ទីក្រុងវីលនាស៖ ប្រទេសរុស្ស៊ីមិនទាន់មានគម្រោងវាយប្រហាររដ្ឋជាសមាជិកអង្គការណាតូនៅឆ្នាំនេះ ឬឆ្នាំក្រោយទេ។ ប៉ុន្តែរុស្ស៊ីក៏កំពុងកសាងកម្លាំងយោធាជាបណ្ដើរៗផងដែរនៅពេលអឺរ៉ុបចាប់ផ្ដើមគិតគូរអំពីការពង្រឹងកម្លាំងយោធារបស់ខ្លួនឡើងវិញ។ ខាងលើនេះជាការសរសេររៀបរាប់របស់ភ្នាក់ងារស៊ើបការណ៍សម្ងាត់នៃប្រទេសអេស្តូនីនៅក្នុងរបាយការណ៍ប្រចាំឆ្នាំរបស់ខ្លួន។
អេស្តូនីជាសមាជិកអង្គការណាតូ ហើយមានព្រំដែនជាប់នឹងប្រទេសរុស្ស៊ីថែមទៀត។ ប្រទេសនេះជាអ្នករិះគន់រុស្ស៊ីដោយឥតសំចៃមាត់ និងជាអ្នកគាំទ្រអ៊ុយក្រែនយ៉ាងមុតមាំ។ ប្រធានសេវាសម្ងាត់អេស្តូនីថ្លែងថាអឺរ៉ុបត្រូវតែវិនិយោគឱ្យបានច្រើនទៅលើវិស័យការពារជាតិ និងសន្តិសុខផ្ទៃក្នុង។ លុះត្រាតែធ្វើដូច្នេះទើបទៅថ្ងៃអនាគតរុស្ស៊ីមានចិត្តញញើត គិតថាខ្លួនមិនអាចប្រឆាំងនឹងរដ្ឋជាសមាជិកអង្គការណាតូទេ។
យើងឃើញថាថ្នាក់ដឹកនាំរុស្ស៊ីកំពុងខ្វាយខ្វល់យ៉ាងខ្លាំងនៅពេលអឺរ៉ុបខិតខំកសាងកម្លាំងយោធា។ រុស្ស៊ីប្រមើលឃើញថាអឺរ៉ុបអាចនឹងមានសមត្ថភាពតតាំងគ្នាជាមួយរុស្ស៊ី (ដោយមិនចាំបាច់មានអាមេរិក) នៅក្នុងរយៈពេល២ទៅ៣ឆ្នាំខាងមុខ។ គោលដៅរបស់រុស្ស៊ីគឺខិតខំពន្យារពេល ឬបន្ទច់បង្អាក់សកម្មភាពរបស់អឺរ៉ុប។ ភ្នាក់ងារស៊ើបការណ៍សម្ងាត់អេស្តូនីសរសេររៀបរាប់នៅក្នុងរបាយការណ៍ថារុស្ស៊ីផលិតគ្រាប់រំសេវយ៉ាងឆាប់រហ័សដែលអាចឱ្យប្រទេសនេះបម្រុងទុកគ្រាប់រំសេវខ្លះសម្រាប់ប្រើការនៅថ្ងៃក្រោយ និងគ្រាប់រំសេវខ្លះទៀតយកទៅធ្វើសង្គ្រាមនៅអ៊ុយក្រែន។
របាយការណ៍នោះសរសេររៀបរាប់បន្តទៀតថាបើសិនរុស្ស៊ីវាយប្រហារប្រទេសអេស្តូនី រុស្ស៊ីនឹងវាយផ្គួបគ្នាទាំងជើងគោក ជើងទឹក និងជើងអាកាសដោយប្រើប្រាស់ដ្រូន។ ភ្នាក់ងារសម្ងាត់របស់អេស្តូនីអះអាងថារុស្ស៊ីនៅតែចាត់ទុកអាមេរិកជាគូប្រជែងរបស់ខ្លួនដ៏ធំជាងគេ។ ទន្ទឹមនឹងនោះ រុស្ស៊ីនៅតែបង្ហាញថាខ្លួនចង់សហការជាមួយអាមេរិកដើម្បីបន្ធូរបន្ថយទណ្ឌកម្មសេដ្ឋកិច្ច៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ