អស្ចារ្យមែន ! វត្តមានសត្វកម្រជិតផុតពូជ ៤២ប្រភេទ ត្រូវបានរកឃើញក្នុងឧទ្យានជាតិវីរជ័យ តាមរយៈម៉ាស៊ីនថតស្វ័យប្រវត្ត
- ភ្នំពេញ
រាជធានីភ្នំពេញ ៖ ក្រសួងបរិស្ថាន នៅថ្ងៃទី ១២ ខែកុម្ភៈ ឆ្នាំ ២០២៦ នេះ បានឱ្យដឹងថា…
រាជធានីភ្នំពេញ ៖ ក្រសួងបរិស្ថាន នៅថ្ងៃទី ១២ ខែកុម្ភៈ ឆ្នាំ ២០២៦ នេះ បានឱ្យដឹងថា ប្រភេទសត្វកម្រជាច្រើននៅឧទ្យានជាតិវីរជ័យ ត្រូវបានកត់ត្រាតាមរយៈម៉ាស៊ីនថតស្វ័យប្រវត្ត ។ ការសិក្សាស្រាវជ្រាវជីវ:ចម្រុះដោយម៉ាស៊ីនថតស្វ័យប្រវត្តដែលធ្វើឡើងនៅចន្លោះខែមករា ដល់ខែសីហា ឆ្នាំ ២០២៥ បានបង្ហាញពីប្រភេទសត្វសំខាន់ជាច្រើន ដែលកំពុងមានវត្តនៅក្នុងឧទ្យានជាតិវីរជ័យ ។ ឧទ្យានជាតិនេះស្ថិតនៅភាគឦសាននៃប្រទេសកម្ពុជាដែលជាជម្រកដ៏មានសារៈសំខាន់សម្រាប់សត្វព្រៃគ្រប់ប្រភេទ ។
ក្រសួងបរិស្ថាន ឱ្យដឹងទៀតថា តាមរយៈកិច្ចសហការរវាង អង្គការសត្វព្រៃ និងរុក្ខជាតិ ជាមួយក្រសួងបរិស្ថាន ដោយមានការគាំទ្រពីមន្ទីរបរិស្ថានខេត្តរតនគីរី និងការចូលរួមពីជនជាតិដើមភាគតិច និងសហគមន៍មូលដ្ឋាន បានរកឃើញប្រភេទសត្វសំខាន់ៗ ដែលកត់ត្រាបានចំនួន ៤២ប្រភេទ ដូចជា ៖ ថនិកសត្វ ៣២ប្រភេទ បក្សី ៩ប្រភេទ និងពួកល្មួន ១ប្រភេទ ។
សម្រាប់ប្រភេទសត្វដែលកត់ត្រាខាងលើនេះមាន ២ប្រភេទជាសត្វជិតផុតពូជបំផុត ៥ប្រភេទជាសត្វជិតផុតពូជ និង ១៣ប្រភេទសត្វងាយរងគ្រោះ ដោយឡែកកំណត់ត្រាវីដេអូរបានកត់ត្រានូវហ្វូងដំរីអាស៊ី ដែលជាសក្ខីភាពបង្ហាញពីមោទនភាព និងភាពសមស្របនៃទីជម្រកធម្មជាតិនៃតំបន់ឧទ្យានជាតិវីរៈជ័យ ។
ក្រសួងបរិស្ថាន ឱ្យដឹងបន្ថែមទៀតថា ប្រភេទសត្វកម្រសំខាន់ៗជាច្រើន រួមមាន ៖ ដំរីអាស៊ី, ឆ្កែព្រៃ, ខ្លាពពក, ខ្លាលឿងមាស, កេងកងធំ, ខ្លាភ្ញីថ្មកែវ, រញីប្រផេះ, ក្ងោក, ស្វាកន្ទុយស, ពង្រូល និងប្រភេទសត្វផ្សេងៗជាច្រើនទៀត ៕
ចែករំលែកព័តមាននេះ