រាជធានីភ្នំពេញ ៖ ផ្ទះធ្វើពីឈើលើ ថ្មក្រោម ចំនួន៣ខ្នង ត្រូវបានអគ្គិភ័យឆាបឆេះរាលដាលជាបន្តបន្ទាប់រងការខូចខាតទាំងស្រុង និងឆេះរោលជញ្ជាំង២ខ្នងទៀត ព្រមទាំងបង្កឲ្យមនុស្សរងរបួសចំនួន៣នាក់ បន្ទាប់ពីម្ចាស់ផ្ទះមួយខ្នង បានឆ្អើរត្រី…
រាជធានីភ្នំពេញ ៖ ផ្ទះធ្វើពីឈើលើ ថ្មក្រោម ចំនួន៣ខ្នង ត្រូវបានអគ្គិភ័យឆាបឆេះរាលដាលជាបន្តបន្ទាប់រងការខូចខាតទាំងស្រុង និងឆេះរោលជញ្ជាំង២ខ្នងទៀត ព្រមទាំងបង្កឲ្យមនុស្សរងរបួសចំនួន៣នាក់ បន្ទាប់ពីម្ចាស់ផ្ទះមួយខ្នង បានឆ្អើរត្រី ទុកចោល ។
ហេតុការណ៍អគ្គិភ័យនេះ បានកើតឡើងនៅវេលាម៉ោង១៤និង៥៥នាទីរសៀលថ្ងៃទី១៣ ខែកុម្ភៈ ឆ្នាំ២០២៦ នៅចំណុច ផ្ទះលេខ២០ ផ្លូវ៣២៤ ក្រុមទី២០ ភូមិ៧ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមសាក្សីបានឱ្យដឹងថា នៅមុនពេលកើតហេតុ គេឃើញភ្លើងបានឆាប់ឆេះយ៉ាងសន្ធោសន្ធៅ ចេញពីផ្ទះឈើលើថ្មក្រោមខាងលើ យ៉ាងសន្ធោសន្ធៅ និងរាលដាលយ៉ាងឆាប់រហ័ស បង្កឲ្យមានការភ្ញាក់ផ្អើលដល់ប្រជាពលរដ្ឋ នាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យជាច្រើនគ្រឿង ទៅអន្តរាគមន៍ ។
តាមព័ត៌មានឱ្យដឹងទៀតថា នៅមុនពេលកើតហេតុ ម្ចាស់បានឆ្អើរត្រី រួចទុកចោល ស្រាប់តែក្រោយមកភ្លើង បានឆាប់ឆេះតែម្ដង ។
តាមនគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា នៅក្នុងហេតុការណ៍នោះ រថយន្តពន្លត់អគ្គិភ័យចំនួន ២៤គ្រឿង បានទៅអន្តរាគមន៍ បាញ់ទឹកពន្លត់នៅក្នុងនោះ រថយន្តរបស់ការិយាល័យពន្លត់អគ្គិភ័យ ចំនួន ១៧គ្រឿង ប្រើប្រាស់ទឹកអស់ចំនួន ១៤ឡាន ស្មើនឹង៥៦ម៉ែត្រគូប,រថយន្តអគ្គិភ័យក្រសួងមហាផ្ទៃ ចំនួន ០៣គ្រឿង ប្រើប្រាស់ទឹកអស់ចំនួន ០២ឡាន ស្មើនឹង១២ម៉ែត្រគូប, រថយន្តអគ្គិភ័យកងរាជអាវុធហត្ថ ចំនួន ០៣គ្រឿង ពុំទាន់ប្រើប្រាស់ទឹក និងរថយន្តអគ្គិភ័យ ស្រាបៀរកម្ពុជា ចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប ហើយភ្លើងបានរលត់ទៅវិញ នៅម៉ោង៤រសៀល នាថ្ងៃខែ ឆ្នាំដដែល ។
តាមនគរបាល បានឲ្យដឹងទៀតថា អគ្គិភ័យនេះ បណ្ដាលឲ្យផ្ទះធ្វើពីឈើលើថ្មក្រោមចំនួន ០៣ខ្នង រួមទាំងសម្ភារៈ ត្រូវភ្លើងឆេះរងការខូចខាតទាំងស្រុង និងឆេះរោលជញ្ជាំងផ្ទះថ្ម ចំនួន ០២ខ្នង ព្រមទាំងបង្កឲ្យរបួសមនុស្សប្រុស ចំនួន ០៣នាក់ បានរងរបួសនៅក្នុងនោះ ២នាក់ជាក្រុមជំនួយស្ម័គ្រចិត្ត ។
ទាក់ទិនមូលហេតុដែលកើតមានអគ្គិភ័យនេះ គឺបណ្ដាលមកពីដុតឡសម្ងួតត្រីឆ្អើរ បង្កជាអគ្គិភ័យ ៕
ចែករំលែកព័តមាននេះ