ជំនឿ៖ យោងតាមការស្រាវជ្រាវ និងការផ្សាយរបស់សារព័ត៌មានបរទេស បុណ្យចូលឆ្នាំចិនគឺជាពិធីបុណ្យប្រពៃណីដ៏សំខាន់ដែលតំណាងឱ្យការចាប់ផ្តើមថ្មី និងការជួបជុំក្រុមគ្រួសារយ៉ាងកក់ក្ដៅ។

សម្រាប់ឆ្នាំ២០២៦ នេះ ពេលវេលាសំខាន់ៗត្រូវបានបែងចែកជាបីថ្ងៃ ដោយចាប់ផ្ដើមពីថ្ងៃទី ១៥ ខែកុម្ភៈ ជាថ្ងៃរៀបចំទិញអីវ៉ាន់ និងគ្រឿងសក្ការៈ បន្តមកថ្ងៃទី ១៦ ខែកុម្ភៈ ជាថ្ងៃសែនព្រេនដល់ទេវតានិងបុព្វបុរស និងបញ្ចប់នៅថ្ងៃទី ១៧ ខែកុម្ភៈ ដែលជាថ្ងៃចូលឆ្នាំថ្មី ឬថ្ងៃដើរលេង ដែលគ្រប់គ្នាត្រូវស្លៀកពាក់ពណ៌ក្រហមឆើតឆាយដើម្បីទទួលលាភជ័យ។ ដើម្បីហៅហុងស៊ុយចូលផ្ទះ លោកអ្នកគួរអនុវត្តទម្លាប់ល្អៗដូចជា ការជូនក្រូច ៤ ផ្លែដល់មនុស្សចាស់ ការញ៉ាំអាហារបួសនៅព្រឹកថ្ងៃដំបូង និងការជួបជុំគ្នាញ៉ាំនំប៉ាវដែលមានរូបរាងដូចដុំប្រាក់បុរាណ ដែលជានិមិត្តរូបនៃទ្រព្យសម្បត្តិហូរចូលមិនដាច់។

ទន្ទឹមនឹងការធ្វើរឿងល្អៗ លោកអ្នកក៏ត្រូវប្រយ័ត្នចំពោះបម្រាមសំខាន់ៗដើម្បីការពារកុំឱ្យហូរលាភចេញពីផ្ទះផងដែរ។ ក្នុងថ្ងៃសិរីសួស្តីនេះ មិនគួរកក់សក់ កាត់សក់ បោសផ្ទះ ឬបោកសម្លៀកបំពាក់ឡើយ ព្រោះគេជឿថាជាការលាងជម្រះ និងបោសសម្អាតសំណាងល្អចោល។ លើសពីនេះ គួរជៀសវាងការស្លៀកពាក់ពណ៌ស ឬខ្មៅដែលតំណាងឱ្យទុក្ខសោក មិនត្រូវប្រើវត្ថុមុតស្រួចដែលប្រៀបដូចជាការកាត់ផ្ដាច់លាភជ័យ និងមិនគួរទិញស្បែកជើងថ្មីឡើយ ព្រោះវាជាប្រផ្នូលនៃទុក្ខលំបាក។

ការរៀបចំខ្លួនឱ្យបានត្រឹមត្រូវតាមក្បួនខ្នាត និងការប្រើប្រាស់ពាក្យជូនពរល្អៗ នឹងជួយឱ្យឆ្នាំថ្មីរបស់អ្នកពោរពេញដោយភាពរុងរឿង សុភមង្គល និងសិរីសួស្តីជានិរន្តរ៍​៕