភៈនោះ ជនសង្ស័យក៏បានខ្ចីម៉ូតូគេ ១គ្រឿងទៀត ម៉ាកស៊ុយហ្ស៊ុយគីនិច ពណ៍ខ្មៅ លាយក្រហម ស៊េរីឆ្នាំ២០១៧ មិនចាំស្លាកលេខទៅដាក់បញ្ចាំ បានប្រាក់ចំនួន ១,១០០,០០០រៀល (មួយលានដប់ម៉ឺនរៀល) រួចយកទៅលេងល្បែងមាន់អនឡាញចាញ់អស់ទៀត ។ ប៉ុន្តែនៅពុំទាន់រកម្ចាស់ម៉ូតូស៊ុយហ្ស៊ុយគីនិចនោះ ឃើញនៅឡើយទេ ហើយក្រោយពីទទួលបានចម្លើយសារភាពខាងលើនោះហើយ នគរបាលខណ្ឌពោធិ៍សែនជ័យ ក៏បានឃាត់ខ្លួនជននេះ បន្ទាប់មកប្រគល់ទៅឲ្យនគរបាលអធិការដ្ឋានខណ្ឌសែនសុខ នាំយកទៅចាត់ការចាត់ការតាមច្បាប់តែម្ដង ។
នៅពេលនោះ ជនសង្ស័យក៏បានលើដៃសំពះសុំទោសនគរបាល និងមហាជនទូទៅ ព្រមទាំងនិយាយផ្ដាំផ្ញើផងដែរថា កុំឲ្យលេងល្បែងជល់មាន់តាមអនឡាញដូចជារូបខ្លួន ព្រោះលេងមិនឈ្នះនោះទេ ក្រុមអ្នកគ្រប់គ្រងល្បែងអនឡាញនោះឲ្យយើងឈ្នះ តែដំបូង១ដង ឬ២ដងប៉ុណ្ណោះ ក្រោយមកពួកគេ មិនឲ្យយើងឈ្នះឡើយ ទោះមានប្រាក់ប៉ុន្មានក៏ចាញ់អស់ដែរ ៕
ចែករំលែកព័តមាននេះ