រឿងកែច្នៃសំរាមបំប្លែងទៅជាថាមពលអគ្គិសនី និងផលិតផលផ្សេងៗនៅកម្ពុជា មានក្រុមហ៊ុនចាប់អារម្មណ៍ជាបន្តបន្ទាប់ ប៉ុន្តែភាគច្រើន គឺបានត្រឹមតែមកហើយបំផើមចោល ប៉ុន្តែក្រុមហ៊ុនបារាំង ២ឃើញមានវឌ្ឍនភាព ។ ក្រុមហ៊ុនទាំងពីរនោះ គឺក្រុមហ៊ុន…
រឿងកែច្នៃសំរាមបំប្លែងទៅជាថាមពលអគ្គិសនី និងផលិតផលផ្សេងៗនៅកម្ពុជា មានក្រុមហ៊ុនចាប់អារម្មណ៍ជាបន្តបន្ទាប់ ប៉ុន្តែភាគច្រើន គឺបានត្រឹមតែមកហើយបំផើមចោល ប៉ុន្តែក្រុមហ៊ុនបារាំង ២ឃើញមានវឌ្ឍនភាព ។
ក្រុមហ៊ុនទាំងពីរនោះ គឺក្រុមហ៊ុន Vinci Construction និងក្រុមហ៊ុន SUEZ ដោយគណប្រតិភូមួយក្រុម ដឹកនាំដោយ ថូម៉ាស ចូវូ (Thomas CHAUVEAU)នាយកគ្រប់គ្រងផ្នែកប្រតិបត្តិការថាមពល និងអាជីវកម្មថ្មីៗនៃក្រុមហ៊ុន Vinci Construction ចូលជួបលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីព្រឹកថ្ងៃទី ១២ ខែកុម្ភៈ ឆ្នាំ២០២៦ ។
នៅក្នុងជំនួបក្រុមហ៊ុនទាំងពីរ បានធ្វើបទបង្ហាញជូន លោកឧបនាយករដ្ឋមន្ត្រី អំពីរបាយការណ៍នៃការសិក្សាសមិទ្ធលទ្ធភាពគម្រោង «សួនកែច្នៃកាកសំណល់» នៅកម្ពុជា ដោយផ្តោតនៅលើបច្ចេកវិទ្យាសម្រាប់ប្រព្រឹត្តកម្មសំណល់រឹងក្នុងទីក្រុង និងការផលិតថាមពល ។
តាមស្ថិតិរបស់ក្រសួងបរិស្ថានបានឲ្យដឹងថា ក្នុងមួយថ្ងៃកម្ពុជាមានសំណល់សំរាមជាង១ម៉ឺនតោន ឬស្មើជិត៤លានតោនក្នុងមួយឆ្នាំ ។
ដោយឡែក នៅរាជធានីភ្នំពេញ មានសំរាមចន្លោះពី៣ទៅ៥ពាន់តោនក្នុងមួយថ្ងៃ ក្នុងនោះ សំណល់ម្ហូបអាហារមានចំនួន៦០ភាគរយ សំណល់ថង់ប្លាសស្ទិកមាន២០ភាគរយ និងក្រៅពីនោះ គឺជាសំណល់ផ្សេងៗ ដូចជា កៅស៊ូ ក្រដាស កំណាត់ឈើជាដើម ៕
ចែករំលែកព័តមាននេះ