អាមេរិក-ម៉ិចស៊ិក ៖ កងម៉ារីនម៉ិចស៊ិក និងកងឆ្មាំឆ្នេរសមុទ្រអាមេរិក ចាប់គ្រឿងញៀនកូកាអ៊ីនបានជាច្រើនតោន ក្នុងប្រតិបត្តិការរួមគ្នាមួយក្នុងមហាសមុទ្រប៉ាស៊ីហ្វិក ។ នេះជាការប្រកាស កាលពីថ្ងៃទី១១ កុម្ភៈ…
អាមេរិក-ម៉ិចស៊ិក ៖ កងម៉ារីនម៉ិចស៊ិក និងកងឆ្មាំឆ្នេរសមុទ្រអាមេរិក ចាប់គ្រឿងញៀនកូកាអ៊ីនបានជាច្រើនតោន ក្នុងប្រតិបត្តិការរួមគ្នាមួយក្នុងមហាសមុទ្រប៉ាស៊ីហ្វិក ។ នេះជាការប្រកាស កាលពីថ្ងៃទី១១ កុម្ភៈ របស់កងម៉ារីនម៉ិចស៊ិក ។
កងម៉ារីនម៉ិចស៊ិកឲ្យដឹងថា ប្រតិបត្តិការនោះធ្វើឡើងក្នុងក្របខណ្ឌនៃកិច្ចសហប្រតិបត្តិការទ្វេភាគី និងហួសពីតំបន់សេដ្ឋកិច្ចដាច់មុខរបស់ម៉ិចស៊ិកមានន័យថា នៅខាងក្រៅដែនទឹកម៉ិចស៊ិក ។
ប្រតិបត្តិការរួមគ្នានេះធ្វើឡើង ពេលកំពុងមានភាពតានតឹងខ្លាំងរវាងប្រទេសទាំង២ ក្រោយការគំរាមរបស់ប្រធានាធិបតីអាមេរិកលោកដូណាំត្រាំ វាយប្រហារបណ្ដាក្រុមរត់ពន្ធគ្រឿងញៀនម៉ិចស៊ិកតាមជើងគោក និងការវាយប្រហាររបស់កងទ័ពអាមេរិក ប្រឆាំងបណ្ដានាវាដែលចោទថា ប្រើសម្រាប់ដឹកគ្រឿងញៀន ក្នុងតំបន់ការ៉ាអ៊ីប និងមហាសមុទ្រប៉ាស៊ីហ្វិក ។
កងម៉ារីនម៉ិចស៊ិកគូសបញ្ជាក់ថា ថង់ចំនួន១៨៨តំណាងឲ្យកូកាអ៊ីនច្រើនតោន ត្រូវចាប់បាន ។ គ្រឿងញៀនទាំងនេះ រកឃើញលើនាវាមួយគ្រឿង ដែលកំពុងបើកបរនៅខាងលិចកោះCLARION ចម្ងាយប្រមាណជា១១០០គីឡូម៉ែត្រ ពីកំពង់ផែMANZANILLO ក្នុងរដ្ឋកូលីម៉ាភាគខាងលិចម៉ិចស៊ិក ។ កងម៉ា់រីនម៉ិចស៊ិក ក៏រាយការណ៍ដែរពីការចាប់ខ្លួនមនុស្សច្រើននាក់ តែមិនបញ្ជាក់ពីចំនួនឡើយ ។
ប្រធានាធិបតីម៉ិចស៊ិក លោកស្រីក្លូឌីយ៉ាសាំងបាអ៊ុមមុននេះថ្លែងថា លោកស្រីនឹងមិនអនុញ្ញាតឲ្យកងទ័ពអាមេរិកលើកចូលប្រទេសលោកស្រី ដើម្បីធ្វើប្រតិបត្តិការនៅម៉ិចស៊ិក ក៏ទោះបីលោកត្រាំទទូចលើអន្តរាគមន៍របស់កងកម្លាំងយោធាអាមេរិក ក្នុងដែនដីម៉ិចស៊ិកក៏ដោយ ។
លោកត្រាំបានគំរាមដាក់ពន្ធគយខ្ពស់លើម៉ិចស៊ិក ជាមធ្យោបាយគាបសង្កត់ ដើម្បីឲ្យប្រទេសនោះ បង្កើនការចាប់ខ្លួនពួកអ្នករត់ពន្ធគ្រឿងញៀននិងចាប់គ្រឿងញៀន ។
ក្រុងវ៉ាស៊ីនតោនប្រកាសកាលពីព្រឹកថ្ងៃទី១១ កុម្ភៈ ថា បានកម្ទេចបណ្ដាដ្រូនរបស់ពួករត់ពន្ធគ្រឿងញៀនម៉ិចស៊ិកនៅជិតព្រំដែនជាមួយអាមេរិក ។ ដែលរឿងនោះ តម្រូវឲ្យមានការបិទរយៈពេលច្រើនម៉ោង ព្រលានយន្តហោះអាមេរិកែអលប៉ាសូ ។
ម្យ៉ាងវិញទៀត លោកស្រីប្រធានាធិបតីម៉ិចស៊ិកអះអាងថា រដ្ឋាភិបាលលោកស្រីមិនទាន់ទទួលបានសេចក្ដីរាយការណ៍ណាមួយ រៀបរាប់ពីបណ្ដាដ្រូនរបស់បណ្ដាក្រុមរត់ពន្ធគ្រឿងញៀន នៅតាមព្រំដែនជាមួយអាមេរិកនៅឡើយ ៕
ចែករំលែកព័តមាននេះ