ខេត្តបាត់ដំបង ៖ ឧប្បតិហេតុដែលកើតឡើងដែលនឹកស្មានមិនដល់ ផ្ដើមចេញពីម៉ាស៊ីនកាត់ស្មៅដែលកាត់ស្មៅប៉ះចំដុំថ្មបែកផ្កាភ្លើង បង្កជាអគ្គិភ័យឆេះរាលដាលពេញចម្ការធ្វើឲ្យខូចខាតដំណាំ«តាង៉ែន»ជាង៣៥០ដើម កាលពីរសៀលថ្ងៃទី ១០ កុម្ភៈ នៅចំណុចម្ការមួយកន្លែង ស្ថិតក្នុងភូមិបឹងអំពិល…
ខេត្តបាត់ដំបង ៖ ឧប្បតិហេតុដែលកើតឡើងដែលនឹកស្មានមិនដល់ ផ្ដើមចេញពីម៉ាស៊ីនកាត់ស្មៅដែលកាត់ស្មៅប៉ះចំដុំថ្មបែកផ្កាភ្លើង បង្កជាអគ្គិភ័យឆេះរាលដាលពេញចម្ការធ្វើឲ្យខូចខាតដំណាំ«តាង៉ែន»ជាង៣៥០ដើម កាលពីរសៀលថ្ងៃទី ១០ កុម្ភៈ នៅចំណុចម្ការមួយកន្លែង ស្ថិតក្នុងភូមិបឹងអំពិល ឃុំស្ដៅ ស្រុករតនមណ្ឌល ហើយត្រូវបានរថយន្តពន្លត់អគ្គិភ័យរបស់សមត្ថកិច្ចចេញជួយអន្តរាគមន៍បាញ់ទឹកទប់ស្កាត់ទាន់ពេលវេលា ។
មន្ត្រីពន្លត់អគ្គិភ័យបានរាយការណ៍ថា ដីចម្ការ«តាង៉ែន»នោះ មានទំហំ៣ហិកតា ដែលមើលការខុសត្រូវដោយឈ្មោះ រឿន វណ្ណារ៉ា ភេទប្រុស អាយុ៤០ឆ្នាំ រស់នៅចំណុចភូមិ ឃុំកើតហេតុ ។ អគ្គិភ័យបានឆេះរាលដាលពេញដីចម្ការ ដែលអ្នកមើលការខុសត្រូវមិនអាចគ្រប់គ្រងបានរហូតសុំជំនួយរថយន្តពន្លត់អគ្គិភ័យរបស់អធិការស្រុករតនមណ្ឌល ដើម្បីអន្តរាគមន៍ជួយបាញ់ទឹកពន្លត់ ។
អគ្គិភ័យដែលមិនធ្លាប់ជួបនេះ បានផ្ដើមចេញពី«ផ្កាភ្លើង» បែកចេញពីម៉ាស៊ីនកាត់ស្មៅ ប៉ះជាមួយដុំថ្ម ក៏ឆេះផ្អើលអ្នកចម្ការ និងសមត្ថកិច្ច។ នេះបើតាមសមត្ថកិច្ចបានស្រង់សម្ដីអ្នកមើលថែទាំចម្ការ ។
មន្ត្រីពន្លត់អគ្គិភ័យបានស្រង់សម្ដីអ្នកមើលចម្ការថា គាត់បានយកម៉ាស៊ីនកាត់ស្មៅបំពាក់ជាប់ត្រាក់ទ័រ រួចបើកកាត់ស្មៅក្នុងចម្ការ ។ ពេលនោះផ្កែម៉ាស៊ីនកាត់ស្មៅបានប៉ះទង្គិចជាមួយដុំថ្ម បង្កជាភ្លើងឆេះស្មៅរាលដាលយ៉ាងសន្ធោសន្ធៅភ្លាមៗតែម្ដង ។ គាត់បានព្យាយាមពន្លត់ភ្លើងដែលកើតឡើងដោយចៃដន្យនោះ តែវាឆេះរាលដាលកាន់តែខ្លាំង ព្រោះស្មៅច្រើនមិនអាចគ្រប់គ្រងបាន ទើបទាក់ទងសុំជំនួយពីសមត្ថកិច្ចជួយអន្តរាគមន៍។
មន្ត្រីពន្លត់អគ្គិភ័យបានឲ្យដឹងថា កម្លាំងជំនាញ នៃអធិការស្រុករតនមណ្ឌលបានប្រើប្រាស់រថយន្តទឹកចំនួន០២គ្រឿងចេញជួយអន្តរាគមន៍ភ្លាមៗ ក្រោយពីទទូលដំណឹងនេះ។ អគ្គិភ័យនេះឆេះរាលដាលស្មៅពាសពេញក្នុងចម្ការធ្វើឲ្យខូចខាតដំណាំ«តាង៉ែន» អស់ចំនួន៣៥២ដើម ។ ប៉ុន្តែអគ្គិភ័យនោះ មិនបានឆេះរាលដាលឆ្លងទៅកាន់ដីចម្ការក្បែរខាងទេ ដោយសារតែរថយន្តពន្លត់អគ្គិភ័យរបស់សមត្ថកិច្ចជួយបាញ់ទឹកពន្លត់ និងបាញ់ទប់ស្កាត់ត្រឹមព្រំចម្ការ ៕
ចែករំលែកព័តមាននេះ