អាមេរិក-អ៊ីរ៉ង់ ៖ ប្រធានាធិបតីអាមេរិក លោកដូណាល់ ត្រាំ ថ្លែងកាលពីថ្ងៃទី១០ កុម្ភៈ ថា លោកគ្រោងបញ្ជូននាវាផ្ទុកយន្តហោះទី២ មកកាន់មជ្ឈឹមបូព៌ាសំដៅធ្វើសកម្មភាពយោធាជាយថាហេតុមួយប្រឆាំងអ៊ីរ៉ង់…
អាមេរិក-អ៊ីរ៉ង់ ៖ ប្រធានាធិបតីអាមេរិក លោកដូណាល់ ត្រាំ ថ្លែងកាលពីថ្ងៃទី១០ កុម្ភៈ ថា លោកគ្រោងបញ្ជូននាវាផ្ទុកយន្តហោះទី២ មកកាន់មជ្ឈឹមបូព៌ាសំដៅធ្វើសកម្មភាពយោធាជាយថាហេតុមួយប្រឆាំងអ៊ីរ៉ង់ ប្រសិនបើការចរចាត្រូវបរាជ័យ ។
ក្នុងបទសម្ភាសន៍មួយជាមួយសារព័ត៌មានអាមេរិកAXIOS លោកត្រាំគូសបញ្ចាក់ថា យើងមានកងនាវាចរណ៍មួយ កំពុងធ្វើដំណើរមកកាន់តំបន់ឈូងសមុទ្រពែរ្ស៍ ហើយនាវាមួយកងទៀតអាចមកកាន់ទីនោះដែរ ។
លោកបន្តថា ក្រុងវ៉ាស៊ីនតោនគ្រោងដាក់ពង្រាយកងទ័ពបន្ថែមទៀត ដោយបន្តការចរចាខាងការទូតជាមួយអ៊ីរ៉ង់។ វាអាចដែលយើងចុះហត្ថលេខាលើកិច្ចព្រមព្រៀងមួយ ឬយើងត្រូវធ្វើអ្វីមួយជាមួយកម្លាំង។ លោកអះអាងថានាវាផ្ទុកយន្តហោះទី២មួយទៀតអាចបញ្ជូនទៅកាន់តំបន់់នោះ ។ នាវាផ្ទុកយន្តហោះUSS ABRAHAM LINCOLN និងនាវាពិឃាតបាញ់មីស៊ីលជាច្រើនគ្រឿង ត្រូវបានដាក់ពង្រាយរួចហើយនៅមជ្ឈឹមបូព៌ា ។
អាមេរិកនិងអ៊ីរ៉ង់បានចរចាគ្នាកាលពីសប្ដាហ៍មុននៅអូម៉ង់ ហើយភាគីទាំង២បន្តជួបចរចាគ្នាទៀតនៅអូម៉ង់ដែរ ។ ដោយសម្ដែងពីសុទិដ្ឋិនិយមចំពោះដំណើរការការទូត លោកត្រាំថា អ៊ីរ៉ង់ចង់ចុះហត្ថលេខាលើកិច្ចព្រមព្រៀងមួយនិងថា រាល់កិច្ចព្រមព្រៀងត្រូវរួមមានទាំងលើកម្មវិធីនុយក្លេអ៊ែរទាំងការស្តុកមីស៊ីលបាលីស្ទិក ។
នាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូបានមកជួបលោកត្រាំ នៅសេតវិមាននាថ្ងៃទី១១ កុម្ភៈ ដោយលោកស្នើដល់លោកត្រាំឲ្យគាបសង្កត់អ៊ីរ៉ង់ខ្លាំងបំផុត ៕
ចែករំលែកព័តមាននេះ