ខេត្តកំពង់ស្ពឺ៖ ស្ត្រីម្នាក់និងកូនស្រីតូចអាយុ៣ឆ្នាំបានរងរបួសធ្ងន់ធ្ងរ ត្រូវបានរថយន្តសាមុយដឹកយកទៅសង្គ្រោះព្យាបាលនៅមន្ទីរពេទ្យភ្លាមៗ ខណៈដែលម៉ូតូសណ្តោងរ៉ឺម៉កចំនួន០២គ្រឿងព្រលះគ្នាពេញទំហឹងបណ្តាលឱ្យក្រឡាប់នៅលើផ្លូវជាតិលេខ៤។
ហេតុការណ៍ម៉ូតូសណ្តោងរ៉ឺម៉កបុកគ្នាបណ្តាលឱ្យស្ត្រីម្នាក់និងកូនស្រីតូចរងរបួសធ្ងន់បានកើតឡើងកាលពី០៣និង៣០នាទីរសៀលថ្ងៃទី១១ ខែកុម្ភៈ ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៨៦ ទៅលេខ៨៧ ស្ថិតនៅក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា នៅមុនពេលកើតហេតុមានម៉ូតូសណ្ដោងរ៉ឺម៉ក០១គ្រឿង ដែលបើកបរដោយឈ្មោះ សន សំណាង ភេទប្រុស អាយុ២៧ ឆ្នាំរស់នៅក្នុងភូមិត្រពាំងវែង ឃុំបសេដ្ឋ ស្រុកបសេដ្ឋ(រងរបួសស្រាល) បានបើកបរតាមបណ្តោយផ្លូវជាតិលេខ៤ពីទិសខាងកើតទៅទិសខាងលិច លុះពេលធ្វើដំណើរមកដល់ចំណុចកើតហេតុខាងលើ ក៏បានបុកពីក្រោយម៉ូតូសណ្ដោងរ៉ឺម៉ក០១គ្រឿងទៀត ដែលបើកបរដោយឈ្មោះ ផាត់ ធាវី ភេទស្រី អាយុ៤១ឆ្នាំ ឌុបក្មេង១នាក់មានឈ្មោះ ភួន លក្សី ភេទស្រី អាយុ៣ឆ្នាំ ត្រូវជាកូនបង្កើត ទាំង០២នាក់ រស់នៅក្នុងភូមិទី១ ឃុំត្រែងត្រយឹង ស្រុកភ្នំស្រួច ដែលកំពុងបេីកបរស្របទិសគ្នាពេញទំហឹង ក្រឡាប់ បណ្ដាលឲ្យស្ត្រីជាម្តាយនិងកូនស្រីតូចអាយុ៣ឆ្នាំសន្លប់ស្តូកនៅលើផ្លូវជាតិរងរបួសធ្ងន់ធ្ងន់ធ្ងរ។
នគរបាលស្រុកភ្នំស្រួចបានបន្តថា ក្រោយកើតហេតុនគរបាលជំនាញបានចុះធ្វើការវាស់វែងនៅកន្លែងកើតហេតុ ហៅរថយន្តសាមុយដឹកជនរងគ្រោះម្តាយនិងកូនយកទៅសង្គ្រោះព្យាបាលនៅមន្ទីរពេទ្យបង្អែកត្រពាំងក្រឡឹង ។ រងការខូចខាតម៉ូតូសណ្តាងរ៉ឺម៉កចំនួន២គ្រឿង។
នគរបាលស្រុកភ្នំស្រួចបានបញ្ជាក់ថា ក្រោយកើតហេតុចំពោះវត្ថុតាងម៉ូតូសណ្តោងរ៉ឺម៉កទាំង០២គ្រឿង នគរបាលបានយកទៅរក្សាទុកនៅប៉ុស្តិ៍នគរបាលរដ្ឋបាលឃុំត្រែងត្រយឹងបណ្តោះអាសន្ន រង់ចាំធ្វើការដោះស្រាយ និងកសាងសំណុំរឿងចាត់ការបន្តតាមផ្លូវច្បាប់៕
ចែករំលែកព័តមាននេះ