ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ចាប់ផ្ដើមទាមទារពីក្រុមបស្ចិមប្រទេសនូវមីស៊ីលការពារដែនអាកាសម៉ាកផេទ្រាត (Patriot) ដែលត្រូវបញ្ជូនទៅឱ្យអ៊ុយក្រែនជាទៀងទាត់ និងជារៀងរាល់ថ្ងៃដើម្បីទប់ទល់នឹងការវាយប្រហាររបស់រុស្ស៊ី។ ម៉្យាងទៀត លោកថាគ្រឿងបរិក្ខារយោធាដែលបញ្ជូនតាមរយៈអង្គការណាតូគួរណាស់បញ្ជូនទៅឱ្យបានឆាប់រហ័សជាងពេលបច្ចុប្បន្ន។
លោកហ្សេឡិនស្គីថ្លែងដូចខាងលើនេះបន្ទាប់ពីរុស្ស៊ីវាយប្រហារដោយមីស៊ីល និងដ្រូនទូទាំងប្រទេសអ៊ុយក្រែនកាលពីយប់មិញ និងពេលទៀបភ្លឺបណ្ដាលឱ្យស្លាប់មនុស្ស២នាក់ និងរបួសជាងដប់នាក់។ កាលពីមុននេះមួយថ្ងៃ រុស្ស៊ីបានវាយប្រហារតំបន់ខាគីវបណ្ដាលឱ្យស្លាប់មនុស្សបួននាក់។ ក្នុងនោះគ្រាន់តែកុមារមានរហូតដល់ទៅបីនាក់ឯណោះ។ មេដឹកនាំអ៊ុយក្រែនរូបនេះថ្លែងថាគោលដៅសំខាន់នៃការវាយប្រហារនោះគឺទីតាំងផលិតថាមពល។
ជានិច្ចកាល រុស្ស៊ីច្រើនវាយប្រហារទីតាំងផលិតថាមពលរបស់អ៊ុយក្រែននៅរដូវរងាដើម្បីធ្វើឱ្យជនស៊ីវិលគ្មានអ្វីសម្រាប់កម្ដៅខ្លួន។ ការវាយប្រហាររបស់រុស្ស៊ីលើកចុងក្រោយនេះប្រើប្រាស់ដ្រូន២១៩គ្រឿង, មីស៊ីលផ្លោង២៤គ្រាប់ និងមីស៊ីលបាញ់ចេញពីយន្តហោះ១គ្រាប់។ ការវាយប្រហារនេះកើតឡើងមុនគម្រោងជួបគ្នាត្រីភាគី។ វិមានក្រឹមឡាំងថាជួបគ្នានៅសប្ដាហ៍ក្រោយ។ ប៉ុន្តែទីតាំងមិនទាន់កំណត់ជាក់លាក់នៅឡើយទេ។ ប្រភពខ្លះថាអាចនឹងជួបគ្នានៅអាប៊ូដាប៊ីដដែល ឬអាចនៅទីក្រុងម៉ាយអាមី (Miami) ប្រទេសអាមេរិក។
លោកដូណាល់ត្រាំកំណត់យកខែមិថុនាខាងមុខនេះជាកាលបរិច្ឆេទដែលត្រូវតែសម្រេចឱ្យបានកិច្ចព្រមព្រៀងសន្តិភាព។ ប៉ុន្តែការដែលរុស្ស៊ី និងអ៊ុយក្រែនបន្តវាយប្រហារគ្នាទៅវិញទៅមកបែបនេះអាចបង្កបញ្ហាសម្រាប់កិច្ចខិតខំប្រឹងប្រែងស្វែងរកចំណុចឯកភាពគ្នា។ គូជម្លោះទាំង២មិនសូវមានទំនុកចិត្តលើគ្នាប៉ុន្មានទេ ហើយក៏មិនសូវធ្វើល្អដាក់គ្នានោះដែរ។ លោកហ្សេឡិនស្គីបង្ហោះសារនៅលើបណ្ដាញអ៊ិចថាយើងត្រូវតែមានវិធីការពារអាយុជីវិតរបស់មនុស្សពីការវាយប្រហារទាំងនេះ។
លោកថាវិធីការពារដ៏មានប្រសិទ្ធភាពបំផុតក្នុងទប់ទល់នឹងគ្រាប់មីស៊ីលផ្លោងរបស់រុស្ស៊ីគឺប្រព័ន្ធមីស៊ីលផេទ្រាត។ គ្រាប់មីស៊ីលសម្រាប់បំពាក់នៅលើជើងទម្រត្រូវតែបញ្ជូនទៅដល់ដៃអ៊ុយក្រែនជារៀងរាល់ថ្ងៃ។ លោកសូមអរគុណបណ្ដាប្រទេសនានាដែលចូលរួមចំណែកក្នុងការផ្ដល់គ្រឿងបរិក្ខារយោធាសម្រាប់អ៊ុយក្រែន។ អ្វីគ្រប់យ៉ាងដែលមាននៅក្នុងកម្មវិធីផ្ដល់ជំនួយនោះត្រូវតែបញ្ជូនឱ្យបានឆាប់រហ័សជាងនេះ។ លោកសូមអរគុណថ្នាក់ដឹកនាំប្រទេសនានាដែលយល់អំពីបញ្ហានេះ ហើយបន្តផ្ដល់ជំនួយទៅឱ្យអ៊ុយក្រែន៕ ប្រភព៖ ញូស្វីក (Newsweek) និងប្រភពដទៃទៀត
ចែករំលែកព័តមាននេះ