រាជធានីភ្នំពេញ ៖ តូបលក់គ្រឿងទេសនៅផ្សារធំទួលសង្កែហៅផ្សារហាំហាន់ ត្រូវបានអគ្គីភ័យឆាបឆេះបណ្ដាលឲ្យរងការខូចខាតអស់ចំនួន២តូប។ ហេតុការណ៍នេះបានកើតឡើងកាលពីវេលាម៉ោង៥និង១៥នាទីព្រឹក ថ្ងៃទី១១ ខែកុម្ភៈ ឆ្នាំ២០២៦នៅចំណុចផ្សារសាំហាន់ដែលស្ថិតនៅ តាមបណ្ដោយផ្លូវលេខ១០៥ ភូមិបាក់ទូកសង្កាត់ទួលសង្កែទី១…
រាជធានីភ្នំពេញ ៖ តូបលក់គ្រឿងទេសនៅផ្សារធំទួលសង្កែហៅផ្សារហាំហាន់ ត្រូវបានអគ្គីភ័យឆាបឆេះបណ្ដាលឲ្យរងការខូចខាតអស់ចំនួន២តូប។
ហេតុការណ៍នេះបានកើតឡើងកាលពីវេលាម៉ោង៥និង១៥នាទីព្រឹក ថ្ងៃទី១១ ខែកុម្ភៈ ឆ្នាំ២០២៦នៅចំណុចផ្សារសាំហាន់ដែលស្ថិតនៅ តាមបណ្ដោយផ្លូវលេខ១០៥ ភូមិបាក់ទូកសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា៖ នៅមុនពេលកើតហេតុគេឃើញមានផ្សែងហុយនិងមានអណ្ដាតភ្លើងយ៉ាងសន្ធោសន្ធៅលាយឡំនិងសំឡេងផ្ទុះចេញពីតូបលក់គ្រឿងទេសខាងលើ។ភ្លាមៗបង្កឲ្យមានការភ្ញាក់ផ្អើលដល់អាជីវករនាំគ្នាជួយបាញ់ពន្លត់និងជញ្ជូនអីវ៉ាន់ចេញព្រមទាំងទាក់ទងហៅរថយន្តពន្លត់អគ្គីភ័យទៅអន្តរាគមន៍។
ក្នុងហេតុការណ៍នេះដែរ គេឃើញមានវត្តមានលោក ជិន ប៊ុនធឿន អភិបាលខណ្ឌឬស្សីកែវ បានដឹកនាំកម្លាំងចុះមកជួយសម្របសម្រួល ចរាចរណ៍និងចេញរថយន្តមួយគ្រឿងទៅអន្តរាគមន៍ផងដែរ។
តាមនគរបាលការិយាល័យបង្ការពន្លត់អគ្គិភ័យនិងសង្គ្រោះ នៃស្នងការរដ្ឋាននគរបាលរាជធានីភ្នំពេញបានឱ្យដឹងថា នៅក្នុងហេតុការណ៍នោះរថយន្តពន្លត់អគ្គីភ័យចំនួន១១ គ្រឿងបានទៅអន្តរាគមន៍បាញ់ពន្លត់នៅក្នុងនោះរថយន្តរបស់ការិយាល័យបង្ការពន្លត់អគ្គីភ័យនិងសង្គ្រោះចំនួន ១០គ្រឿងនិងរថយន្តរបស់សាលាខណ្ឌឬស្សីកែវចំនួន១គ្រឿងដោយប្រើប្រាស់ទឹកអស់ចំនួន ៩ឡាន ហើយភ្លើងបានរលត់ទៅវិញនៅវេលាម៉ោង ៦នឹង១៥នាទីព្រឹក នាថ្ងៃខែ ឆ្នាំដដែល។
តាមនគរបាលបានឲ្យដឹងទៀតថា អគ្គីភ័យនេះបណ្ដាឲ្យតូបលក់គ្រឿងទេសដែលធ្វើពីដែក ប្រក់ស័ង្កសី ទំហំ ៣ម៉ែត្រគុណ៨ម៉ែត្រ ដែលមានម្ចាស់ឈ្មោះ ពេជ្រ ទូច ភេទប្រុស អាយុ ៥៨ឆ្នាំ ជនជាតិ ខ្មែរ ត្រូវភ្លើងឆេះរងការខូចខាតទាំងស្រុង ហើយឆេះរាលដាលមកដល់តូបមួយទៀតដែលនៅជាប់នោះអស់ប្រមាណ 50%។
តាមនគរបាលឲ្យដឹងទៀតថា អគ្គីភ័យនេះបណ្ដាលមកពីឆ្លងចរន្តអគ្គិសនី៕
ចែករំលែកព័តមាននេះ