សុខភាព៖ យោងតាមការផ្សាយរបស់សារព័ត៌មានបរទេស គោលដៅដើរឱ្យបាន ១០,០០០ ជំហានក្នុងមួយថ្ងៃ មានប្រភពដើមពីយុទ្ធនាការទីផ្សារឧបករណ៍វាស់ជំហានរបស់ជប៉ុនតាំងពីឆ្នាំ ១៩៦៥ ប៉ុន្តែវាបានក្លាយជាស្តង់ដាសុខភាពសកលដែលទទួលស្គាល់ដោយមជ្ឈមណ្ឌល CDC។

ការដើរបានច្រើនជួយឱ្យចង្វាក់បេះដូងប្រសើរឡើង កាត់បន្ថយកូឡេស្តេរ៉ុល បង្កើនភាពបត់បែននៃរាងកាយ និងពង្រឹងកម្លាំងសាច់ដុំ។ លើសពីនេះ វាក៏ជួយឱ្យការគេងកាន់តែស្កប់ស្កល់ និងកាត់បន្ថយហានិភ័យនៃជំងឺបាត់បង់ការចងចាំតាមវ័យផងដែរ។

យោងតាមការស្រាវជ្រាវក្នុងពេលថ្មីៗនេះ ចំនួនជំហានកាន់តែច្រើនគឺកាន់តែផ្សារភ្ជាប់ទៅនឹងការកាត់បន្ថយហានិភ័យនៃមរណភាពពីគ្រប់មូលហេតុ ជាពិសេសការដើរក្នុងល្បឿនលឿនបង្គួររយៈពេល ៣០ ទៅ ៦០ នាទី ផ្ដល់ផលចំណេញយ៉ាងច្រើនដល់សរសៃឈាមបេះដូង និងសួត។ ផ្ទុយទៅវិញ ការដើរតិចជាង ៥,០០០ ជំហានក្នុងមួយថ្ងៃ ត្រូវបានចាត់ទុកថាជាការរស់នៅបែបអសកម្ម ដែលងាយប្រឈមនឹងជំងឺពុកឆ្អឹង និងជំងឺធាត់។
​

ដើម្បីវិនិយោគលើសុខភាពតាមរយៈការដើរ លោកអ្នកគួរប្រើប្រាស់កម្មវិធីទូរស័ព្ទដើម្បីតាមដាន និងសាកល្បងបង្កើនចំនួនជំហានបន្តិចម្ដងៗពី ៥០០ ទៅ ១,០០០ ជំហានបន្ថែមរៀងរាល់សប្តាហ៍។ ការបន្ថែមបញ្ហាប្រឈមតូចៗដូចជាការដើរឆ្លាស់គ្នាជាមួយការរត់រយៈពេលខ្លី នឹងជួយបង្កើនកម្រិតដុតបំផ្លាញថាមពលឱ្យកាន់តែមានប្រសិទ្ធភាព។ ការដើរមិនត្រឹមតែជាការហាត់ប្រាណដ៏ងាយស្រួលបំផុតនោះទេ ប៉ុន្តែវាគឺជាការថែទាំសុខភាពដ៏មានតម្លៃបំផុតដែលអ្នកអាចធ្វើបានជារៀងរាល់ថ្ងៃ ដើម្បីរាងកាយមាំមួន និងស្មារតីស្រស់ថ្លា​៕