ខេត្តព្រះសីហនុ ៖ ក្នុងគោលដៅការពារសុខុមាលភាពប្រជាពលរដ្ឋ ជាពិសេស ក្នុងឱកាសបុណ្យចូលឆ្នាំថ្មីប្រពៃណីជនជាតិចិន ដែលខិតជិតមកដល់ មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)…
ខេត្តព្រះសីហនុ ៖ ក្នុងគោលដៅការពារសុខុមាលភាពប្រជាពលរដ្ឋ ជាពិសេស ក្នុងឱកាសបុណ្យចូលឆ្នាំថ្មីប្រពៃណីជនជាតិចិន ដែលខិតជិតមកដល់ មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តព្រះសីហនុ បានសហការជាមួយមន្ត្រីមន្ទីរពាណិជ្ជកម្ម អាជ្ញាធរដែនដី និងគណៈកម្មការផ្សារ ចុះអនុវត្តប្រតិបត្តិការត្រួតពិនិត្យទំនិញម្ហូបអាហារនៅ «ផ្សារលើ» ក្រុងព្រះសីហនុ ។
យោងតាមសាខា ក.ប.ប. ខេត្តព្រះសីហនុ បានឲ្យដឹងថា ក្នុងប្រតិបត្តិការនេះ ក្រុមការងារបានផ្តោតសំខាន់លើការត្រួតពិនិត្យបន្លែ ផ្លែឈើ គ្រឿងសមុទ្រស្រស់ៗ និងទំនិញវេចខ្ចប់ក្នុងកំប៉ុង។ ទន្ទឹមនឹងការពិនិត្យបច្ចេកទេស មន្ត្រីជំនាញក៏បានធ្វើការណែនាំដល់អាជីវករឱ្យយល់ដឹងកាន់តែច្បាស់អំពី៖ ការដាក់តាំងលក់ទំនិញ ដែលមានគុណភាព និងមិនមានសារធាតុគីមីហាមឃាត់ ការពិនិត្យកាលបរិច្ឆេទផុតកំណត់លើមុខទំនិញកំប៉ុង ការរក្សាអនាម័យក្នុងទីតាំងលក់ដូរ ដើម្បីធានាសុវត្ថិភាពដល់អ្នកប្រើប្រាស់ ។
មន្ត្រីជំនាញបានដកយកគំរូម្ហូបអាហារសរុប ចំនួន ២២ គំរូ មកធ្វើការវិភាគរកសារធាតុគីមី ដែលក្នុងនោះរួមមាន ៖ ការពិសោធន៍លើរថយន្តចល័ត (១០ មុខ) ៖ រួមមាន ម៉ឹកស្រស់, បង្គា, ឈាមជ្រូក, ស្ពៃជ្រក់, សណ្តែកបណ្តុះ, សាច់ខ្យង, ក្រពះគោ, ស្លឹកគ្រៃហាន់ និងខ្ញីហាន់ ។
ការពិសោធន៍នៅមន្ទីរពិសោធន៍សាខា (១២ មុខ) ៖ រួមមាន តៅហ៊ូ, លតអង្ករ, ទំពាំងជ្រក់, ស្ករត្នោត, ត្រីងៀត, សាច់ក្រក, អណ្តាតជ្រូក, នំចិន, មីដុំលឿង, ពពុះសណ្តែក, ទឹកខ្មេះ និងក្បាលត្រីប្រលាក់ ។
បន្ទាប់ពីឆ្លងកាត់ការពិសោធន៍យ៉ាងម៉ត់ចត់ ក្រុមការងារបានបញ្ជាក់ថា ពុំមានទំនិញណាមួយមានភាពមិនអនុលោម ឬមានសារធាតុគីមីឡើយ ពោលគឺទំនិញទាំងអស់មានសុវត្ថិភាព សម្រាប់បងប្អូនប្រជាពលរដ្ឋជាអ្នកបរិភោគ។
សកម្មភាពនេះឆ្លុះបញ្ចាំងពីការយកចិត្តទុកដាក់ខ្ពស់របស់ក្រសួងពាណិជ្ជកម្ម ក៏ដូចជាអាជ្ញាធរពាក់ព័ន្ធ ក្នុងការធានាថាម្ហូបអាហារនៅលើទីផ្សារមានគុណភាពល្អ ជៀសផុតពីការប្រើប្រាស់សារធាតុគីមីដែលបង្កគ្រោះថ្នាក់ដល់សុខភាពសាធារណៈ ៕
ចែករំលែកព័តមាននេះ