សុខភាព៖ យោងតាមការផ្សាយរបស់សារព័ត៌មានបរទេស ក្រូចថ្លុងមិនត្រឹមតែមានរសជាតិឆ្ងាញ់ប៉ុណ្ណោះទេ ប៉ុន្តែវាជាកំពូលផ្លែឈើដែលសម្បូរវីតាមីន C ខ្ពស់បំផុត (រហូតដល់ ៤០០% នៃតម្រូវការប្រចាំថ្ងៃ)។

វាដើរតួជា “អ្នកសម្អាតពោះវៀន” យ៉ាងសកម្ម ដោយសារជាតិសរសៃជួយសម្រួលការបន្ទោបង់ និងបង្ការការទល់លាមក។ សម្រាប់អ្នកចង់សម្រកទម្ងន់ ក្រូចថ្លុងគឺជាជម្រើសលេខ១ ព្រោះវាផ្តល់កាឡូរីទាប តែធ្វើឱ្យឆ្អែតបានយូរ និងកាត់បន្ថយការឃ្លានអាហារផ្តេសផ្តាស។

លើសពីនេះ ក្រូចថ្លុងសម្បូរទៅដោយសារធាតុប្រឆាំងអុកស៊ីតកម្មខ្លាំងៗដូចជា Lycopene ដែលជួយការពារកោសិកាពីការរលាក និងបង្ការជំងឺមហារីក។ ចំពោះ សុខភាពបេះដូង វិញ វាជួយបញ្ចុះជាតិខ្លាញ់អាក្រក់​និងការពារការកកស្ទះសរសៃឈាមបានយ៉ាងមានប្រសិទ្ធភាព។ មិនតែប៉ុណ្ណោះ វីតាមីន និងជាតិរ៉ែក្នុងក្រូចថ្លុង ក៏ជួយឱ្យស្បែករបស់អ្នកស្រស់ថ្លា និងមានសំណើមពីខាងក្នុងផងដែរ។

ទោះជាយ៉ាងណា អ្នកត្រូវប្រុងប្រយ័ត្នខ្ពស់ ប្រសិនបើកំពុងប្រើប្រាស់ ថ្នាំបញ្ចុះជាតិខ្លាញ់ ព្រោះក្រូចថ្លុងអាចរំខានដល់ប្រសិទ្ធភាពថ្នាំ ដូច្នេះគួរពិគ្រោះជាមួយគ្រូពេទ្យជាមុន។ ដើម្បីទទួលបានផលល្អបំផុត អ្នកគួរជ្រើសរើសញ៉ាំផ្លែស្រស់ ជាជាងផ្លែឈើក្រៀមដែលមានជាតិស្ករខ្ពស់។

ការញ៉ាំក្រូចថ្លុងស្រស់ជាប្រចាំ គឺជាវិធីសាស្ត្រធម្មជាតិដ៏សាមញ្ញ ដើម្បីរាងកាយមាំមួន និងមានសុខភាពល្អឥតខ្ចោះ​៕