ខេត្តព្រះសីហនុ ៖ លោក អ៊ុក សំអន នាយសង្កាត់រដ្ឋបាលជលផលកំពង់ស្មាច់ បានដឹកនាំកម្លាំងសហការជាមួយសហគ្រាស ហ្វីស៊ីង អេកូឡូជីខល អេនធើប្រាយ…
ខេត្តព្រះសីហនុ ៖ លោក អ៊ុក សំអន នាយសង្កាត់រដ្ឋបាលជលផលកំពង់ស្មាច់ បានដឹកនាំកម្លាំងសហការជាមួយសហគ្រាស ហ្វីស៊ីង អេកូឡូជីខល អេនធើប្រាយ (Fishing Ecological Enterprise) ឬអង្គការសត្វខ្លាត្រី ចុះអនុវត្តការងារបច្ចេកទេសក្នុងតំបន់ការពារ នៅថ្ងៃទី១២ ខែកុម្ភៈ ឆ្នាំ២០២៦ នេះបើតាមមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ ។
ក្រុមការងារចម្រុះបានចុះពិនិត្យកាមេរ៉ាស្វ័យប្រវត្តិ (Camera Traps) ដែលបានដំឡើងនៅក្នុងតំបន់គ្រប់គ្រងធនធានជលផលសមុទ្រព្រែកកំពង់ស្មាច់ (MFMA) ស្ថិតក្នុងភូមិសាស្ត្រស្រុកព្រៃនប់ ខេត្តព្រះសីហនុ ដើម្បីកំណត់វត្តមានសត្វខ្លាត្រី និងប្រភេទសត្វកម្រដទៃទៀត ដែលរស់នៅក្នុងតំបន់ព្រៃលិចទឹក និងព្រៃកោងកាង ប្រមូលទិន្នន័យវិទ្យាសាស្ត្រ ដើម្បីដាក់ចេញ នូវវិធានការការពារ និងអភិរក្សធនធានជលផលឱ្យបានគង់វង្ស ។
តំបន់ព្រែកកំពង់ស្មាច់ គឺជាទីជម្រកដ៏សំខាន់សម្រាប់ជីវចម្រុះសមុទ្រ និងសត្វព្រៃជាច្រើនប្រភេទ ជាពិសេសគឺជាតំបន់យុទ្ធសាស្ត្រក្នុងការអភិរក្សសត្វខ្លាត្រី ដែលជាប្រភេទសត្វកំពុងរងការគំរាមកំហែង។ ការប្រើប្រាស់បច្ចេកវិទ្យាកាមេរ៉ាស្វ័យប្រវត្តិ គឺជាឧបករណ៍ដ៏មានប្រសិទ្ធភាពក្នុងការជួយដល់មន្ត្រីជំនាញ ក្នុងការអង្កេតតាមដានដោយមិនរំខានដល់ជម្រកធម្មជាតិ ៕
ចែករំលែកព័តមាននេះ